नेपाली कांग्रेसले एमालेका अध्यक्ष केपी ओलीका विरुद्ध टार्जेट गरेर अराजनीतिक आरोप लगाइरहेको छ । कांग्रेसले यो आरोपप्रति सार्वजनिक रुपमा क्षमा माग्नुपर्छ ।
विष्णु पौडेल
उपाध्यक्ष, नेकपा एमाले
काठमाडौं– सरकारले आज आगामी आर्थिक वर्ष २०८१÷८२ को बजेट प्रस्तुत गर्दै छ । अर्थमन्त्री वर्षमान पुनले संघीय संसद्को संयुक्र बैठकमा दिउँसो १ बजे बजेट प्रस्तुत गर्ने कार्यतालिका छ । जेठ १५ गते बजेट ल्याउनुपर्ने संवैधानिक व्यवस्थाअनुसार सरकारले आजै बजेट प्रस्तुत गर्न लागेको हो ।
प्रमुख प्रतिपक्षी दल नेपाली कांग्रेससँग सहमति जुटिनसकेका कारण बजेट प्रस्तुत गर्ने कार्यक्रम बिथोलिने आशंका गरिएको छ । किनभने यतिबेला कांग्रेस सहकारी प्रकरणको मुद्दालाई लिएर आन्दोलित छ । सदन निरन्तर अवरुद्ध पार्दै आएको कांग्रेसले सरकारलाई दबाब दिन आइतबारदेखि सडक आन्दोलनसमेत थालेको छ । कांग्रेसको माग हो– उपप्रधान तथा गृहमन्त्री रवि लामिछाने सहकारीको रकम अपचलनमा संलग्न भएकाले उनीमाथि अनुसन्धान गर्न संसदीय छानबिन समिति गठन हुनुपर्छ । यस विषयमा प्रधानमन्त्री पुष्पकमल दाहाल पनि लचक देखिन्छन् । तर एमाले भने लामिछानेको पक्षमा बलियोसँग उभिएको देखिन्छ ।
यसले प्रमुख प्रतिपक्ष कांग्रेस सरकारसँग भड्किँदै गएको छ । एमाले अध्यक्ष केपी शर्मा ओली संसद्मा वातावरण बिगार्न लागिपरेको देखिन्छ । यसअघि जेठ ३ गते यस्तै भयो । अघिल्लो दिन ओलीले सदनमा कांग्रेसको प्रतिकार गर्ने अभिव्यक्ति दिएका थिए । नभन्दै जेठ ३ गते कांग्रेसले रोस्ट्रम घेराउ गर्दा ओली आफैं उठेर कांग्रेसको प्रतिकार गर्न कस्सिए ।
सरकार अहिले केही ‘ब्याक’ भएर सहकारी प्रकरण छानबिनका लागि समिति गठनको चरणमा छ । जेठ ५ गते कानुनमन्त्री पदम गिरीको संयोजकत्वमा कार्यादेश (टिओआर) कार्यदल गठन भयो । कार्यदलले समिति बनाउन टिओआर टुंग्याउन पटक–पटक बैठक राख्यो । तर टिओआरमा सत्तापक्ष पुरानै अडानमा छ भने कांग्रेसले पनि आफू ‘ब्याक’ नहुने संकेत देखाएको छ । समिति बन्दा गृहमन्त्री लामिछानेको नाम तोकिनुपर्ने कांग्रेसको माग हो भने व्यक्तिको नाम तोकिनै हुन्न भन्ने अडान सत्तापक्षको । कार्यदलले कुनै टुंगो लगाउन नसकेपछि यो विषय अहिले शीर्ष नेताको जिम्मामा आइपुगेको छ ।
शीर्ष नेताका तहमा आइपुग्दा कहिले ओली पुग्दैनन् कहिले देउवा । योबीचमा सत्तापक्षले आग्रहलाई स्वीकार्दै कांग्रेस लचक बन्दै आयो । गृहमन्त्री लामिछानेले आफूमाथि लागेको आरोपबारे प्रस्टीकरण दिए । प्रधानमन्त्री दाहालले चौथोपटक विश्वासको मत लिए । तर कांग्रेसको मागमा भने सरकारले अझै पनि सुनुवाइ गरेको छैन । सरकार यतिबेला कांग्रेसलाई पेलेरै अघि बढ्ने मुडमा देखिन्छ ।
संविधान सँगै बसेर लेखेका हौं । उहाँले गलत आरोप लगाउने छुट छ भने सही प्रतिवाद गर्ने छुट कांग्रेसलाई पनि छ । किनकि यो उत्तर कोरिया होइन, नेपाल हो ।
विश्वप्रकाश शर्मा
महामन्त्री, नेपाली कांग्रेस
