- गत निर्वाचनमा इलाम २ मा ५९.७८ मतदान भएकोमा यसपटक ५७.४४ मात्र मतदान
- बझाङको प्रदेश १ मा गत निर्वाचनमा ५२.९८ मतदान भएकोमा यसपटक ४९.१२ मा सीमित
- डा. बाबुराम भट्टराईको नेपाल समाजवादी पार्टीले बझाङको उपनिर्वाचनमा ‘राइट टु नो भोट’ को नीति अपनाउने निर्णय गरेको थियो
काठमाडौं– इलाम क्षेत्र नम्बर २ को प्रतिनिधिसभा र बझाङ प्रदेश १ को उपनिर्वाचनमा मतदान गर्नेको संख्या अघिल्लोपटकभन्दा घटेको छ । इलाममा करिब दुई प्रतिशत बिन्दु र बझाङमा करिब चार प्रतिशत बिन्दु कम मतदान भएको निर्वाचन आयोगले जनाएको हो । ‘समग्रमा हेर्दा इलाममा दुई र बझाङमा तीन प्रतिशत बिन्दुले घटेको छ,’ आयोगका सचिव रविलाल पन्थले भने ।
यसको कारण मतदाता नामावली आद्यवधिक नभएको र नाम भएकाहरु मतदानमा सहभागी नभएको हुनसक्ने पन्थले अनुमान गरे । गत निर्वाचनमा इलाम–२ मा ५९.७८ प्रतिशत मतदान भएकोमा यसपटक ५७.४४ मात्र मतदान भयो । बझाङको प्रदेश १ मा गत निर्वाचनमा ५२.९८ मतदान भएकोमा यसपटक ४९.१२ मा सीमित रह्यो ।
डा. बाबुराम भट्टराईको पार्टी नेपाल समाजवादी पार्टीले बझाङको उपनिर्वाचनमा मतदान नगर्ने निर्णय गरेको थियो । पार्टीको सचिवालय बैठकले बझाङको उपनिर्वाचनमा ‘राइट टु नो भोट’ को नीति अपनाउने निर्णय गरेको थियो । नेपाल समाजवादी पार्टीले उपनिर्वाचनमा इलाम–२ मा भने पहिचानवादी उम्मेदवार डकेन्द्रसिंह थेगिमलाई सघाउने निर्णय गरेको थियो ।
निर्वाचन क्षेत्र गत निर्वाचन यसपटक
इलाम प्रतिनिधिसभा–२ ५९.७८ ५७.४४
बझाङ प्रदेशसभा–१ ५२.९८ ४९. १२
गत निर्वाचन र शनिबारको उपनिर्वाचनमा भएको मतदान प्रतिशतमा । स्रोतः निर्वाचन आयोग
उपनिर्वाचन शान्तिपूर्ण, नतिजा १२ घण्टामा आउने
इलाम र बझाङ दुवै क्षेत्रमा उपनिर्वाचन शान्तिपूर्ण भएको आयोगले जनाएको छ । इलाममा उपनिर्वाचन शान्तिपूर्ण, उत्साहजनक र सौहाद्र्रपूर्ण वातावरणमा सम्पन्न भएको प्रमुख जिल्ला अधिकारी इन्द्रदेव यादवले बताए ।
उनका अनुसार मतपेटिका गणनास्थलमा आउन सुरु भइसकेको छ । इलाममा इलाम नगरपालिकाको गौतमबुद्ध सभागृहमा मतगणना गरिने कार्यक्रम छ । यहाँ एक लाख १५ हजार ८८९ मतादाता थिए । २०७९ मंसिर ४ गते सम्पन्न प्रतिनिधिसभा सदस्य निर्वाचनमा इलाममा ५७.४४ प्रतिशत मतदान भएको थियो । मतपेटिका मतगणनास्थलमा ल्याइसकेपछि राजनीतिक दल तथा उम्मेदवार सर्वपक्षीय सहमतिपछि मतगणना प्रारम्भ गरिने छ ।
