वैदेशिक रोजगार क्षेत्रमा ठगीका घटना नौलो होइन । विभिन्न प्रलोभनमा देखाएर ठगी गर्दै आएका घटनाहरु हरेक दिन सार्वजनिक भइरहेका हुन्छन् । प्रहरीले यस्ता कार्यमा संलग्न व्यक्तिहरुलाई पक्राउ गरेका समाचारहरु पनि प्रायः दैनिकरुपमा नै आइरहेका हुन्छन् । तर, वैदेशिक रोजगारीका नाममा भइरहेको ठगी र मानव तस्करीका घटनामा कमी आउन सकेको छैन । यस्तो कार्य नियन्त्रणमा राज्य पूर्णतः असफल बन्दै आएको छ ।
पछिल्लो समय सरकारले इजरायलमा केयर गिभर पठाउने भन्दै आवेदन आह्वान गरेको थियो । त्यसपछि फेरि ठगीका गिरोह सक्रिय बनेको पाइएको छ । वैदेशिक रोजगार विभागले आइतबार विज्ञप्ति नै जारी गरेर इजरायलमा केयर गिभर पठाउन आवेदन आह्वान गरेसँगै ठगी गर्ने गिरोह सक्रिय भएको भन्दै सचेत गराएको छ । इजरायलमा कामदार पठाइदिने भनी विभिन्न निकाय तथा व्यक्तिहरुले अनधिकृतरुपमा रकम असुली गरेको भन्ने जानकारी प्राप्त भएको विभागले उल्लेख गरेको छ ।
इजरायलमा म्यानपावर वा अन्य निजी क्षेत्रबाट कामदार पठाउने होइन । जिटुजी (सरकार–सरकारबीच) सम्झौताका आधारमा कामदार छनोट गरी पठाइन्छ । तर, सरकारले आवेदन आह्वान गरेको मौका छोपेर अनधिकृतरुपमा रकम असुल गरी सोझा व्यक्तिहरुलाई फसाउने गिरोह सक्रिय भएको बुझिन्छ । यो अत्यन्त खेदजनका कार्य हो । सरकारले यस्ता गतिविधि पूर्ण नियन्त्रण गर्ने र यसमा संलग्नहरुको पहिचान गरी कारबाहीको दायरामा ल्याउन प्रभावकारी कदम चाल्न आवश्यक छ । यसका लागि राज्यका सबै निकायहरुलाई परिचालन गर्नुपर्छ ।
मुलुकमा रोजगारीको अवसर नहुँदा युवाहरु विदेशिन बाध्य छन् । हजारौं युवाहरु राम्रो अवसरको खोजीमा रहेका छन् । इजरायल नेपालीहरुका लागि आकर्षक रोजगारीको गन्तव्य हो । किनभने त्यहाँ जाने कामदारले आकर्षक तलब पाउँछन् । त्यसैले इजरायल जान इच्छुक युवाहरु हजारौं छन् । यद्यपि, यही अवसरलाई उपयोग गर्न दलालीहरु सक्रिय बन्ने गरेका छन् ।
सरकारी प्रक्रियाबाट लैजाने कामदारलाई अनेक बहाना बनाएर पैसा असुल्ने दाउमा लागेकाहरुबाट इजरायल जान इच्छुक व्यक्तिहरु स्वयं पनि सचेत बन्न जरुरी छ । अन्यथा त्यस्ता गिरोहबाट ठगीमा पर्न सक्छ । पैसा त डुब्छ नै, रोजगारीका लागि इजरायल जानसमेत पाइँदैन । त्यसकारण सरकारले जारी गरेको आधिकारिक सूचनालाई मात्र आधार मान्नुपर्छ । सरकार तथा सरोकारवाला सबैले यसतर्फ वैदेशिक रोजगारीमा जाने तयारीमा रहेकाहरुलाई सचेत गराउनुपर्छ ।
