भ्रष्टाचार नियन्त्रणमा निर्मम बन्ने प्रधानमन्त्री केपी शर्मा ओलीको प्रतिबद्धता नयाँ होइन । यसअघि तीनपटक प्रधानमन्त्री बन्दासमेत उनले भ्रष्टाचार नियन्त्रणका लागि कडा प्रतिबद्धता जनाएका थिए । ‘भ्रष्टाचार गर्दिनँ, भ्रष्टाचार गर्नेको अनुहारै हेर्दिनँ’ भन्ने प्रधानमन्त्री ओलीको प्रतिबद्धतापूर्ण नाराले सबैको ध्यान तानेको थियो । तर, व्यवहारमा भने उनले ठीक उल्टो कार्यान्वयन गरे । आफ्नो प्रतिबद्धता बिर्से । उनकै पालामा विभिन्न भ्रष्टाचारका काण्डहरु भए । जसकारण उनीप्रति विश्वास गर्ने अवस्था रहेन ।
जनताले त विश्वास गर्न छाडिसके । संघीय संसद्का सांसदहरु पनि प्रधानमन्त्री ओलीको बोलीमा विश्वस्त नरहेको पाइयो । मंगलबार संसद्को राज्य व्यवस्था तथा सुशासन समितिको बैठकमा सांसदहरुले यही कुरा उठाए । प्रतिबद्धतामा कडा देखिएका प्रधानमन्त्री ओली व्यवहारमा किन उल्टो गरिरहेका छन् ? सांसदहरुको प्रश्न थियो । प्रतिपक्षी दलका सांसदहरुले त स्वाभाविक रुपमा ओलीमाथि आलोचना गर्ने नै भए, तर सत्तारुढ दलकै सांसदहरुले पनि उनीमाथि प्रश्न उठाए । प्रधानमन्त्रीसँग कार्ययोजना मागे ।
प्रधानमन्त्री ओलीले भने पुरानै प्रतिबद्धता दोहोर्याए । भ्रष्टाचार नियन्त्रणमा कसैप्रति पूर्वाग्राही नबन्ने बताए । भ्रष्टाचार गरेको भए जोसुकैलाई कारबाहीको दायरामा ल्याउन आफ्नो सरकार दृढ रहेको उल्लेख गरे । तर, सांसदहरु विश्वस्त देखिएनन् । ओली ती नेता हुन्, जो यसअघि दोस्रो र तेस्रोपटक प्रधानमन्त्री भएका बेला काण्डैकाण्ड बाहिरिएको थियो । सुरक्षण मुद्रण प्रकरण, यतीकाण्ड, ओम्नीकाण्ड, टेरामक्सकाण्डलगायत काण्ड ओली प्रधानमन्त्री भएका बेला भएका थिए । गिरिबन्धु टि–स्टेटको जग्गा सट्टाभर्नासम्बन्धी विवादित निर्णय उनकै पालामा भएको थियो ।
यस्तै प्रकरणहरुले गर्दा जनतादेखि सांसदसम्म ओली सरकारले भ्रष्टाचार नियन्त्रण गरी सुशासन कायम गर्नेमा ढुक्क छैनन् । ओली नेतृत्वको वर्तमान सरकारमा ती विभिन्न प्रकरणमा मुछिएका नेताहरु नै मन्त्री छन् । जसले गर्दा पनि ओलीप्रतिको अविश्वास बढको हो । सांसदहरुले भ्रष्टाचारले मुलुक आक्रान्त बनेकोले बंगलादेशमा जस्तै जनआक्रोश सडकमा पोखिनसक्नेतर्फ सरकारलाई सचेत गराए । बंगलादेशको पछिल्लो घटनाक्रमसँगै नेपाल पनि त्यही अवस्थामा पुग्ने हो कि भन्ने आमजनचासो बढिरहेको सन्दर्भमा सांसदहरुले त्यो आशंकालाई थप उजागर गरेका छन् ।
ओलीमात्रै होइन, जोसुकै प्रधानमन्त्री बने पनि भ्रष्टाचार नियन्त्रण कार्य नारामै सीमित बन्दै आएको छ । अहिले ओलीलाई काम गरेर देखाउने अवसर छ । किनकि, दुईतिहाइको सरकार नेतृत्व गर्न पाएका छन् । सवल पक्ष भनेको संसद्को सबैभन्दा ठूलो दल नेपाली कांग्रेसको साथ पाएको छ । त्यसैले अब पनि गफमा मात्रै सीमित हुने छुट ओलीलाई छैन ।
