नेताहरुमाथि आक्रमण हुनु अस्वाभाविक होइन । नेताहरू भ्रष्टाचारमा लिप्त छन् । परिवारवादमा फसेका छन् । अनि जनता आक्रोशित हुँदैनन् ? चुप लागेर बस्छन् ?
डा. तारानाथ घिमिरे
राजनीतिक विश्लेषक
- कोही नेतामाथि जुत्ता, कुर्सी, बोटल र खोया प्रहार, कोहीलाई भने झापड र चड्कन
- पहिलोपटक २०४८ मा गृहमन्त्री छँदा वर्तमान कांग्रेस सभापति शेरबहादुर देउवामाथि जुत्ता प्रहार
- कृषिमन्त्री छँदा २०५० सालमा वर्तमान राष्ट्रपति रामचन्द्र पौडेललाई झापड
- वर्तमान प्रधानमन्त्री पुष्पकमल दाहाललाई २०६९ मा झापड र २०७६ मा जुत्ता प्रहार
- पूर्वप्रधानमन्त्री माधवकुमार नेपाललाई लक्षित गर्दै २०७२ मा कुर्सी प्रहार
- गएको २८ मंसिरमा पूर्वप्रधानमन्त्री केपी शर्मा ओलीमाथि धनकुटामा मुक्का प्रहार
- शनिबार पूर्वउपप्रधान तथा गृहमन्त्री रवि लामिछानेमाथि खोया प्रहार
काठमाडौं– नेपाली राजनीतिज्ञहरूविरुद्ध जनता थप आक्रोशित हुँदै गएका छन् । चुनावका बेला अनेक आश्वासन बाँड्ने तर पूरा नगरी ‘अन्टसन्ट’मा रमाउनेसँगै सरकारमै रहेर भ्रष्टाचार, अनियमितता, तस्करीजस्ता गतिविधिमा लगातार संलग्न भएपछि आक्रोशित जनताका तारो बनिरहेका छन् ।
शनिबारमात्रै पूर्वउपप्रधान तथा गृहमन्त्रीसमेत रहेका राष्ट्रिय स्वतन्त्र पार्टी (रास्वपा)का सभापति रवि लामिछानेमाथि पोखरामा आयोजित एक कार्यक्रममा खोया प्रहार भयो । लामिछानेमाथि खोया प्रहार गरेको आरोपमा २८ वर्षीय सन्तोष रानाभाट पक्राउ परेका छन् ।
लामिछानेले भाषणका क्रममा सहकारीको कुरा निकालेपछि रानाभाटले खोयाले हानेको बताइन्छ । कास्कीका प्रहरी उपरीक्षक मोहनबहादुर थापाका अनुसार रानाभाट पोखराको सूर्यदर्शन सहकारीका बचतकर्ता हुन् । जुन सहकारीको करोडौं रकम अपचलन गरेर लामिछानेसमेत यसअघि संलग्न रहेको ग्यालेक्सी टेलिभिजन जिबी राईले खोलेका थिए । शनिबार लामिछानेले सोही सहकारीबारे भाषण दिन थालेपछि लगानी डुबेर आक्रोशित रानाभाटले लामिछानेमाथि खोया प्रहार गरेको प्रहरीले जनाएको छ ।
आफूमाथि खोया प्रहार भएपछि लामिछानेले खबरदारी गरेको अर्थमा लिएको प्रतिक्रिया दिएका छन् । उनले खोयालाई घरमा झुण्ड्याएर राख्ने पनि बताए । ‘मैले सर्टिफिकेट आजसम्म घरको भित्तामा झुण्ड्याएको छैन । मेरो सपना पूरा नभएसम्म मैले यो मकैको घोगालाई आफ्नो घरमा झुण्ड्याएर राख्ने छु,’ उनले पोखराको अमरसिंह चौरमा आयोजित कार्यक्रममा खोया प्रहारपछि भने ।
