मुलुकमा नेताहरुबीच विकासमा प्रतिस्पर्धा हुनुपर्ने हो । तर थरीथरीका नेताहरु अहिले एकापसमा द्वेषपूर्ण अभिव्यक्तिमा रमाउन थालेका छन् । दूरदराजमा सडक नपुगेर कयौं जनताले महँगो नुन खान बाध्य छन् । अस्पतालमा समयमा नआइपुग्दा कयौको ज्यान गइरहेको छ । ती स्थानमा सामान्य स्वस्थ्यचौकी नहुँदा उपचारको अभावमा सहर आइपुग्दा थुप्रै रकम खर्चन बाध्य हुन्छन् जनता ।
जनताले पत्याएर निर्वाचित गरेर पठाएका नेताको चुनावी प्रतिबद्धता हुन्छ, म पैसा कमाउन आएको हैन, जनताको समस्याको हल गर्न आएको हुँ । तर, जितेपछि नेताहरु ठीक उल्टो काममा लाग्छन् । उनीहरुको काम भनेकै कुरा गर्ने हो । कुरा पनि एकले अर्काको कुरा काटेर समय कटाउने । सत्ता गठबन्धन हेरफेर हुँदा सबैभन्दा उत्तेजक र उटपट्याङ मन्तव्य दिने नेतामा पर्छन् एमाले नेता केपी शर्मा ओली । उनको वाककलाकै कारण कतिपयले ‘उखाने बा’को उपनामसमेत भिराइसकेका छन् ।
उनै ओली अहिले काठमाडौं महानगरका मेयर बालेनविरुद्ध प्रतिवादमा उत्रिएका छन् । बालेन एमालेमाथि लगातार खनिन थालेपछि ओली आफैं प्रतिवादमा उत्रन थालेका हुन् । कुनैबेला माधव नेपाल, पुष्पकमल दाहालमाथि तथानाम भन्ने ओली अहिले बालेनको बोलीलाई अराजक भन्छन् ।
राजनीतिमा कांग्रेसका गगन थापा, विश्वप्रकाश शर्मा पुस्ता यसरी नै आफ्नै पार्टीका शीर्ष नेता वा विपक्षी नेतामाथि ‘हेट स्पिच’ दिएर अघि बढे । राष्ट्रिय स्वतन्त्र पार्टी (रास्वपा) यसरी नै उदाए । गृहमन्त्री रवि लामिछाने यसको उदाहरण हो । अहिले स्वतन्त्रबाट निर्वाचित भएकाहरु ओली, गगन, रविभन्दा एक कदम अघि बढेर हेट स्पिच दिन थालेका छन् । जसले गर्दा ओलीदेखि रविको माथ खराब हुन थालेको छ । उनीहरु अहिले यस्तो हेट स्पिच दिन नहुने भन्दै अनुशासनका कुरा सिकाउन थालेका छन् । आफूले गर्दा जे पनि ठीक, अरूले गर्दा जे पनि बेठीक । यस्तो राजनीति सिकाउनेहरु जनताबाट दण्डित त हुन्छन् नै ।
सहकारी प्रकरणमा आफ्नो पार्टीको चर्को स्वर गरी बचाऊमा उत्रिएको रास्वपा कांग्रेसमाथि खनिएको थियो, हेट स्पिचमार्फत नै । अहिले रास्वपा यति धेरै रक्षात्मक बनेको छ कि उनीहरुसँग बोल्ने कुनै आधार छैन । लामिछानेमाथि एकपछि अर्को झड्का अदालतबाट आउन थालेको छ । कांग्रेसको गगन पुस्ता पनि जनताबाट कुनै बेला दण्डित हुने क्रममा छ । ओली–गगनले सिकाएको अराजकता अब हत्तपत्त हराउने छाँट छैन । यस्तै अराजकताबाट नेताहरु चाँडोचाँडो उदाउने र छिटछिटो अस्ताउने क्रम जारी रहने छ । विकासमा हैन यस्ता द्वेषपूर्ण अभिव्यक्तिमा नेताहरुको प्रतिस्पर्धा दिनानुदिन बढ्नु भनेको जनतामा राजनीतिप्रति झन् वितृष्णा जगाउनु हो ।
-1752335779.jpg)
