- टिआरसी विधेयक रोकिँदा परराष्ट्रमन्त्री नारायणप्रकाश साउदको फिनल्यान्ड भ्रमण रद्द
- फिनल्यान्डको राजधानी हेल्सिन्कीमा आयोजना हुने ‘सेकेन्ड युएन एलडिसी फ्युचर फोरम’ मा सहभागी हुन मन्त्री साउद आइतबार राति प्रस्थान गर्ने कार्यक्रम थियो
- टेरामक्समा मुछिएका मुख्यसचिव बैकुण्ठ अर्याललाई बिदामा बस्न प्रधानमन्त्री दाहालको निर्देशन
काठमाडौं– दूरसञ्चारसम्बन्धी टेरामक्स प्रकरण र ‘बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ लाई संशोधन गर्न बनेको (टिआरसी) विधेयक’ का कारण राजनीति तरंगित बनेको छ । टेरामक्स भ्रष्टाचार प्रकरणमा मुछेका मन्त्रीलाई सरकारबाट हटाउनैपर्ने र टिआरसी पारित गर्नैपनै अल्टिमेटमका साथ प्रधानमन्त्री पुष्पकमल दाहाल प्रस्तुत भएका छन् ।
यही विषयलाई लिएर प्रधानमन्त्री दाहालले आफ्नो कामको रफ्तार बढाएका छन् । प्रमुख प्रतिपक्षी दल नेकपा एमालेका अध्यक्ष केपी शर्मा ओलीसँग आइतबारमात्र दाहालले दुईपटक भेटे । ओलीसँगको भेटपछि सत्ता साझेदार नेपाली कांग्रेससँग दाहालले घुर्की लगाएसँगै कांग्रेस सभापति शेरबहादुर देउवाले पनि आफ्ना पार्टीका मन्त्रीहरुसँग छलफल गरेका छन् ।
आइतबार साँझ ५ बजे बूढानीलकण्ठ पुगेर मन्त्रीहरुले अहिले नै पदबाट नहटाउन अनुरोध गरेका थिए । तर देउवाले दाहालले निकै अप्ठेरोमा पारेको भन्दै मन्त्रीहरुलाई पद छाड्न तयार रहन निर्देशन दिएर पठाए । बैठकमा परराष्ट्रमन्त्री साउद भने जान पाएनन् । फिन्ल्यान्ड उड्न तयारी गरेकाले उनी बैठकमा छुटेका थिए । तर पछि उनको फिन्ल्यान्ड भ्रमण नै रद्द भयो ।
फिनल्यान्डको राजधानी हेल्सिन्कीमा आयोजना हुने ‘सेकेन्ड युएन एलडिसी फ्युचर फोरम’ मा सहभागी हुन मन्त्री साउद आइतबार राति प्रस्थान गर्ने कार्यक्रम थियो । पछिल्ला दिनमा नेकपा माओवादी केन्द्रले राष्ट्रिय सभा अध्यक्षमा दाबी गरेपछि कांग्रेससँग सम्बन्ध र गठबन्धनमा तिक्तता आएको बताइएको छ ।
प्रधानमन्त्री दाहालको आफ्नै अडान
आइतबार जसरी पनि ‘बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ लाई संशोधन गर्न बनेको विधेयक’ पारित हुनेमा ढुक्क थिए दाहाल । त्यसका लागि दाहालले बिहानै एमाले अध्यक्ष ओली र कांग्रेसका सभापति देउवासँग बालुवाटारमा भेटेका थिए । त्यतिमात्र हैन प्रधानसेनापति प्रभुराम शर्मासँग पनि सहमति नजुटेका विषयमा समन्वय गर्न भन्दै बिहानै भेटेका थिए ।
प्रधाननसेनापति शर्मा एमाले अध्यक्ष ओली भेट्न बालुवाटारबाट बालकोट पुगे । त्यसपछि ओली पनि यो विधेयक पारित गर्न लचक बने । जबकि ओलीले मानवअधिकारको गम्भीर उल्लंघनमा दोहोरो भिडन्तमाबाहेक गरिएको हत्या राख्नुपर्ने अडान छाडेका थिएन । कांग्रेससँगको गठबन्धन फुटाउने बिन्दुमा आएर एमाले यस विषयमा सहमत भएपछि दाहाल ढुक्क बने ।
दिउँसो कानुन, न्याय तथा मानवअधिकार समितिमा टिआरसी विधेयकमा दलहरुबीच गम्भीर छलफल भयो । एमाले, माओवादी, राप्रपा र रास्वपा विधेयक पारित गर्न तयार भए । यहीबेला कानुनमन्त्री धनराज गुरुङले विधेयक पारित नहुने संकेत गरे । आफ्नो कार्यकालमा विधेयक पारित हुन लाग्दा कानुनमन्त्री धनराज गुरुङ खुसी हुनुपर्ने हो तर उल्टै उनैले विधेयक समितिबाट पारित गर्नका लागि समय मागे ।
