काठमाडौं– सामाजिक अभियान सञ्चालन गर्ने उद्देश्यका साथ स्थापना भएको ‘म्हेन्दोला फोले फाउण्डेसन’ औपचारिक रुपमा सञ्चालनमा आएको छ । फाउण्डेसनको मंगलबार बागमती प्रदेशका सांसद एवं पूर्वमन्त्री तीर्थबहादुर लामाले उद्घाटन गरेका हुन् ।
जमलस्थित राष्ट्रिय नाचघरमा आयोजित समारोहमा फाउण्डेसनको आधिकारिक वेबसाइट ‘म्हेन्दोलाफोले डट ओआरजी’समेत सार्वजनिक गरिएको छ ।‘म्हेन्दोला फोले’ (फूलको थुँगा) नामक टेलिभिजन कार्यक्रमलाई फाउण्डेसनमा रुपान्तरण गरिएको फाउण्डेसनका अध्यक्ष सुनिल लामाले जानकारी दिए ।
एनटिभी प्लसमा २०६२ सालदेखि सञ्चालनमा आएको उक्त कार्यक्रम हाल बन्द रहे पनि पोडकास्टको रुपमा निरन्तरता दिइएको उनले बताए ।फाउण्डेसनले समाजमा शिक्षा, स्वास्थ्यलगायत विविध क्षेत्रमा सहयोग गर्ने लक्ष्य लिएको छ । विश्वभरबाट सहयोग जुटाएर आवश्यक क्षेत्रमा काम गर्ने अध्यक्ष लामाले बताए ।
‘विश्वभर छरिएर रहेका स्रोत, साधनलाई एकीकृत गरी समुदायको उत्थानका लागि परिचालन गर्न एक सामाजिक संस्थाको आवश्यकता महसुस गरी म्हेन्दोलाफोले फाउण्डेसन स्थापना गरिएको हो,’ उनले भने ।
कार्यक्रममा सम्बोधन गर्दै पूर्वमन्त्री एवं बागमती प्रदेशका सांसद लामाले सामाजिक उद्देश्यले राम्रो काम सुरु गरेको भन्दै यसमा आफ्नो साथ रहने प्रतिबद्धता जनाए । उनले सबैलाई एक ठाउँमा ल्याएर सामाजिक हितमा काम गर्ने प्रयास सरहानीय भएको बताए ।
फाउण्डेसनको वेबसाइटमार्फत विश्वभरबाट सहयोग जुटाउन र फाउण्डेसनमा जोडिन सक्ने व्यवस्था गरिएको जानकारी दिइएको छ । साथै, वेबसाइटमा तामाङ समुदायका अग्रज, राजनीतिकर्मी, समाजसेवी, लेखक, सञ्चारकर्मी, कलाकारलगायतको प्रोफाइलसमेत समेटिएको फाउण्डेसनका अध्यक्ष लामाले जानकारी दिए ।