यही विषय बजेट प्रस्तुत गर्ने दिनसम्मै मिल्न सकेको छैन । सत्तापक्षले कांग्रेसलाई संयमता अपनाउन आग्रह गरेको छ । ‘कांग्रेसले सोच्नुपर्ने हुन्छ । यस्ता खालका होहल्ला र नाराबाजी कांग्रेसले गर्ने छैन । सरकारलाई संवैधानिक बाध्यता छ जेठ १५ मै बजेट ल्याउनुपर्ने । हाउसको गतिरोध अन्त्यका लागि कांग्रेसले सोचोस्,’ एमाले प्रमुख सचेतक महेश बर्तौलाले भने ।
यता कांग्रेसले आजै ११ बजे संसदीय दलको बैठक डाकेको छ । बजेट प्रस्तुतिमा अवरोध गर्ने वा नगर्ने विषयमा छलफल गर्न बैठक डाकिएको कांग्रेसले जनाएको छ । यसअघि कांग्रेसले विपक्षी दलहरुसँग पनि छलफल गर्ने कार्यतालिका रहेको छ । बिहान १० बजे संसद् भवनमा विपक्षी दलहरुको बैठक बस्ने कांग्रेसले जनायो । सभामुख देवराज घिमिरेले बजेट प्रस्तुतिका लागि दिउँसो १ बजे राष्ट्रिय सभा र प्रतिनिधिसभाको संयुक्त बैठक आह्वान गरेका छन् । बैठक सुरु हुनुभन्दा १५ मिनेटअघि नै प्रतिनिधिसभामा प्रवेश गरिसक्न सभामुखले सांसदहरुलाई निर्देश गरेका छन् ।
वातावरण बिथोल्न उद्दत एमाले
गिरिबन्धु टी स्टेटको जग्गा हिनामिना प्रकरणमा अध्यक्ष ओलीमाथि प्रश्न उठेपछि एमाले झन्झन् उत्तेजक बन्दै गएको छ । यस विषयमा ओलीले गिरिबन्धु टी स्टेटको जग्गा कांग्रेसले बेचेको उल्टै आरोप लगाए । त्यसपछि कांग्रेस एमालेमाथि आक्रामक बन्दै गएको छ । उसले सहकारी प्रकरणमा लामिछानेमाथि मात्रै हैन, गिरिबन्धु टी स्टेटमा ओलीमाथि पनि छानबिन हुनुपर्ने माग अघि सारेको छ ।
यसले एमाले झनै उत्तेजक बनेको छ । बजेट ल्याउनअघि जुट्न लागेको सहमति एमालेकै कारण भाँडिने सम्भावनासमेत बढेको कांग्रेस नेताहरु बताउँछन् । सोमबार एमाले उपाध्यक्ष विष्णु पौडेल बालुवाटारमा ओली शैलीमै उत्रिए । शीर्ष नेताको बैठकमा सहमति नजुटेपछि पौडेल कांग्रेसमाथि खनिए । ‘नेपाली कांग्रेस कुनै सहमतिको पक्षमा छैन भन्ने कुरा पछिल्ला घटनाक्रमहरूले संकेत गरिरहेका छन् । अनुचित र पूर्वाग्रह आरोप लगाउँदै राष्ट्रिय राजनीति बिथोल्न लागेको छ । पछिल्ला दिनमा एमालेका अध्यक्षविरुद्ध प्रायोजित, भ्रामक, पूर्वाग्राही, गलत, प्रतिशोधपूर्ण आधारहीन लञ्छना लगाउँदै हिँडेको छ ।
यस्तो लाञ्छनाबाट पछि हट्न मेरो आग्रह छ । कांग्रेसले आफ्नो अभिव्यक्ति फिर्ता लिँदैन भने हामी राजनीतिकरुपमा प्रतिवादमा उत्रिन्छौं,’ पौडेलले भने, ‘नेपाली कांग्रेसले एमालेका अध्यक्ष केपी ओलीका विरुद्ध टार्जेट गरेर अराजनीतिक आरोप लगाइरहेको छ । कांग्रेसले यो आरोपप्रति लिखितरुपमा क्षमा माग्नुपर्छ । सार्वजनिक रुपमा माफी माग्नुपर्छ । नभए कांग्रेससँग हाम्रो सम्बन्ध ठीक ढंगले अगाडि बढ्दैन ।’
कांग्रेस महामन्त्री विश्वप्रकाश शर्मा भने एमालेसँग आफूहरु प्रतिवादमा उत्रन बाध्य हुने बताए । ‘संविधान सँगै बसेर लेखेका हौं । उहाँले गलत आरोप लगाउने छुट छ भने सही प्रतिवाद गर्ने छुट कांग्रेसलाई पनि छ । किनकि यो उत्तर कोरिया होइन, नेपाल हो,’ शर्माले भने ।
