काठमाडौं– श्रम, रोजगार तथा सामाजिक सुरक्षामन्त्री डोलप्रसाद अर्यालले रोजगारीका लागि विदेश जानुपर्ने बाध्यकारी अवस्थाको अन्त्य गर्न आवश्यक रहेको बताएका छन् । बुधबार लुम्बिनी प्रदेशको बुटवलमा आयोजित दुईदिने श्रमाधान रोजगार मेलाको उद्घाटन गर्दै मन्त्री अर्यालले बर्सेनि श्रमबजारमा आएका युवालाई सरकारले रोजगारीका लागि विदेश जानुपर्ने अवस्थाको अन्त्य गरी स्वदेशमा नै रोजगारीको अवसर सिर्जना गराउन लागिपरेको बताएका हुन् ।
मन्त्री अर्यालले रोजगारदाता र श्रमिकबीचको खाडल पुर्न श्रमाधान रोजगार मेला आयोजना गरिएको बताए । रोजगारदाता र श्रमिकलाई एकै स्थानमा भेट गराउन श्रम मन्त्रालयले सातै प्रदेशमा श्रमाधान रोजागर मेलाको आयोजना गरेको उनले जानकारी दिए । ‘रोजगारदाताले दक्ष श्रमिक नपाएर विदेशबाट ल्याउनुपर्ने र श्रमबजारमा आएका युवाले रोजगारी नपाएर विदेश जानुपर्ने अवस्थाको अन्त्य गर्न आवश्यक छ,’ मन्त्री अर्यालले भने, ‘बेरोजगारी समस्या समाधानका लागि मेलाले महŒवपूर्ण भूमिका खेल्ने विश्वास छ ।’
मेलाबाट तत्कालै संख्या तोकेर रोजगारी दिने अवस्था नदेखिए पनि दीर्घकालसम्म नेपालका उद्योग प्रतिष्ठानमा आवश्यक पर्ने जनशक्तिको यथार्थ विवरण र रोजगारीका लागि चाहिने सीप विकासकाबारे महŒवपूर्ण जानकारी लिन सकिने मन्त्री अर्यालको भनाइ छ । मेलाबाट रोजगारदाता र श्रमिकबीच सम्बन्ध विस्तार हुने भएकाले यसलाई भरपूर प्रयोग गर्न पनि उनले आग्रह गरे ।
लुम्बिनी प्रदेश सरकारका आन्तरिक मन्त्रालयका सचिव लालबाबु कवारीले रोजगार मेलालाई रोजगारदाता र श्रमिकले एउटा अवसरको रुपमा लिन सक्ने बताए । उनका अनुसार यस मेलाले स्वदेशमा रोजगारी नपाएर विदेश पलायन हुनुपर्ने बाध्यात्मक अवस्थाको अन्त्य गर्न सहयोग पु¥याउने छ । कवारीले मेलाबाट तत्काल परिणाम नदेखिए पनि दीर्घकालमा उपलब्धिपूर्ण परिणाम दिने विश्वास व्यक्त गरे ।
बुटवल उपमहानगरपालिकाका प्रमुख खेलराज पाण्डेयले कस्तो विषय पढेमा वा सीप सिकेमा स्वदेशमा पढेर रोजगारी पाइन्छ भन्नेमा यो मेला बढी उपयोगी हुने भनाइ राखे । त्यस्तै लुम्बिनी प्रदेश उद्योग वाणिज्य संघका अध्यक्ष कृष्ण शर्माले रोजगारदाता कम्पनीले स्वदेशमा दक्ष श्रमिक नपाउने ठूलो समस्या रहेको र सिक्दै गरेकालाई दक्ष बनाएपछि विदेश पलायन हुने अवस्थाले आफूहरु समस्यामा परेको बताए ।
‘रोजगारदाताले आफूले चाहेजस्तो दक्ष जनशक्ति नपाएको र श्रमिकले पनि आफूले चाहेजस्तो रोजगारी नपाउने अवस्थाको अन्त्य गर्न रोजगार मेलाले शुभसंकेत दिएको छ, रोजगार दिने र रोजगारी चाहने दुवैको मिलन बिन्दु बनेको मेलाले स्वदेशमै केही गर्ने वातावरण सिर्जना गर्न सहयोग पुग्ने छ,’ उनले भने ।
श्रम मन्त्रालय, उद्योग, पर्यटन तथा सहकारी मन्त्रालय, बुटवल उपमहानगरपालिका र नेपाल उद्योग परिसंघ (सिएनआई) को संयुक्त आयोजनामा लुम्बिनी प्रदेशमा दुई दिनको रोजगार मेला सञ्चालन गरिएको छ । बुटवल अन्तर्राष्ट्रिय सम्मेलन केन्द्र (बिआइसिसी)मा जारी मेला आजसम्म चल्ने छ । मेलाले रोजगार खोज्ने, रोजगारदाता र विभिन्न क्षेत्रका सरोकारवालाहरूलाई एकै ठाउँमा ल्याएर कार्यक्रमले नेटवर्किङ र रोजगारीका लागि अनुकूल वातावरण सिर्जना गर्ने बताइएको छ ।
मेलाले बेरोजगार युवाहरूको ज्ञान, सीप, क्षमताका आधारमा माग संकलन गर्न सहयोग पुग्ने विश्वास लिइएको छ । मेलामा सरकारी निकाय तथा निजी क्षेत्रका ४१ वटा बुथ (स्टल) राखिएका छन् । यही जेठ १७ गते कोशी प्रदेशबाट सुरू भएको श्रमाधान रोजगार मेला वागमती प्रदेशको ललितपुरमा कार्यक्रम गरेपछि ३० जेठमा सम्पन्न हुने छ । यसबीचमा कोशी प्रदेशमा १७ र १८ गते, मधेस प्रदेशमा १९ र २० गते, गण्डकी प्रदेशमा २१ र २२ गते मेला सम्पन्न आयोजना गरिएको थियो ।
कर्णाली प्रदेशको सुर्खेतमा जेठ २५ र २६ गते, सुदूरपश्चिम प्रदेशको धनगढीमा जेठ २७ र २८ गते मेला सञ्चालन हुने छ । यता बागगती प्रदेशको ललितपुरमा जेठ २९ र ३० गते सञ्चालन गरेसँगै मेला सकिने श्रम मन्त्रालयले जनाएको छ ।
