- प्रधानमन्त्रीलाई विश्वासको मत दिन रञ्जिताको ह्वीप, प्रधानमन्त्रीलाई समर्थन नदिने रेशम पक्षको निर्णय
- सुदूरपश्चिम सरकारमा शुक्रबार रेशमले मन्त्री पठाए, फिर्ता हुन रञ्जिताको निर्देशन
काठमाडौं– थरुहट/थारुवान आन्दोलनको जगमा स्थापित नागरिक उन्मुक्ति पार्टी (नाउपा) पारिवारिक कलहमा फसेको छ । पार्टीका संरक्षक रहेका श्रीमान् रेशमलाल चौधरी र र पार्टी अध्यक्ष रहेकी श्रीमती रञ्जिता श्रेष्ठबीचको विवाद छताछुल्ल भएको हो ।
पछिल्लोपटक प्रधानमन्त्री पुष्पकमल दाहाललाई विश्वासको मत दिने कि नदिने भन्नेमा मतभेद देखिएको छ । दाहालले आज विश्वासको मत लिँदै छन् । पार्टी संसदीय दलकी नेतासमेत रहेकी रञ्जिताले प्रधानमन्त्री दाहाललाई विश्वासको मत दिन दलका सांसदहरूलाई ह्वीप (निर्देशन) जारी गरेकी छन् । तर, रेशमलाल पक्षले भने विश्वासको मत नदिने निर्णय गरेको छ ।
‘मिति २०८० फागुन ३० गते बिहान ११ः०० बजे बस्ने प्रतिनिधिसभा बैठकमा नागरिक उन्मुक्ति पार्टी संसदीय दलको बैठकको निर्णयबमोजिम अनिवार्य उपस्थित हुन र सम्माननीय प्रधानमन्त्री श्री पुष्पकमल दाहालले आफूमाथि प्रतिनिधिसभाको विश्वास छ भन्ने प्रस्तावको पक्षमा मतदान गर्न निर्देशन (ह्वीप) जारी गरिएको व्यहोरा अनुरोध छ,’ रञ्जिताले जारी गरेको ह्वीपमा भनिएको छ ।
दलका नेताको ह्वीपपछि सांसदहरूले प्रधानमन्त्री दाहाललाई विश्वासको मत दिनैपर्छ । नभए कारबाही गर्ने गरिन्छ । नाउपासँग चारजना सांसद छन् । उनीहरू रञ्जिता, अरुणकुमार चौधरी, गंगाराम चौधरी र लालवीर चौधरी हुन् ।
तर, रेशम पक्षले भने प्रधानमन्त्री दाहाललाई विश्वासको मत दिने पक्षमा छैनन् । उनीनिकट नेता दामोदर पण्डितमार्फत जारी प्रेस विज्ञप्तिमा प्रधानमन्त्री दाहाललाई समर्थन नगर्ने भनिएको छ । गठबन्धनमा सहभागी नहुने र प्रतिपक्षी दलकै रुपमा बस्ने विज्ञप्तिमा उल्लेख छ ।
‘केन्द्र सरकारको नयाँ गठबन्धनमा तत्काल सहभागी नहुने, प्रतिपक्षमा बस्ने, सरकारलाई समर्थन नदिने,’ विज्ञप्तिमा अर्को बुँदा पनि छ, ‘प्रदेश सरकारको हकमा वार्ता समितिले विभिन्न दलहरूसँग सहकार्य र समन्वय गरी संवाद अघि बढाउने ।’
नाउपासँग सुदूरपश्चिम प्रदेशसभामा सात र लुम्बिनीमा चारजना सांसद छन् । सत्ता राजनीतिको जोडघटाउमा यो संख्या गठबन्धनलाई होस् वा कांग्रेसलाई धेरै महŒवपूर्ण छ । यहीबेला रञ्जिता र रेशमबीच विवाद बढेको हो ।
