प्रतिनिधिसभामा कुनै दलको बहुमत छैन । जसकारण पनि दिनहुँजसो दलका शीर्ष नेताहरु सरकारको नेतृत्व थुत्ने योजना बनाउन तल्लीन छन् । २०७९ मंसिरको निर्वाचन यता प्रधानमन्त्रीबाहेक अरू मन्त्रीहरु तीनपटक परिवर्तन भइसकेका छन् । यसपटक सत्ताको नेतृत्व नै फेर्ने प्रयास भइरहेको छ । यो खेलमा साना दल चेपुवामा परेका छन् ।
नागरिक उन्मुक्तिजस्तो सानो दललाईसमेत फुटाउने कोसिस भए पनि यो दल फुटबाट जोगिएको छ । तर, संसद्को सातौं ठूलो दल जनता समाजवादी पार्टी (जसपा) नेपाल भने औपचारिक रुपमा फुटेको छ । यो फुटसँगै अरू दल पनि फुट्न सक्ने सम्भावना देखिन्छ ।
दलहरु एकले अर्कोलाई आफ्नो शक्ति देखाउन पार्टी फुटाउन लागिपरेका छन् । कोही मन्त्री नपाएको झोंकमा पार्टी फुटाउन लागिपरेका छन् । देश संघीयतामा गएपछि यति धेरै अस्थिरता सायद पहिलोपटक यसपालि देखिँदै छ । ठूला दलका नेताहरुलाई संघीयता पचेको देखिँदैन । उनीहरु विभिन्न बहानामा धर्मनिरपेक्षता र प्रदेश खारेजीको अभियानमा लागेको देखिन्छ ।
राजनीतिक बेइमानी प्रदर्शन गरेर दलहरु संघीयता विफल पार्ने खेलमा लागेको कतिपयको भनाइ छ । नेपाली कांग्रेस र नेकपा एमाले प्रतिनिधिसभामा पहिलो र दोस्रो दल हुन् । यी दुई दल सत्तापक्ष र प्रतिपक्षको ‘म्युजिकल चेयर’मा छन् । एउटा दल प्रतिपक्षमा आउनासाथ सत्ता ढाल्ने खेल सुरु भइहाल्छ । पहिलोपटक एमालेको साथ पाएर माओवादी केन्द्रका अध्यक्ष पुष्पकमल दाहाल प्रधानमन्त्री बनेका थिए । तर, केही समयमा दाहाल नेतृत्वको सरकारमा कांग्रेसको इन्ट्री भयो । कांग्रेस सरकारमा जानसाथ एमाले पुनः सरकार ढाल्ने खेलमा लाग्यो । कांग्रेस एक वर्ष पनि सरकारमा बस्न नपाउँदै एमालेले कांग्रेसको ठाउँ कब्जा ग¥यो । अहिले फेरि कांग्रेस जसरी पनि सत्ता ढाल्ने खेलोमा छ ।
नेपाली कांग्रेसका सभापति शेरबहादुर देउवा जसरी पनि आफ्नो नेतृत्वमा सरकार बनाउनुपर्ने अडानमा छन् । यसका लागि उनले आफ्ना दलका नेताहरुलाई खटाएका छन् । तर देउवा असफल हुँदै आएका छन् । उनको योजना असफल पार्न एमाले अध्यक्ष केपी शर्मा ओलीले विभिन्न तिकडम गर्दै आएको देखिन्छ । यसको पछिल्लो उदाहरण हो जसपा फुट । पार्टी अध्यक्ष उपेन्द्र यादव अमेरिका घुम्न गएको मौका पारी ओलीले जसपा फुटाएको बताइन्छ । यसरी जनताका लागि हैन, सत्ता र आफ्ना लागि दलहरुले धमाधम दल फुटाउने र मन्त्री ‘अफर’ स्वीकार गर्न थालेका छन् । के यसरी नै दलहरुले राजनीतिक अस्थिरता मच्चाएर फेरि चुनावोन्मुख राजनीति गर्न लागेका हुन् ?