२०७९ मंसिर ४ को प्रतिनिधिसभा निर्वाचनमा इलाम–२ बाट निर्वाचित नेपाल कम्युनिस्ट पार्टी एमालेका उपाध्यक्ष सुवासचन्द्र नेम्बाङको निधनपछि रिक्त उक्त निर्वाचन क्षेत्रमा उपनिर्वाचन भएको हो । उपनिर्वाचनमा १२ राजनीतिक दलका र सात स्वतन्त्रसहित १९ जना चुनावी प्रतिस्पर्धामा छन् ।
गत निर्वाचनमा नेम्बाङले कांग्रेसका डम्बरबहादुर खड्कालाई ११४ मतको झिनो अन्तरले पराजित गरेका थिए । एमाले र कांग्रेसजस्ता ठूला र अनुभवी दलसँगै राष्ट्रिय स्वतन्त्र पार्टी (रास्वपा) जस्ता भर्खर जन्मिएका दलका उम्मेदवार पनि प्रतिस्पर्धामा छन् । यहाँ कांग्रेसबाट खड्का, एमालेबाट सुवासपुत्र सुहाङ, रास्वपाबाट मिलन लिम्बू मैदानमा छन् ।
यो क्षेत्रमा पहिचानवादी मुद्दा पेचिलो छ । पहिचानवादी पक्षका स्वतन्त्र उम्मेदवारसमेतको प्रतिस्पर्धाले चुनाव थप रोचक बनेको छ । मुढा चुनाव चिह्न लिएर डकेन्द्र थेगिम मैदानमा छन् । इलामको उपनिर्वाचनलाई नेपाली राजनीतिका शीर्ष नेतृत्वले समेत प्रत्यक्ष चासो दिएका छन् ।
बझाङमा आजबाट मतगणना
बझाङ प्रदेशसभा १ मा आजबाट मात्र मतगणना हुने भएको छ । केही क्षेत्रको मतपत्र हवाईस्थलबाट ल्याउनुपर्ने भएकोले आज १० बजेबाट मात्र मतगणना गरिने आयोगले जनाएको हो । ‘मतपेटिका मतगणनास्थल बझाङ जिल्ला अदालत चैनपुरमा हवाईमार्गबाटसमेत ढुवानी गर्नुपर्ने भएकोले मिति २०८१ वैशाख १६ गते १० बजेभित्र ढुवानी भइसक्ने गरी आवश्यक व्यवस्था मिलाइएको छ । साइपाल गाउँपालिकाका तीन स्थानका मतपेटिका नेपाली सेनाको हेलिकप्टरबाट जिल्ला सदरमुकामसम्म ल्याउने व्यवस्था गरिएको छ,’ आयोगले भन्यो ।
बझाङमा ३० हजार ३२८ मतदान भएको मुख्य निर्वाचन अधिकृत सुदर्शन लामिछानेले जानकारी दिए । उनका अनुसार जिल्लामा ६१ हजार ७४८ मतदाता छन् । जिल्लाका ७४ वटा मतदानस्थल र ९३ केन्द्रमा मतदान शान्तिपूर्ण रूपमा सम्पन्न भएको लामिछानेले बताए । उनका अनुसार प्रदेशसभा सदस्यका लागि विभिन्न राजनीतिक दलका ११ उम्मेदवार प्रतिस्पर्धामा छन् ।
नेकपा एमालेबाट दमनबहादुर भण्डारी, नेपाली कांग्रेसबाट अभिषेकबहादुर सिंह, नेकपा माओवादी केन्द्रबाट जनकबहादुर बुढा, राष्ट्रिय प्रजातन्त्र पार्टीबाट किशोरकुमार खड्का, नेकपा एकीकृत समाजवादीबाट दिलबहादुर सिंह प्रतिस्पर्धामा छन् ।
