गोरखा– गोरखाको बारपाक केन्द्रबिन्दु भएर गएको विनासकारी गोरखा भूकम्पको बुधबार नौ वर्ष भएको छ । २०७२ वैशाख १२ गते बिहान ११ बजेर ५६ मिनेटमा गएको ७.८ रेक्टर स्केलको विनासकारी भूकम्पले गोरखा जिल्लामा मात्र ४७१ जनाले ज्यान गुमाएका थिए । भूकम्पबाट गोरखासहित १४ जिल्ला अतिप्रभावित बन्यो भने देशभरका ३१ वटा जिल्लामा गोरखा भूकम्पले क्षति पुर्यायो ।
भूकम्प गएको नौ वर्षमा जिल्लाभित्र अधिकांश निजी आवास, सरकारी कार्यालय, स्वास्थ्य कार्यालय भवन, विद्यालय तथा प्रमुख पुरतात्विक भवन निर्माणको काम लगभग सम्पन्न भए पनि भूकम्पको केन्द्रबिन्दु बारपाकमै केही भूकम्पपीडित अस्थायी टहरामै छन् । बारपाक सुलिकोट गाउँपालिका–१, स्थित दलितबस्तीका भूकम्पपीडित अझै पनि अस्थायी टहरामा बसिरहेको वडा सदस्य लक्ष्मी विकले जानकारी दिइन् ।
साविकको बस्ती जोखिमयुक्त रहेकाले अन्य स्थानमा घर बनाउन जग्गा नपाउँदा दलित समुदायका परिवार अस्थायी टहरामा बस्नुपरेको उनले बताइन् । ‘गैह्रागाउँका १५ घरभन्दा बढी दलित परिवारले भूकम्पपछि घर बनाउन पाएका छैनन्,’ विकले भनिन्, ‘जोखिमपूर्ण रहेकाले पुरानो ठाउँमा घर बनाउन नमिल्ने भएपछि उनीहरु अहिले सरकारी जग्गामा आश्रय लिइरहेका छन् ।’
अस्थायी टहरामा रहेकामध्ये कतिपयको साविक स्थानमा घर बनाउने चाहना र कतिपयले सुरक्षित स्थानमा सरेर घर बनाउन चाहे पनि घडेरीको अभावका कारण समस्या भएको उनको भनाइ छ । ‘गैह्रागाउँलार्ई सरकारले जीवित संग्रहालय बनाउने निर्णय गरेको थियो,’ विकले भनिन्, ‘त्यहाँका केही स्थानीयवासीले जग्गा दिन नमानेपछि त्यहाँ संग्रहालय बन्ने सकेन त्यसपछि समस्या भयो ।’
स्मृति उद्यानको काम अलपत्र
भूकम्पको केन्द्रबिन्दु बारपाकमा निर्माण गर्न लागिएको भूकम्प स्मृति उद्यानको कामसमेत अझै सम्पन्न हुन सकेको छैन । गोरखा भूकम्पमा परेर देशभरका आठ हजार ९७९ जनाले ज्यान गुमाए भने २२ हजार ३०९ जना घाइते भएको तथ्यांकमा उल्लेख छ । भूकम्पमा परेर ज्यान गुमाएकाको सम्झनामा केन्द्रबिन्दु बारपार्कमा भूकम्प स्मृति उद्यान निर्माण गर्न लागिएको छ । तर अहिलेसम्म पनि स्मृति उद्यानको काम सम्पन हुन नसकेको संघीय आयोजना कार्यान्वयन एकाइ पोखराका इञ्जिनियर पुरुषोत्तम पंगेनीले जानकारी दिए ।
‘पूर्वाधार निर्माणको काम त करिब ९८ प्रतिशत नै सकिएको छ,’ उनले भने, ‘स्मृति उद्यानमा राख्नका लागि भूकम्पमा परेर ज्यान गुमाएका व्यक्तिको नामावली प्राप्त नहुँदा उद्यान निर्माणको काम सम्पन्न हुन सकिरहेको छैन ।’ उद्यान निर्माणका क्रममा गोरखा भूकम्पमा परेर ज्यान गुमाएका सबैको नाम स्मृति उद्यानमा ताम्रापत्रमा लेखेर राख्नेगरी सम्झौता भएको उनको भनाइ छ । उद्यानमा भूकम्पमा परी निधन भएका १४ वटै जिल्लाका मृतकको छुट्टाछुट्टै स्तम्भ रहने छ ।‘अब
ताम्रापत्रमा भूकम्पमा ज्यान गुमाएकाको नाम लेख्न बाँकी रहेको छ,’ इञ्जिनियर पंगेनीले भने, ‘गृह मन्त्रालयलाई नाम उपलब्ध गराउन भने पनि गृहले अहिलेसम्म नाम उपलब्ध नगराएकाले काम रोकिएको हो ।’ स्मृति उद्यानमा स्तम्भ मण्डला निर्माणमा गरिएको छ भने मण्डलामा चिप्स राख्ने, रङरोगन गर्नेलगायतका कामसमेत सम्पन्न भइसकेको इञ्जिनियर पंगेनीले बताए ।
