कोभिड–२०१९ नाम दिइएको खतरनाक कोरोनाभाइरस सङ्क्रमितहरुको सङ्ख्या चीनमा दिनदिनै घट्दै गइरहेको समाचार आइरहेको छ भने यस भाइरसको सङ्क्रमण विश्वका अरु मुलुकहरुमा चाहिँ खतरनाक ढङ्गले फैलिन थालेको दुःखद् समाचार आइरहेको छ । यस महामारी अहिले अत्यन्तै खतरनाक र अप्रत्यासित रुपमा फैलिँदै छ । यहि रुपमा कोरोनाको सङ्क्रमण फैलिँदै गयो भने यसले विश्वमै ठूलो सङ्कट ल्याउने निश्चित छ । विश्वभरि ८३,३८१ जना सङ्क्रमित छन् भने २,८५८ जनाको मृत्यु भइसकेको छ । सङ्क्रमितमध्ये पनि बिहीबारसम्म ३६,५८७ जना निको पनि भएका छन् जसमध्ये ३६,११७ जना चिनियाँ नै छन् । चीनमा हालसम्म सङ्क्रमितको सङ्ख्या ७८,८२४ र मृत्यु हुनेको सङ्ख्या २,७८८ पुगिसकेको छ ।
चीनको हुबेई प्रान्तबाट सुरु भएको कोरोनाभाइरस सङ्क्रमण विश्वका थुप्रै मुलुकमा फैलिइसकेको छ । यो सङ्क्रमणले युरोप मध्यपूर्व र संसारका अरु भागलाई पनि भेटिसकेको छ जसमा दक्षिण कोरिया, इरान र इटाली बढि प्रभावित छन् । अन्टार्कटिकाबाहेक ६ वटै महादेशमा यो संक्रमण फैलिइसकेको छ ।
चीनपछि कोरोनाभाइरसको सङ्क्रमण सबैभन्दा बढी दक्षिण कोरियामा देखिएको छ जहाँ फेरि थप २५६ कोरोनाभाइरस सङ्क्रमितहरु फेला परेका छन् । तीसमेत कोरियामा जम्मा २,०२२ जना सङ्क्रमित बनेका छन् भने १३ जनाको मृत्यु भइसकेको छ ।
यस संक्रमणबाट चीनपछि सबैभन्दा बढी मृत्यु इरानमा भएको छ । अहिलेसम्म इरानमा जम्मा २६ जनाको मृत्यु भइसकेको छ भने २४५ जना संक्रमित छन् । उच्च सरकारी अधिकारीहरू समेत संक्रमित भएका छन् । संक्रमित उच्च सरकारी अधिकारीहरूमा उपराष्ट्रपति मसुमेह इब्तेकर जो हाल घरमै क्वारेन्टाइन बसिरहेकी छन्, उपस्वास्थ्य मन्त्री इराज हरिर्ची, सांसद तथा संसदको राष्ट्रिय सुरक्षा तथा विदेश नीति समितिका प्रमुख मोज्ताबा जोल्नुर, सांसद मोहम्मद सादेगी, तेहरानका एक मेयर मोर्ताजा रहमानजादा, कोम सहरका स्वास्थ्य विश्वविद्यालयका निर्देशक डाक्टर मोहम्मद रेजा गादिर र भ्याटिकनका लागि पूर्वइरानी राजदूत हादी खोस्रोसाही रहेका छन् जसमध्ये ८१ वर्षीय हादीको ज्यान गइसकेको छ । इरानमा यस भाइरसको संक्रमण सबैभन्दा बढी कोम सहरमा देखिएको छ । संक्रमितको संख्या दिनप्रतिदिन बढ्दै गएपछि शुक्रबारको प्रार्थनाहरू रद्ध गरिएको छ, स्कुल र विश्वविद्यालय मार्च २१ सम्मका लागि बन्द गरिएको छ र सबै सांस्कृतिक र खेलकुद कार्यक्रमहरु पनि रोकिएका छन् । इरानमा कोभिड–१९ चीनबाट पुगेको विश्वास गरिएको छ र इरानले चिनियाँ नागरिकहरुलाई देश प्रवेशमा पनि प्रतिबन्ध लगाएको छ ।
रुसले इरानसँगको आफ्ना केही हवाइ उडानहरु रद्द गरेको छ र इरानीहरुलाई भिसा जारी गर्न शुक्रबारदेखि नै बन्द गरेको छ । न्युजिल्यान्डले पनि इरानबाट आउने यात्रीहरुलाई अस्थायी रूपमा देश प्रवेशमा रोक लगाएको छ ।
कोरोनाको उद्गमस्थल चीनमा बिहीबार मात्रैे ४४ जनाको मृत्यु भएको छ । त्यो समेत गरेर चीनभरिमा कोरोनाभाइरसकै कारण २,७८८ जनाको मृत्यु भइसकेको छ ।
चीनपछि इरानमा र दक्षिण कोरियामा देखापरेको कोरोना सङ्क्रमण विस्तारै युरोपतिर पनि सर्दै र फैलिँदै गएको छ । युरोपमा पनि सबैभन्दा बढी सङ्क्रमण र त्रास इटालीमा देखिएको छ । इटालीमा कोरोनाकै कारण १७ जनाको मृत्यु भइसकेको छ भने ६५० जनामा सङ्क्रमण फेला परिसकेको छ । साथै फ्रान्समा सङ्क्रमितको सङ्ख्या बिहीबारसम्ममा ३८ पुगेको छ । जसमध्ये दुई जनाको मृत्यु भइसकेको छ, १२ जना निको भएका छन् र २४ जना अस्पताल भर्ना भएका छन् । तीमध्ये दुईजना संक्रमितको अवस्था गम्भीर रहेको बताइएको छ ।
जापानमा पनि सो संक्रमण देखापरेपछि टोकियोस्थित डिज्नी ल्यान्डलाई शनिबारदेखि मार्च १५ सम्म बन्द गरिने भएको छ । जापान सरकारले सबै स्कुलहरु बन्द गरिसकेको छ र कम्तीमा पनि दुई हप्तासम्मका लागि ठूला जमघट, समारोह तथा खेलकुदहरुको आयोजना नगर्न सार्वजनिक आह्वान गरिसकेको छ ।
अमेरिका पनि कोरोनाको सङ्क्रमणले प्रभावित भएको छ ।
