- अध्यक्ष राजेन्द्र लिङ्देन र नेता प्रकाशचन्द्र लोहनी, वरिष्ठ उपाध्यक्ष रवीन्द्र मिश्र तथा महामन्त्री धवलशमशेर जबरा पक्षबीच किचलो
- निर्देशन समितिको निर्देशनलाई लिएर लिङ्देन थप आक्रोशित
- लोहनीसहितका नेताहरूले पार्टीमा अलग्गै शक्तिको खेल खेल्न अभ्यास गरेको लिङ्देनको टिप्पणी
काठमाडौं– राजतन्त्र र हिन्दू राष्ट्र पुनःस्थापनाको एजेण्डा बोकेको दल राष्ट्रिय प्रजातन्त्र पार्टी (राप्रपा) भित्र गम्भीर मतभेद देखिएको छ । पार्टी अध्यक्ष राजेन्द्र लिङ्देन र पूर्वअध्यक्ष डा. प्रकाशचन्द्र लोहनी, महामन्त्री धवलशमशेर जबरा (लोहनी–जबरा) पक्षबीच पार्टी नै विभाजन हुन सक्नेगरी मतभेद चुलिएको छ ।
आगामी फागुनको पहिलो साता देशव्यापी आन्दोलनमा जाने घोषणा गरेको दलमा उत्पन्न टकरावले आन्दोलन प्रभावित पार्न सक्ने चिन्ता पार्टीकै नेताहरुबाट प्रकट हुन थालेका छन् । पार्टी प्रवक्ता सगुनसुन्दर लावतीले घोषित आन्दोलन नरोकिने तर मतभेद मत्थर नभए आन्दोलनमा त्यसको प्रभाव पर्न सक्ने बताए ।
हिन्दू राष्ट्र पुनःस्थापना, संवैधानिक राजसंस्था र प्रदेश खारेजीको माग राखेर आन्दोलनमा जान्छौं हामी । तयारी पनि भइरहेको छ । तर, अहिले पार्टीमा केही आन्तरिक समस्या देखिएका छन् । यदि, समाधान नभए त आन्दोलनमा असर पुग्न सक्छ ।
सगुनसुन्दर लावती
प्रवक्ता, राप्रपा
‘हिन्दू राष्ट्र पुनःस्थापना, संवैधानिक राजसंस्था र प्रदेश खारेजीको माग राखेर आन्दोलनमा जान्छौं हामी । तयारी पनि भइरहेको छ,’ उनले प्रभावसँग भने, ‘तर, अहिले पार्टीमा केही आन्तरिक समस्या देखिएका छन् । यदि, समाधान नभए त आन्दोलनमा असर पुग्न सक्छ ।’ अध्यक्ष लिङ्देन नेता लोहनी, पार्टी वरिष्ठ उपाध्यक्ष रवीन्द्र मिश्र, महामन्त्री जबरासँग रुष्ट छन् ।
कोशी प्रदेशको सभामुखमा पार्टीका सांसद अम्बरबहादुर विष्टले उम्मेदवारी दिएकै दिन लोहनी अध्यक्ष रहेको निर्देशन समितिले उम्मेदवारी फिर्ता गराउन केन्द्रीय समिति र कार्यसम्पादन समितिलाई निर्देशन दिएको थियो । जतिबेला लिङ्देन मलेसियादेखि स्वेदश फर्किंदै थिए । उता कोशीमा विष्ट सभामुख भए ।
तर, आफू अध्यक्ष रहेको केन्द्रीय समिति र कार्यसम्पादन समितिलाई लोहनी नेतृत्वको समितिले निर्देशन दिएको भन्दै लिङ्देन बिच्किएका छन् । उनले भनिसकेका छन्, ‘जुन हिसावले केन्द्रीय कार्यसमिति र केन्द्रीय कार्यसम्पादन समितिका नाममा निर्देशन जारी गरिएको छ, फेसबुक र पत्रिकाबाट । त्यो कुरा राप्रपा अध्यक्षले मान्दैन ।’
वरिष्ठ उपाध्यक्ष मिश्रलाई त उनले असफल नेता भनेका छन् । उनले भनेको मान्न जरुर नै नभएको बताए । ‘जो पछाडि बसेको छ, आफूलाई ड्राइभर भन्छ तर गाडीचाहिँ जीवनभर ठोकाएर थाङथिलो पारेको मान्छेले भनेको अनुसार त म कुदाउँदिनँ,’ लिङ्देनले मिश्रप्रति कटाक्ष गर्दै भनेका छन्, ‘जसले जीवनमा एउटा स्टेन्टबाट अर्को स्टेन्टसम्म राम्रोसँग गाडी पु¥याएकै छैन तर भन्नचाहिँ सधैँभरि आफूलाई ड्राइभर हुँ भन्छ । त्यस्तो ड्राइभरको कुरा राजेन्द्रले मानोस् त ?’