मंगलबार जारी रञ्जिताको ह्वीप र रेशमनिकट नेता पण्डितले जारी गरेको विज्ञप्तिले स्पष्ट रुपमा दुईबीच टकराव बढेको देखिएको छ । प्रधानमन्त्री दाहाललाई विश्वासको मत दिन्छन् कि दिँदैनन् ? अस्पष्ट भएको छ । प्रधानमन्त्री दाहाललाई नाउपाले विश्वासको मत नदिए पनि उनकै दल माओवादी केन्द्रसँगै एमाले, रास्वपा, जसपा र एकीकृत समाजवादीले समर्थन जनाए सरकार जोगिने छ । तर, प्रदेश सरकारमा भने विश्वासको मत दिनैपर्छ । होइन भने सुदूरपश्चिम प्रदेशमा गठबन्धन सरकार असम्भव छ । कांग्रेस नेतृत्वकै सरकारले निरन्तरता पाउने छ । हाल रेशम र रञ्जिताको विवादबीच त्यहाँ कमलबहादुर शाह नेतृत्वको सरकार टिकेको छ ।
रेशमले कांग्रेस नेतासमेत रहेका शाह नेतृत्वको सरकारलाई सहयोग गर्ने भन्दै शुक्रबार राति तीनजना मन्त्री पठाए । घनश्याम चौधरी आर्थिक मामिलामन्त्री, खुसीराम चौधरी विनाविभागीय र इन्दिरा गिरी कृषि राज्यमन्त्री भए ।
तर, २४ घण्टा नबित्दै रञ्जिताले मन्त्रीहरूलाई फिर्ता बोलाइन् । आफूसँग सल्लाह नै नगरी प्रदेश सरकारमा गएको भन्दै श्रेष्ठले उनीहरूलाई फिर्ता बोलाएकी हुन् । रञ्जिता वर्तमान सत्ता गठबन्धनमा सहभागी हुन चाहन्छिन् । उनी यसअघि दाहाल नेतृत्वकै सरकारमा भूमि, व्यवस्था तथा सहकारीमन्त्री थिइन् । सुरूदेखि नै उनी गठबन्धनप्रति सकारात्मक छिन् । प्रधानमन्त्री दाहाल र एमाले अध्यक्ष केपी शर्मा ओलीसँग लगातार छलफल गरेर अन्ततः जेलमा रहेका श्रीमान् रेशमलाई कैद माफी गराउँदै रञ्जिताले नै छुटाइन् । तर, यतिबेला रेशम भने गठबन्धनको विरुद्धमा छन् । उनी गत पुसमा भएको महाधिवेशनबाट पार्टी अध्यक्षमा चुनिएका थिए । तर, निर्वाचन आयोगले उनलाई पार्टी अध्यक्षको मान्यता दिएन । यससँगै आयोगले रञ्जिता नेतृत्वकै कार्यसमितिलाई मान्यता दिएको छ । नाउपाले निर्वाचन आयोगमा केन्द्रीय समिति अद्यावधिक गराउन माघ २९ मा पत्र पठाएको थियो । आयोगले भने एक महिनापछि अद्यावधिक नगरेर पुरानै समितिलाई मान्यता दियो ।
तर, रेशमले भने रञ्जिताले नै आफूलाई अध्यक्ष हुनबाट रोकेको आरोप लगाउने गरेका छन् । एक नेताका अनुसार रेशमले पार्टी बैठकमै यस्तो आरोप लगाउने गरेका छन् । ‘उहाँ (रेशम) मा रञ्जिताका कारण जेलबाट छुटेँ भन्ने छैन । उल्टो रञ्जिताले अध्यक्ष हुन दिइनन् भन्ने सोच बनाएर बस्नुभएको छ । त्यसैमा एकरदुई जनाले उहाँलाई साथ दिएको देखिन्छ । जसका कारण पार्टीमा सबैतर्फ विवाद छ,’ ती नेताले भने ।
उसो त पुस २६ मा कैलालीको टीकापुरमा भएको राष्ट्रिय महाअधिवेशनमार्फत रञ्जिता फेरि अध्यक्ष हुन चाहन्थिन् । उनको चाहनामा रेशम बाधक बने । त्यसबेला रञ्जिता महाधिवेशन नसकिँदै बाहिरिएकी थिइन् ।