लामिछाने गत वर्षको निर्वाचनमा जनताले सर्वाधिक आशा र भरोसा गरेका नेता हुन् । त्यही भएर उनी देशभरमै लोकप्रिय मतसहित आमनिर्वाचन र उपनिर्वाचनमा निर्वाचित भए । उनकै लोकप्रिय छविले स्थापनाको पाँचौं महिनामै चुनावमा जाँदा रास्वपालाई जनताले अभूतपूर्व मत दिए । धेरैले अनुमान गरेभन्दा विपरीत वैकल्पिक दलको रूपमा स्थापित भयो । हाल प्रतिनिधिसभाको चौथो ठूलो दल रवि नेतृत्वको रास्वपा हो । तर, सरकारमा गए पनि जनताको अपेक्षाअनुसार काम गर्न नसकेको र प्रतिबद्धता जनाएअनुसार १०० जनालाई रोजगारी नदिएकोलगायतका आरोपको सामना रविले गरिरहेका छन् । यहीबेला उनीमाथि खोया प्रहार भएको हो ।
यसअघि गत २८ मंसिरमा पूर्वप्रधानमन्त्रीसमेत रहेका एमाले अध्यक्ष केपी शर्मा ओलीलाई धनकुटाको लेगुवामा स्थानीय महेश राईले मुक्का प्रहार गरेको दृश्य सार्वजनिक भएको भिडियोमा देखिएको थियो । तर, एमालेले भने मुक्का प्रहार नभएको दाबी गर्दै आएको छ । ओलीलाई मुक्का प्रहार गर्ने राई एमालेकै स्थानीय कार्यकर्ता हुन् । तर, कतिपयले भने उनी पहिचानवादी भएको बताउने गरेका छन् ।
वर्तमान प्रधानमन्त्री पुष्पकमल दाहालले आफ्नै कार्यकर्ताबाट जुत्ता प्रहार भएको सामना गर्नुपरेको थियो । उनीलाई लक्षित गरेर १८ फागुन २०७६ मा राष्ट्रिय सभागृहमा आयोजित कार्यक्रममा पूर्वमाओवादी कार्यकर्ता रविन तिरुवाले जुत्ता प्रहार गरेका थिए । जनयुद्धका सहिद परिवार रहेका उनी पनि माओवादीमै क्रियाशील थिए । तर, जनयुद्धका सुप्रिम कमाण्डर रहेका दाहालले युद्धकालीन सबै एजेण्डा बिर्सेर युद्धका सहयात्रीहरूलाई भुलेको भन्दै जुत्ता प्रहार गरेको तिरुवाले बताएका थिए ।
तिरुवाभन्दा अघि अर्का माओवादी कार्यकर्ता पदम कुँवरले २ मंसिर २०६९ मा भृकुटीमण्डपमा आयोजित चियापानमा दाहाललाई झापड हानेका थिए । तत्कालीन उपाध्यक्ष मोहन वैद्यसहितको ठूलो पंक्ति माओवादीबाट अलग हुनुअघि कुँवरले दाहालले झापड हानेका हुन् । दाहाल दलाल संसदीय भासमा फसेको भन्दै रिस थाम्न नसकेर झापड हानेको उनले बताएका थिए ।
नेताहरूमाथि हुने यस्ता आक्रमणका घटना अस्वाभाविक नभएको राजनीतिक विश्लेषक डा. तारानाथ घिमिरे बताउँछन् । ‘२०४६ सालमै स्वर्गजस्तो देश बनाउने भनेर काठमाडौंमा आन्दोलन भएको थियो । पछि आन्दोलनरत पक्ष सत्तामा पुग्दा त्यस्तो भएन । बाबुराम भट्टराईलगायतले पछि त्यसविरुद्ध प्रश्न उठाउँदै ज्ञापनपत्र बुझाए । बन्दुक उठाए,’ उनले प्रभावसँग भने, ‘२०६१ पछि आठ दल बनेर राजतन्त्रविरुद्ध लडे, तर उस्तै छ । नेताहरू भ्रष्टाचारमा लिप्त छन् । परिवारवादमा फसेका छन् । अनि जनता आक्रोशित हुँदैनन् ? चुप लागेर बस्छन् ?’
