काठमाडौं - ‘क्यानभासमा जिरी’ चित्रकला प्रदर्शनी सुरु भएको छ । नेपालको ऐतिहासिक र पर्यटकीय नगर जिरीको सांस्कृतिक भौगोलिक विविधताको सौन्दर्यलाई अझ बढि उजागर गर्ने उदेश्यले विविध कार्यक्रम आयोजना गरेको हो । उक्त कार्यक्रम नेपाल पर्यटन बाेर्डका नवनियुक्त कार्यकारी प्रमुख (सीईओ) दीपकराज जोशीले उद्घाटन गरेका हुन् ।
यसै सन्दर्भमा गत वर्ष दोश्रो जिरी महोत्सवमा नेपालका ख्यातिप्राप्त ६ जना कलाकारहरुले त्यहाँ पुगेर महोत्सवको स्थलगत ३ दिने कला कार्यशालामा जिरीमा देखेका भोगेका र अनुभव गरेका कुरालाई कलाकृति सृजना गरेका हुन् ।
तिनै कलाकृतिहरुको संगालोमा ‘क्यानभासमा जिरी’ चित्रकला प्रदर्शन गरेको टुरिजम प्रमोशन फोरम नेपालका अध्यक्ष र क्यानभासभा जिरी कला प्रदर्शनीका संयोजक लिलाराम खड्काले बताए । विशेषतः पर्यटकहरुमाझ नेपालको स्विटजरल्याण्ड भनेर चिनिएको जिरीको प्राकृतिक सौन्दर्य, यहाँको जनजीवन, संस्कृति, वास्तुकला र सम्पदाहरुलाई कलाकारहरुले क्यानभासमा उतारेका छन् ।
यो प्रदर्शनीमा जम्मा ३६ थान कलाकृति प्रदर्शनीमा राखिएका छन् । जिरीको भेषभुषा, संस्कृतिका साथै बहुसांस्कृतिक परिचय बोकेको जिरीको जनजीवन र संस्कृतिक पक्ष पनि यो प्रदर्शनमा समेटिएका कलाकृतिमा पाइन्छ । जिरीको पहिचान बनेको प्राकृतिक सौन्दर्य कलाकृतिमा देख्न सकिनेछ । कुनै बेला सगरमाथाको प्रवेशद्वारका रुपमा परिचित जिरी यतिबेला पर्यटकको पर्खाइमा रहेको छ । आफ्नो प्राकृतिक र भौगोलिक सौन्दर्य देखाउन जिरी धनी छ । यहाँको सांस्कृतिक विविधता र जिरेलसहितको मिश्रित जनजीवनले स्वदेशी र विदेशी पाहुनालाई लोभ्याउने गरेको छ । यहाँका ताल तलैया, झरना, मठ मन्दिर, गुम्बा, प्राकृतिक उद्यानहरु, हिमाली भुभागका हिँउ, याक आदिले पर्यटकको आगमन कुरीरहेको प्रदशर्नीमा राखेका तस्विरले देखाएको छ । अमुल्य जडिबुटीहरुले आगन्तुकका ध्यान खिचेको छ । जिरीको वास्तुकला र मौलिक संस्कृतिहरुले आमजनलाई खुला आह्वान गरिरहेका छन् ।
प्रदर्शनीमा ६ जना कलाकारहरु केशवराज खनाल, किशोर रानाभाट, लिलाधर केसी, मोहन शिवाकोटी, प्रकाश मिजार र शिव शिर्पाली सहभागी रहेका छन् । कलाकारले एक्रेलिक र जलरङ(वाटर कलर)को प्रयोग गरि चित्र सृजना गरेको छन् । कार्यशाला र प्रदर्शनीमा कलाकारहरुको संयोजन केशवराज खनालले गरेका हुन् । प्रदर्शनी २०८१ साल भदौ २८ गते देखि भदौ ३० गते सम्म उमोजा क्याफे, एनबि सेन्टर नयाँ बानेश्वरमा संचालनमा रहने आयोजकले जनाएको छ ।
