- भौतिक पूर्वाधारमन्त्री रघुवीर महासेठले बजेट गृहजिल्ला धनुषामा केन्द्रित गरेपछि संसद्मा आक्रोश
- करिब एक अर्ब ५० करोड रुपैयाँको बजेट धनुषा र मन्त्री महासेठको चुनाव क्षेत्रमा केन्द्रित
- राप्रपाका अध्यक्ष लिङ्देनले भौतिक मन्त्रालयको बजेट पुस्तिका नै संसद्को रोस्ट्रममै च्याते
काठमाडौं– प्रतिनिधिसभामा मंगलबार विनियोजन विधेयकमाथि छलफलको क्रममा भौतिक पूर्वाधार तथा यातायात मन्त्रालयबाट विनियोजित बजेटबारे सर्वाधिक असन्तुष्टि सुनियो । भौतिक पूर्वाधारमन्त्री हाल नेकपा एमालेका नेता रघुवीर महासेठ छन् । उनले मन्त्रालयको अधिकांश बजेट गृहजिल्ला धनुषा र उनकै दल एमालेका अध्यक्ष केपी शर्मा ओलीको गृहजिल्ला झापामा खन्याएको भन्दै सांसदहरूले आक्रोश पोखे ।
विपक्षी दल राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले त भौतिक मन्त्रालयको बजेट पुस्तिका नै संसद्को रोस्ट्रममा च्यातचुत पारे । असंसदीय गतिविधि हुने भन्दै धन्न च्यातचुत पारेको बजेट पुस्तिका भने फालेनन् । ‘जबदेखि भौतिक पूर्वाधार मन्त्रालयको यो पुस्तक हातमा प¥यो, त्यो दिनदेखि म यसरी तातिएको छु कि यो यसरी च्यातेर हु¥याउने मन छ,’ दुई टुक्रा बनाएको रातो किताब पोडियममा राख्दै उनले भने, ‘संसदीय मर्यादाविपरीत हुन्छ भनेर कहाँ हु¥याउनुपर्ने हो, त्यहाँ नहु¥याएर यहाँ राख्छु ।’
सांसद लिङ्देनले मन्त्रालयको बजेट पुस्तिका च्यातचुत पार्दा भौतिक पूर्वाधारमन्त्री महासेठ संसद् बैठकमै थिए । एकोहोरिएर लिङ्देनको व्यक्त आक्रोश र गतिविधि नियालिरहे । लिङ्देनले मन्त्री महासेठलाई बजेट कसैको बाउको सम्पत्ति नभएको पनि भन्न भ्याए । उनले भौतिक मन्त्रालयको बजेटलाई लिएर आक्रोश पोखिरहँदा विपक्षी बेञ्चमा रहेका सांसदहरूले ढ्याप ढ्याप पार्दै समर्थन गरे । सत्तापक्षका सांसदहरू भने मौन रहे ।
उनीभन्दा अघि बोलेका राप्रपाकै प्रमुख सचेतक ज्ञानेन्द्र शाहीले झापा र धनुषामा भौतिक मन्त्रालयको बजेट केन्द्रित गरेको भन्दै मन्त्री महासेठको आलोचना गरे । उनले कर्णालीलाई भौतिक मन्त्रालयको बजेटमा विभेद गरेको गुनासो गरे । यस्तै विभेद भइरहन्छ भने कर्णालीलाई नेपालबाट अलग पार्नेसम्मको अभिव्यक्ति दिए । उनको देशलाई खण्डित पार्नेसम्मको चेतावनीयुक्त अभिव्यक्तिमा पनि सांसदहरूले ढ्याप ढ्याप गरेका थिए ।
यी दुई सांसदभन्दा अघि–पछि बोलेका अधिकांश सांसदले पनि मन्त्री महासेठको विरोध गरे । बजेटको असन्तुलित वितरण भएको भन्दै मन्त्रीले आफ्नो चुनाव क्षेत्र मात्र नभई सिंगो देशको समानुपातिक ढंगको विकास गर्नेगरी बजेट वितरण गर्नुपर्ने बताए । तर, त्यस्तो नभएको भन्दै महासेठमाथि सांसदहरू खनिए । त्यस क्रममा कांग्रेस सांसद रामहरि खतिवडाले अन्य ठाउँको बजेट मन्त्री महासेठकै क्षेत्रमा हाल्न आग्रह गरे । ‘उहाँलाई पुग्दैन भने रु ५ थप्ने प्रस्ताव ल्याएको छ । यो पनि उहाँकै क्षेत्रमा हालियोस्,’ उनले पाँच रुपैयाँको नोट पोडियमै छाडे ।
अर्का कांग्रेस सांसद कान्छाराम तामाङले बजेट माग गर्दै आफूले दिएको निवेदन फिर्ता मात्र मागेनन्, लेटर प्याड छाप्दा लागेको खर्चसमेत फिर्ता मागे । कांग्रेसकै सांसद दिलेन्द्रप्रसाद बडुले दार्चुलाको खलंगा–तिंकर क्षेत्रको सडकमा बजेट नराखेको विरोधमा रोष्ट्रममै एक मिनेट मौनधारण गरे । एमालेका सांसद सूर्यबहादुर थापाले भालुवाङ–प्युठानको सडकमा बजेट नहालेको भन्दै स्वर्गद्वारी भ्रमणको निम्तो दिए ।
भौतिकमन्त्री महासेठले आगामी आर्थिक वर्ष २०८१÷८२ मा भौतिक पूर्वाधारका धेरै आयोजना गृहजिल्ला धनुषामा केन्द्रित गरेका छन् । उनले नियमितरुपमा रातो किताबमा परेर जानेबाहेक करिब एक अर्ब ५० करोड रुपैयाँको बजेट धनुषा र आफ्नो चुनाव क्षेत्रमा केन्द्रित गरेका हुन् । वैकल्पिक सहायक राजमार्ग विकास कार्यक्रमका दुई हजार ८२० आयोजनामध्ये ५५ भन्दा बढी धनुषामै राखेका छन् र ८५ करोडभन्दा बढी बजेट विनियोजन गरेका छन् ।
एक करोडका मात्रै ३४ आयोजना छन् । एक करोड ७१ लाख दरले १३ वटा आयोजनामा बजेट छ । एक करोड ६२ लाखका दरले पाँच वटा आयोजनाले पैसा पाएका छन् । स्थानीय सडक पुल कार्यक्रमका कूल ६५५ मध्ये ५६ वटा सडक पुलरपुलेसा धनुषामा निर्माण गर्न बजेट राखिएको छ । यसका लागि ३५ करोड आठ लाख रुपैयाँ बजेट विनियोजन भएको छ । रणनीतिक सडक पुल निर्माण तथा पुलेसा संरक्षण कार्यक्रमका २० वटा योजनामा लागि १८ करोड ६० लाख रुपैयाँ बजेट धनुषामै केन्द्रित गरेका छन् ।
