केपी ओली नेतृत्वको सरकार यतिबेला पूर्ववर्ती सरकारले गरेका निर्णयहरु उल्ट्याउन लागिपरेको छ । यही सिलसिलामा बिहीबारको मन्त्रिपरिषद् बैठकले सामाजिक सञ्जाल टिकटकमाथि लगाएको प्रतिबन्ध हटाउने निर्णय गर्यो । पुष्पकमल दाहाल नेतृत्वको पूर्ववर्ती सरकारले गत वर्ष असोज २७ गतेदेखि टिकटकमाथि प्रतिबन्ध लगाएको थियो । प्रतिबन्ध लगाउनुको प्रमुख कारण थियो सामाजिक सद्भाव भड्किने सामग्री । अनियन्त्रितरुपमा चलेको उक्त सामाजिक सञ्जालमार्फत निकै भद्दा, गालीगलौजलगायत सामाजिक सद्भावमा असर पुर्याउने खालका सामग्रीहरु प्रशस्त आइरहेको थियो । जसले निकै चुनौती बढाएको तत्कालीन सरकारको निष्कर्ष थियो ।
सरकारले प्रतिबन्ध लगाएपछि टिकटकका प्रतिनिधिहरुले बारम्बार सरकारसमक्ष खोल्न आग्रह गरेका थिए । नेपालको कानुनअनुसार सम्पूर्ण सुरक्षाका उपाय अवलम्बन गर्न तयार रहेको भन्दै प्रतिबन्ध खोल्न आग्रह गरिएको थियो । तर, दाहाल सरकार त्यसमा विश्वस्त हुन नसकेका कारण फुकुवा गर्न अस्वीकार गरेको थियो । टिकटकले मात्रै होइन विभिन्न अन्तर्राष्ट्रिय सामाजिक सञ्जालहरुले पनि सरकारको कदमप्रति आपत्ति जर्नाएको थियो । टिकटकबाट सुरु भएको प्रतिबन्ध आफूहरुलाई पनि लाग्नसक्ने आशंका ती सञ्जालका प्रतिनिधिहरुको थियो ।
ओली सरकारलाई पनि सुरुबाटै यो दबाब आएको हुनुपर्छ । त्यसैले त टिकटकमाथिको प्रतिबन्ध हटाउन तयार भयो । यद्यपि, टिकटक खोल्न चार सर्त अघि सारिएको छ । जसमा, पहिलो नेपालको पर्यटन प्रवद्र्धनमा सहयोग गर्नुपर्ने, दोस्रो डिजिटल सुरक्षा र साक्षरताका लागि सघाउनुपर्ने, तेस्रो सार्वजनिक शिक्षालाई गुणस्तरीय र सूचना प्रविधिमा आधारित बनाउन सहयोग गर्नुपर्ने र चौथो नेपालीलगायत मातृभाषाहरुको ‘फिल्टरिङ’ गर्नुपर्ने । सरकारले ‘जे कारणले टिकटक बन्द गर्नुपर्ने परिस्थिति बनेको थियो, त्यो नहुने व्यवस्था गर्नुपर्ने’ भनेको छ । साथै, सामाजिक सञ्जाल सञ्चालन निर्देशिका, २०८० को दफा ३ अनुसार मन्त्रालयमा सूचीकरण हुनुपर्ने, दफा ६ अनुसार प्वाइन्ट अफ कन्ट्याक्ट तोक्नुपर्ने उल्लेख छ ।
ओली सरकारको यो निर्णयबाट टिकटक प्रयोगकर्ताहरु खुसी भएका छन् । नियमनमा कडाइ गर्नसके प्रतिबन्ध नलगाउनु नै उचित हो तर मुलुकको नियामक निकाय प्रभावकारी बन्न नसकेको जगजाहेर छ । त्यसैले टिकटक र अन्य सामाजिक सञ्जालहरुबाट सिर्जना हुने चुनौतीप्रति गम्भीर हुनैपर्छ । सरकारले प्रतिबन्ध खोल्नु ठूलो कुरा होइन, अब तोकिएका सर्तहरु कडाइका साथ पालना गराउन सरकार सफल हुन्छ या हुँदैन त्यो हेर्न बाँकी नै छ ।
त्यसो त टिकटकबाट चुनौतीमात्रै छैन, यसबाट धेरै अवसरहरु पनि सिर्जना भएका छन् । धेरैको व्यवसाय प्रवद्र्धन गर्नेदेखि विभिन्न सकारात्मक अभियान सञ्चालन गर्ने कार्यमा पनि यो प्रभावकारी बनेको छ । त्यसैले आगामी दिनमा यसलाई विकृतिरहित बनाएर प्रयोग गर्न प्रेरित गर्न जरुरी छ । फेरि पनि विकृत हुन नदिनेगरी नियमनमा कडाइ गरियोस् ।
