- प्राध्यापक धर्मराज विष्टको हत्या आरोपी रञ्जन खड्का १७ वर्षपछि पक्राउ
- दिदी शोभिता थापालाई ‘मन पराउँछु’ भन्दा विष्टको हत्या
- घटनाको मुख्य योजनाकार शोभिता
काठमाडौं– काठमाडौंको शंखमुलमा २६ असार २०६४ मा प्राध्यापक धर्मराज विष्टको हत्या भयो । उनी मीनभवनस्थित नेपाल कमर्स क्याम्पसमा प्राध्यापन गर्थे । उनको हत्यापछि संलग्न किटान गरिएको रञ्जन खड्का फरार थिए । उनै खड्का १७ वर्षपछि पक्राउ परेका छन् । बुधबार पत्रकार सम्मेलन गरेर काठमाडौं उपत्यका अपराध अनुसन्धान कार्यालयले उनलाई सार्वजनिक गर्यो ।
उनको घर काठमाडौं–३२ स्थित कोटेश्वर हो । हत्यालगत्तै फरार रहका उनी करिब १७ वर्ष भारतको बैंगलोर र जल्पाइगुडी क्षेत्रमा लुकेर बसेको प्रारम्भिक अनुसन्धानको क्रममा खुलेको प्रहरीले जनाएको छ । अपराध अनुसन्धान कार्यालयबाट खटिएको टोलीले उनलाई मंगलबार त्रिभुवन अन्तर्राष्ट्रिय विमानस्थल अगाडिबाट पक्राउ गरेको हो । फूपूको छोरा धादिङ गंगाजमुना गाउँपालिका–७ घर भएका विनोद थापाको आग्रहमा उनी प्राध्यापकको हत्यामा संलग्न भएका थिए । रञ्जन विनोदको मामाका छोरा हुन् ।
विनोदकी दिदी सविता थापा अधिकारी भन्ने शोभिता थापा त्यतिबेला नेपाल कमर्स क्याम्पसमा स्नातक तहमा अध्ययनरत थिइन् । प्राध्यापकले आफूलाई ‘मन पराउँछु’ भन्दै पटक–पटक फोन गर्ने गरेको कुरा शोभिताले भाइलाई बताएकी थिइन् । लगत्तै विनोदले आफ्नो टिम भेला गरे । शोभिताले प्राध्यापकलाई भेट्न बोलाइन् ।शोभितालाई भेट्न शंखमुल गएका प्राध्यापकलाई रञ्जन, विनोद र भक्तपुरका राजीव पाण्डेले रड र इँटा प्रहार गरे । कुटपिटबाट प्राध्यापकको मृत्यु भएको कार्यालयका प्रमुख तथा प्रहरी वरिष्ठ उपरीक्षक (एसएसपी) सानुराम भट्टराईले बताए ।
शोभिता २०८० चैतमा पक्राउ परेर धरौटीमा छुटेकी छन् ।विनोद जेल सजाय काटेर ३ असोज २०७९ मा रिहा भएका छन् । लागुऔषध मुद्दामा झापामा पक्राउ परेपछि प्रहरीले उनलाई काठमाडौंमा ल्याएर हत्या मुद्दामा बयान गराएको थियो । ललितपुर जिल्ला अदालतले उनलाई ३० पुस २०७१ मा जन्मकैदको फैसला गरेको थियो ।अर्का प्रतिवादी भक्तपुर लोकन्थलीका राजीव पाण्डे पनि २०७६ मा डिल्लीबजार कारागारबाट रिहा भइसकेका छन् । रञ्जनको मुद्दाचाहिँ ललितपुर जिल्ला अदालतमा मुल्तवीमा रहेको जिल्ला प्रहरी परिसर ललितपुरका एसपी नरेशराज सुवेदीले जानकारी दिए ।
प्रहरीका अनुसार घटनाको मुख्य योजनाकार सोभिता हुन् । उनकै योजनामा प्राध्यापक विष्टको हत्या भएको निष्कर्ष प्रहरीको छ । उनी ललितपुरको ढोलाहिटीकी हुन् । उनी घटनाको १६ वर्षपछि पक्राउ परेकी थिइन् । प्रहरीले घटनालाई योजनाबद्ध भनेको छ । काठमाडौंजस्तो सुरक्षा व्यवस्था चुस्त भनिएकै ठाउँमा आपराधिक घटना घटाएर शोभितासहित घटनामा संलग्नहरू उम्किन सफल भएका थिए । घटनामा संलग्नहरूको खोजीमा प्रहरी लामो समयदेखि क्रियाशील थियो । तर, प्रहरीलाई आरोपीहरू भएको ठाउँबारे सुराक पाउन वर्षौं लाग्यो । अन्ततः घटनामा संलग्न रञ्जन, विनोदसँगै मुख्य योजनाकार शोभिता पक्राउ परे ।
-1762839922.jpg)
