काठमाडौं - लामो समयदेखी नेपालको पर्यटन प्रवद्र्धन गर्दै आएको अठोट नेपालले ‘सेकेन्ड नेश्नल टुरिजम कन्भेन्सन एण्ड फोटोग्राफी प्रतियोगिता२०२४’ घोषणा गरेको छ । चारवटा विभिन्न विधामा हुन लागेको यस प्रतिष्पर्धामा हरेक विधामा उत्कृष्ट हुनेलाई जनहि ५० हजार रूपैंयाँ पुरस्कारको घोषणा गरेकाे हाे ।
आयोजक अठोट नेपालका अध्यक्ष देबेन्द्र बहादुर शाही ठकुरीका अनुसार अन्तर्राष्ट्रिय बजारमा नेपालको पर्यटन प्रवद्र्धन गर्ने उद्देश्य सहित यो कार्यक्रमको आयोजना गर्न लागिएको हो । ठकुरीका अनुसार यस वर्ष ‘नेपाल सस्टेनेबल टुरिजम डेभ्लप्मेन्ट थिम’ मा आधारित भएर प्रतिष्पर्धा हुन लागेको हो ।
नेपालको पर्यटन प्रवद्र्धन हुने चार वटा मुख्य विधा प्रकृति (वातावरण), संस्कृति (जात्रा), पिपुल (जनजीवन), वाइल्ड लाइफ (चराचुरुङ्गी) संग सम्बन्धित तस्विरहरु पठाउन सकिनेछ । यस प्रतिष्पर्धाबाट छानिएका तस्विरहरुमध्ये छनौटमा परेको कुनै एक उत्कृष्ट फोटोलाई ‘फोटो अफ द इयर’ घोषणा गरिनेछ । तस्विर २०८१ बैशाख १८ गतेभित्र www.presentingnepal.comको वेवसाइटमा गएर पठाउँन सकिनेछ । संसारको जुनसुकै कुनाबाट पठाए पनि तस्विर नेपालको हुनु पर्ने आयाेजकले जनाएकाे छ ।
पर्यटनको दिगो विकास गर्ने उद्देश्य बोकेको अठोट नेपालले यस कार्यक्रम दुई भागमा विभाजन गरेको छ । पहिलो भागमा पर्यटनका विषयमा प्यानल डिस्कसन हुनेछ भने दोस्रो भागमा फोटोग्राफी प्रतियोगिता हुनेछ । प्यानल डिस्कसनमा पर्यटन र वातावरण क्षेत्रसँग सम्बन्धित विज्ञ व्यक्तित्वसँग पर्यटनका निति, निर्माणका विषय, पर्यटन प्रवद्र्धन तथा सरोकारका विषयसँगै जलवायू परिवर्तनका कारण पर्यटन क्षेत्रलाई पारेको प्रभाव र आगामी दिनमा पार्ने समस्याका बारेमा छलफल गरिनेछ ।
यस्तै फोटोग्राफी प्रतियोगितामा निर्णायकले छनौट गरेका उत्कृष्ट तस्विरहरूलाई पुरस्कृत गरिने छ । प्रतियोगिताबारे थप जानकारी वेबसाइटमा हेर्न सकिने जनाइएकाे छ । विश्व महामारी कोभिड १९ को महामारीपछि पर्यटन क्षेत्रलाई पुरानै लयमा फर्काउन महत्वपूर्ण योगदान दिने र भूमिका खेल्ने पर्यटन व्यवसायी, पर्यटन अभियन्ता, पर्यटन पत्रकार, पर्यटन फोटोग्राफर, पर्यटन क्षेत्रमा संलग्न सरकारी कर्मचारीहरु मध्येबाट छनौट भएकालाई सम्मान गरिने छ ।
यसका साथै कार्यक्रममा टिपिकल कल्चरल शो पनि गरिने भएकाे छ । अठोट नेपालले आयोजना गर्न लागेको यस कार्यक्रमलाई नेपाल पर्यटन बोर्डले प्रवद्र्धन गरेको छ । गत वर्ष ‘प्रिजेन्टिङ नेपाल फोटोग्राफी प्रतियोगितातथा एक्जिबिसन २०२४’ को आयोजना गरिएको थियो ।