पूर्वप्रधानमन्त्री तथा नेपाली कांग्रेसका सभापति शेरबहादुर देउवा पनि जुत्ता सामना गरेका नेतामै पर्छन् । २०४८ सालमा गृहमन्त्री छँदा तत्कालीन जनमोर्चाका सांसद कमानसिंह लामाले देउवामाथि जुत्ता प्रहार गरेका थिए । नेपालको संसदीय राजनीतिक इतिहासमा वहालवाला मन्त्रीमाथि पहिलोपटक जुत्ता प्रहारको घटना भएको मानिन्छ । देउवाको कार्यशैलीमाथि प्रश्न उठाउँदै लामाले जुत्ता प्रहार गरेको बताइन्छ । पूर्वसांसद, दक्षिण कोरियाका लागि पूर्वराजदूतसमेत रहेका माओवादी नेता लामाको निधन भइसकेको छ ।
देउवामाथि जुत्ता प्रहार भएको दुई वर्षपछि २०५० सालमा तत्कालीन कृषिमन्त्री (वर्तमान राष्ट्रपति) रामचन्द्र पौडेलले राष्ट्रिय सभामा झापड खाए । बहालवाला मन्त्री पौडेललाई झापड हान्ने एमालेका राष्ट्रिय सभा सदस्य गोल्छे सार्की हुन् । कृषि मलको विषयमा मन्त्रीका रूपमा जवाफ दिएर फर्किने क्रममा सार्कीले झापड हानेका थिए । हाल पौडेल राष्ट्रपति छन् ।
पूर्वप्रधानमन्त्री माधवकुमार नेपाललाई लक्षित गर्दै ४ साउन २०७२ मा कुर्सी प्रहार भएको थियो । गृहजिल्ला रौतहटको गौरमा नेपाललाई लक्षित गरेर अनिल झा नेतृत्वको सद्भावना पार्टीका कार्यकर्ताले कुर्सी प्रहार गरेका थिए । त्यसबेला पहिचान विरोधी दलको रूपमा एमालेलाई मधेसवादी दलहरूले अथ्र्याउँथे । सोही दलको नेताका रूपमा नेपाल संविधानको मस्यौदाबारेको छलफलका लागि रौतहट पुग्दा कुर्सी प्रहार भएको हो । हाल नेपाल नेकपा एकीकृत समाजवादीका अध्यक्ष छन् ।
त्यसअघि सोही दलका सम्मानित नेतासमेत रहेका पूर्वप्रधानमन्त्री झलनाथ खनाललाई ६ माघ २०६७ मा सुनसरीमा एमालेकै एक कार्यकर्ताले चड्कन हानेका थिए । भरौलका देवीप्रसाद रेग्मीले कार्यक्रममै खनाललाई चड्कन दिएका दिए । उनले भने आक्रोशले भन्दा पनि ठूलै नेतालाई चड्कन हान्न मन लागेको र संयोगले खनाल परेको बताएका थिए ।पूर्वप्रधानमन्त्री सुशील कोइरालालाई १३ असार २०६९ मा कांग्रेसकै कार्यकर्ता प्रवेश बस्नेतले आक्रमण प्रयास गरेका थिए । अन्य कांग्रेस कार्यकर्ताले जोगाएका कारण कोइरालामाथि त्यसबेला केही भएन । कांग्रेसमा गुटगत राजनीति कोइरालाले गरेको भन्दै आक्रोशित उनले आक्रमण प्रयास गरेका थिए ।
अर्का पूर्वप्रधानमन्त्री डा. बाबुराम भट्टराईमाथि पनि जुत्ता प्रहार भएको थियो । पृथ्वीनारायण क्याम्पस पोखरामा २२ मंसिर २०७३ मा भट्टराईमाथि कैलालीका सञ्जीव भट्टराईले जुत्ता प्रहार गरेका थिए । सञ्जीवले जुत्ता प्रहार गर्नुको कारण भने अझैसम्म खुलेको छैन । जुत्ता प्रहार भएका भट्टराई हाल नेपाल समाजवादी पार्टी (नेसपा)का अध्यक्ष छन् । भट्टराईलेभन्दा पहिले वर्तमान उपप्रधान तथा रक्षामन्त्रीसमेत रहेका कांग्रेस नेता पूर्णबहादुर खड्काले चप्पल प्रहारको सामना गर्नुपरेको थियो । तत्कालीन एमाले सभासद कमला शर्माले १५ जेठ २०६५ मा चप्पल प्रहार गरेकी थिइन् ।
पूर्वअर्थमन्त्री डा. रामशरण महतलाई लक्षित गरेर गृहजिल्ला नुवाकोटमा १ चैत २०७४ मा पक्की पुुल शिलान्यास गर्ने क्रममा स्थानीय रामहरि खड्काले पानीको बोतल प्रहार गरेका थिए । पूर्वमाओवादी सभासद झक्कुप्रसाद सुवेदीलाई काठमाडौंको तीनकुनेमा गोरखाका प्रेमप्रसाद देवकोटाले चिया खुवाइसकेपछि दुई झापड हानेका थिए ।
-1752335779.jpg)