पछिल्लो समय लोहनी, मिश्र र जबरासहितका नेताहरूले अध्यक्ष लिङ्देनको आलोचना गर्दै आएका छन् । यसअघि सरकारमा गएको, फेरि सरकारमा जान जोडबल गरिरहेको, प्रदेश खारेजीको एजेण्डा बोक्ने दलले प्रदेशकै सभामुख लिएकोदेखि राजनीतिक सौदावाजीका लागि संसद्को पूर्वाधार विकास समितिको नेतृत्व लिएको भन्दै लिङ्देनको आलोचना हुँदै आएको छ । यसपछि लिङ्देन आलोचना गर्ने नेताहरूविरुद्ध खनिएका हुन् ।
उनले नेता लोहनीलाई पार्टी विभाजन गर्न लागेको अर्थ लाग्नेगरिको आरोप लगाएका छन् । ‘निर्देशन समिति अध्यक्ष महाधिवेशनबाट निर्वाचित अध्यक्षभन्दा माथि हो ? होइन तर केन्द्रीय समिति र केन्द्रीय कार्यसम्पादन समितिलाई निर्देशन दिने ? यस्तो हुन सक्दैन । पार्टीभित्रै अलगै शक्तिको खेल सहन सकिँदैन,’ उनले हालै एक टेलिभिजन अन्तर्वार्तामा भनिसकेका छन् ।
नेताहरू लोहनी, मिश्र र जबराले राजसंस्था र हिन्दूराष्ट्र कायम गराउने राजनीतिक आन्दोलनको अगुवा लिङ्देनलाई भन्दा देशको अन्तिम राजा ज्ञानेन्द्र शाहलाई लिने गरेका छन् । लिङ्देननिकट स्रोतका अनुसार यसबाट पनि लिङ्देन असन्तुष्ट बनेका हुन् । तर, राप्रपा महामन्त्री जबरा भने पार्टी नवीन राप्रपाको अवधारणाअनुसार विधिमा सञ्चालन गर्नुपर्ने र त्यसो हुन नसकेको बताउँछन् । जसको जिम्मेवार उनी अध्यक्ष लिङ्देनलाई देख्छन् ।
‘पछिल्लो उदाहरण लिउँ कि कोशीमा सभामुख हाम्रो पार्टीबाट भयो । जुन एकदमै गलत हो । प्रदेश खारेजीको माग राख्ने दलले प्रदेशकै सभामुख लिनु नैतिकरुपमा मिल्छ ? अनि, पार्टी विधिमा चलाउने भनिएको छ, विधिमा चलेको छ त ?,’ उनले भने । लोहनी–जबरा पक्षले निर्देशन समितिको निर्देशन दिने निर्णयलाई केन्द्रीय समिति र कार्यसम्पादन समितिमध्ये कुनै पनि पार्टीको संरचनाबाट खारेज गरेर चुनौती दिएका छन् । जबकि, यी दुवै समितिमा लोहनी–जबरा पक्षको बहुमत छ ।
यसले गर्दा लिङ्देनलाई निर्देशन समितिको निर्देशन खारेज गराउन सहज छैन । पार्टी प्रवक्ता लावतीका अनुसार निर्देशन समिति पार्टीमा नियन्त्रण र सन्तुलन कायम गराउने विधानमा व्यवस्था भएको पार्टीको आन्तरिक संरचना हो । यहाँ लिङ्देन पदेन सदस्य छन् । पूर्वप्रधानमन्त्री लोकेन्द्रबहादुर चन्दसमेत पदेन सदस्य रहेको प्रवक्ता लावतीले बताए । पार्टी नेतृत्व स्वेच्छाचारी हुने सक्ने आधारमा निर्देशन समिति गठन भएको हो । तर, यो समितिले गरेको निर्देशनलाई अध्यक्ष लिङ्देनले लत्याउने भएका हुन् ।
यसरी पार्टीमा उत्पन्न आन्तरिक गतिरोध जारी रहेपछि फागुनमा गर्ने भनिएको आन्दोलनमा असर पर्ने देखिएको छ । लिङ्देन आफैं आन्दोलन मूल आयोजक समिति संयोजक हुन् । आन्दोलन परिचालन समिति संयोजक भने महामन्त्री जबरा हुन् । तर, लिङ्देन नेतृत्वको समितिले आन्दोलन तयारीको कामै नगरेको स्रोतको दाबी छ ।
-1752335779.jpg)