त्यस्तै उद्यानसम्म पुग्नका लागि ४०० मिटर सडक कालोपत्र गरिएको, वाल निर्माण, क्यानटिन पार्क निर्माण, टिकट काउन्टर निर्माणको काम सम्पन्न भइसकेको छ । पार्कमा दुई शौचालय, एक चमेना गृह, पार्किङस्थलसमेत निर्माण गरिएको इञ्जिनियर पंगेनीले जानकारी दिए । सरकारी स्वामित्वको झण्डै २१६ रोपनी क्षेत्रफलमा स्तम्भ, बगैँचालगायतका अन्य आवश्यक संरचना निर्माण गरिएको उनले बताए ।
तोकिएको समयमा काम नहुँदा कार्यालयले ठेकेदार कम्पनीलाई पाँचपटक म्याद थप गरेर काम गरेको इञ्जिनियर पंगेनीले बताए । निर्माणमा ढिलाइ हुँदा पार्क निर्माण सम्पन्न गर्न सुरुमा १३ करोड छ लाख ३४ हजार रुपैयाँमा ठेक्का सम्झौता गरिएको भए पनि पुनः परिमार्जित सम्झौताअनुसार लागत १५ करोड ५१ लाख ७५ हजार रुपैयाँ पुगेको आयोजना कार्यालयले जनाएको छ ।
‘उद्यान निर्माणको काम लगभग सकिएको छ । भूकम्पमा परेर ज्यान गुमाएका सबैको नाम ताम्रापत्रमा लेखेर राख्नेगरी सम्झौता भएको थियो,’ उनले भने, ‘हामीले गृह मन्त्रालयसम्म अनुरोध गरिरहेका छौं ।’ कार्यालयले भूकम्प स्मृति उद्यान निर्माणका लागि २०७४ मंसिर १४ गते स्वच्छन्द÷होम निर्माण जेभीसँग ठेक्का सम्झौता गरेको थियो । सम्झौताअनुसार ३० महिनामा काम सम्पन्न गर्ने भनिए पनि ढिलो गरी भर्खरै मात्र भौतिक संरचना निर्माणको काम सम्पन्न भएको उनले बताए ।
इपिसेन्टरलाई पहाडको सहर बनाउने सपना
बारपाक सुलिकोट गाउँपालिका अध्यक्ष विष्णुप्रसाद भट्टले भूकम्पपछि एउटा गाउँको रुपमा रहेको बारपाक अहिले पहाडको नयाँ सहरको रुपमा स्थापित हुन लागेको बताए । ‘भूकम्पपछि बारपाकको प्रचारमा पनि फरक भयो,’ उनले भने, ‘भूकम्पले धेरै घर ध्वस्त थिए, भूकम्प पछाडि बारपाक कस्तो बन्यो होला भन्ने धेरै मान्छेहरुलाई चासो हुनु स्वाभाविक नै थियो, त्यसकारण पनि बाहिरका मानिसहरु बारपाक हेर्न र घुम्न आउने क्रम बढ्दै गएको छ ।’
अध्यक्ष भट्टले बारपाकमा बन्न लागेको भूकम्प स्मृति उद्यानले भूकम्पको केन्द्रबिन्दु बारपाकमात्र नभएर गोरखा भूकम्पको अध्ययन र अवलोकन गर्ने अवसरसमेत प्रदान गर्ने बताए । ‘स्मृति उद्यानसँगै हामीले संग्रहालय बनाउने योजना पनि छ,’ उनले भने, ‘संग्रहालयमा भूकम्प बेलाको चित्र, तस्बिर, भूकम्पका बेलाका भिडियोसहित त्यसबेलाको अवस्थालाई जीवन्त झल्काउने प्रयास पनि गर्नेछौं ।’
स्मृति उद्यान र संग्रहालयमार्फत गाउँपालिकाले नेपालभरका नागरिकलाई बारपाकमा पर्यटकको रुपमा भित्र्याएर विपद्बाट बच्न र सतर्कता अपनाउन शिक्षा पनि दिन चाहेको अध्यक्ष भट्टले बताए । ‘भूकम्पपछि पुनर्निर्माणको काम लगभग अन्तिम अवस्था आइसकेको छ,’ उनले भने, ‘बारपाकमा गल्लीलाई व्यवस्थित गर्ने पनि हाम्रो तयारी छ, ढल व्यवस्थापन, खानेपानीको आयोजनालाई व्यवस्थापन गर्दै बारपाकलाई नयाँ पहाडी सहरको रुपमा स्थापित गर्ने तयारी गरिरहेका छौं ।’ रासस
