देशमा दिनानुदिन बेरोजगार बढ्दै गएको तथ्य खोज्न अन्त कतै जानुपर्दैन । प्रहरी चौकीमा आफू ठगिएको भन्दै निवेदन दिन पुगेका युवाहरुको संख्या हेरे पुग्छ । उनीहरुको अनुहारमा दौडिएका निराशा हेर पुग्छ । देश कतिखेर छाडौं भनेर हतारिएका ताँती त्यही पनि देखिन्छन् ।
युरोप, अमेरिका पठाइदिन्छु भन्दै यस्तै हतारिएका युवाहरुलाई पासो थाप्नेहरुको कमी छैन । राम्रो कमाइको खोजीमा रहेका युवाहरु यस्तै पासो थाप्नेहरुको ट्र्यापमा पर्छन् । आफू ठगिएको थाहा पाएपछि बल्ल होसमा आउँछन् र प्रहरीकहाँ पुग्छन् । सरकारको अनदेखाका कारण ठगिएकाहरु आफैलाई दोष दिँदै पश्चताप गरिरहेका भेटिन्छन् ।
अहिले प्रहरीलाई यस्तै ठगीका केस सुल्झाउन भ्याइनभ्याइ छ । वैदेशिक रोजगारीमा पठाइदिने भन्दै लाखौं उठाउनेहरुलाई पक्रन प्रहरीको टोली नै खट्नुपरेको छ । ऋण काढेर ल्याएका धन ठगीको फन्दामा पर्नु निकै दुःखदायी घटना हो । यस्ता घटना बढेपछि श्रम, रोजगार तथा सामाजिक सुरक्षा मन्त्रालयले वैदेशिक रोजगारीको नाममा ठगी बढ्दै गइरहेको भन्दै सचेत रहन आग्रह गरेको छ । युरोप, अमेरिका, जापान, कोरिया, इजरायललगायतका मुलुकमा रोजगारीका लागि पठाउने भन्दै भइरहेको ठगीप्रति गम्भीर ध्यानाकर्षण भएको सोमबार मन्त्रालयले जनाएको हो ।
श्रम मन्त्रालय जुन देशमा व्यवस्थित रोजगार सिर्जना गर्नुपर्ने जिम्मेवार मन्त्रालय हो । तर, देशमा अवसर नदेखिएपछि श्रम स्वीकृति दिँदै युवालाई विदेश लखेट्ने मन्त्रालयका रुपमा परिचित छ यो मन्त्रालय । यस्ता ठगीमा मन्त्रालय आफैं अघि बढेर कडा कारबाही गर्नुपर्ने हो । तर, मन्त्रालय एउटा विज्ञप्ति जारी गर्छ, वैदेशिक रोजगारीलाई सुरक्षित, मर्यादित, पारदर्शी र व्यवस्थित गराउन आवश्यक नीतिगत, कानुनी एवं संस्थागत प्रबन्ध गर्ने भन्छ । अनि चुप लागेर बस्छ ।
सरकारले व्यवस्थित र दर्ता गरेका संस्थाहरुमाथिमात्र कारबाहीको दण्ड वर्षाउने चेतावनी दिन्छ । नियमनमा खासै ध्यान दिँदैन । नेपाली युवालाई श्रम स्वीकृति दिनेबाहेक श्रम मन्त्रालय आफैं काम नपाएर बेरोजगार छ । सरकारीस्तरबाट आएका मागहरुमा सरकारले आफ्नै निकटहरुलाई पठाउँछ भने कतिपय रोकेर राख्छ । जसका कारण युवाहरु उचित र सुरक्षित रोजगारीमा पुग्न पाउँदैनन् । यसकारण पनि जोखिमै मोलेर दलालमार्फत युरोप, अमेरिका जाने बाटो खोज्छन् । यही क्रममा उनीहरु ठगिन्छन् । ठगिएका युवालाई रोजगारीको बाटो देखाउने र ठगिएको रकम फिर्ता गराउने तदारुकता श्रम मन्त्रालयले देखाउनैपर्छ । यस्तो विषयमा जिम्मेवार बन्नैपर्छ । विज्ञप्ति जारी गरी पन्छिन मिल्दैन ।
a