‘माननीयज्यूहरु, यो विधेयक पारितका लागि केही समय चाहिने भयो,’ गुरुङको प्रस्ताव गरे । सबैको सुझाव समेटेर मस्यौदा तयार गरेपछि समितिमा छलफलका लागि फेरि ल्याउने मन्त्री गुरुङले थप प्रस्ताव गरे । मन्त्रीकै आग्रहमा समितिकी सभापति विमला सुवेदी राजी भइन् । उनले कुनै मिति नतोकी अर्को सूचना जारी गरेर अर्को बैठक राख्ने जानकारी दिइन् । आइतबार राति समितिका सचिव अधिराज राईले एक सूचना जारी गर्दै यसै विधेयकको मस्यौदा प्रतिवेदनमाथि छलफलका लागि आज (सोमबार) ७ः४५ का लागि बैठक डाकेको जनाएका छन् ।
कांग्रे सभापति देउवाका स्वकीय सचिव भानु देउवाले मन्त्रीहरुसँग टिआरसी विधेयकमा कसरी जाने भन्ने विषयमामात्र छलफल गरेको बताए । ‘ण्टिआरसीको विषयमा छलफल गर्न मन्त्रीहरुलाई बोलाउनुभएको हो । भोलि बैठक छ समितिमा । यसलाई भोटिङमा लाने कि सहमतिमा लाने भन्ने विषयमा छलफल भएको हो,’ सभापति देउवाका स्वकीय सचिव देउवाले भने । सकेसम्म सहमतिमा जाने नभए भोटिङमा पारित गर्ने भन्ने निर्णय बैठकको रहेको उनले बताए ।
कांग्रेस मन्त्रीको सेट नै फेर्ने तयारी
कांग्रेस सभापति देउवाले कांग्रेसका मन्त्रीहरुलाई प्रधानमन्त्री दाहाल निकै रिसाएको भन्दै ‘ब्रिफ’ गरेका थिए, बूढानीलकण्ठमा । मन्त्रीहरुलाई देउवाले मन्त्रिमण्डल हेरफेर हुनसक्छ तयार रहनु भन्ने निर्देशन दिए । एक जनालाई मात्र हटाउँदा कारबाही हुने देखिएकोले सबै मन्त्री फेर्न कांग्रेस लगभग तयार रहेको स्रोतले जनायो । ‘मोहन बस्नेतको केसमा पार्टी सिरियस हो । तर उहाँलाई मात्र हटाउँदा कारबाही गरेजस्तो देखिन्छ । त्यसैले सबैजना फेरिन सक्छ भनेर सभापतिले निर्देशन दिनुभएको छ,’ स्रोतले भन्यो । प्रधानमन्त्री दाहाल भने अर्थमन्त्री डा. प्रकाशशरण महतसँग रुष्ट थिए । महतलाई ‘सुपर मन्त्री’ भन्दै दाहालले रोष प्रकट गरे पनि देउवाले कुनै हालतमा उनलाई हटाउन चाहेका थिएनन् ।
माओवादी अध्यक्षसमेत रहेका दाहाल टिआरसी आफ्नै पालामा पारित भएको जस लिन गठबन्धन नै फेरबदलको बार्गेनिङमा लागेको बताइन्छ । टिआरसी विधेयक शीर्ष नेताहरु ओली र देउवा पनि आफ्नो नेतृत्वमा पारित गर्न चाहन्छन् । राष्ट्रिय सभा अध्यक्ष र मन्त्री फेरबदलको निहुँ बनाएर दाहालले आफ्नो पालामा टिआरसी विधेयक पारित गर्न खोजेको माओवादी नेताहरु बताउँछन् ।
मुख्यसचिवलाई बिदामा बस्न निर्देशन
यसैबीच प्रधानमन्त्री दाहालले मुख्यसचिव बैकुण्ठ अर्याललाई बिदामा बस्न निर्देशन दिएका छन् । आइतबार सिंहदरबारमा भेटेर दाहालले मुख्यसचिवलाई बिदामा बस्न निर्देशन दिएको प्रधानमन्त्रीको सचिवालयले जनाएको छ ।
टेरामक्स खरिद प्रकरणमा अनियमितताको आरोप लागेका र अनुचित आर्थिक लेनदेनमा मुछिएका मुख्यसचिव अर्याललाई बिदामा बस्न निर्देशन दिएका हुन् । टेरामक्स खरिद प्रकरणमा अख्तियार दुरुपयोग अनुसन्धान आयोगले मुख्यसचिव अर्यालसँग यसअघि नै बयान लिइसकेको छ । उनले सञ्चार तथा सूचना प्रविधि मन्त्रालयको सचिव हुँदा सुरक्षण मुद्रण केन्द्रका तत्कालीन कार्यकारी निर्देशक विकल पौडेलसँग तेस्रो व्यक्तिको बैंक खातामार्फत दुईपटकमा गरी १४ लाख रुपैयाँ बुझेको पनि सार्वजनिक भएको छ ।
उनीमाथि पौडेललाई दोस्रोपटक नियुक्ति दिलाउन भूमिका खेलेको आरोप छ । सेक्युरिटी प्रिन्टिङ प्रेस खरिदमा भ्रष्टाचार गरेको भन्दै गत वैशाख ३ गते ६९ करोड आठ लाख रुपैयाँ बिगो कायम गरी मुद्दा दायर गरिएका पौडेल अकुत सम्पत्ति आर्जनको आरोपमा माघ १० देखि अख्तियारको हिरासतमा छन् । यही प्रकरणमा स्वास्थ्यमन्त्री बस्नेतको नामसमेत जोडिएको छ । यही प्रकरणमा मुछिएका कारण बस्नेतलाई मन्त्रीबाट हटाउनुपर्ने माग कांग्रेसभित्रै उठेको छ ।
