काठमाडौं– चौतर्फी घेराबन्दीमा परेपछि राजनीतिक रूपमा प्रतिवाद गर्न प्रमुख विपक्षी दल नेकपा एमाले मध्यपहाडमा गएको छ । सुदूरपश्चिम प्रदेशको बैतडीमा पर्ने झुलाघाटमा बिहीबार राष्ट्रिय झण्डा झण्डोतोलन गर्दै मध्यपहाड गएको एमाले सुदूूरपूर्वी जिल्ला पाँचथरको चिवाभञ्ज्याङसम्म पुग्ने छ । मध्यपहाड जाने अभियानलाई एमालेले ‘झुलाघाट–चिवाभञ्ज्याङ संकल्प यात्रा’ भनेको छ । यात्रामा पूर्वप्रधानमन्त्रीसमेत रहेका पार्टी अध्यक्ष केपी शर्मा ओलीसहितका नेताहरू सहभागी छन् ।
विपक्षी धारका राजनीतिक शक्ति तथा समूहहरूको भण्डाफोर र मध्यपहाडको समृद्धिका आधारशीलाहरू पहिचान गर्न अभियान उपयोगी हुने एमालेले जनाएको छ । उक्त दलका अध्यक्ष ओलीले अहिलेको विकृत राजनीतिलाई पनि सही बाटोमा ल्याउन अभियान प्रभावी हुने दाबी गरेका छन् । सरकारको कामकारबाही, अर्थतन्त्र र वर्तमान राजनीतिलाई सही बाटोमा ल्याउने पनि उनको भनाइ छ ।
‘यो यात्रा एक प्रकारको परिस्थितिसम्बन्धी जानकारी, राष्ट्रिय शक्ति निर्माणका लागि जागरण अभियान पनि हो,’ उनले भने, ‘यसले राष्ट्रिय शक्ति निर्माण गर्ने, देश र जनताको हित, सुशासन प्रवद्र्धन तथा देश विकासको पक्षमा महŒवपूर्ण योगदान पुग्छ भन्ने विश्वास लिएको छु ।’ओली नेतृत्वको एमाले हाल सत्ता गठबन्धन, पूर्वमा पहिचान पक्षधर र दुर्गा प्रसाईं नेतृत्वको समूहको घेराबन्दीमा छ । यहीबेला मध्यपहाड पुगेर घेराबन्दीको भण्डाफोर गर्न र राजनीतिक रूपमा प्रतिवाद गर्न एमालेले चाहेको हो ।
राजतन्त्र पक्षधरहरूविरुद्ध पनि प्रस्तुत हुन एमालेले मध्यपहाडी अभियानलाई प्रयोग गर्ने देखिएको छ । पार्टी अध्यक्ष ओलीले राजतन्त्र र हिन्दूराष्ट्र पक्षधरहरूविरुद्ध बिहीबार चर्को अभिव्यक्ति दिए । उनका अनुसार राजावादीले टाउको उठाउन थालेको सरकारकै कामकारबाहीले हो ।
फेरि रैती हुन सक्दैनौं । दास हुन सक्दैनौं, छुवाछूतजस्ता प्रथातर्फ फर्किन सक्दैनौं । फेरि जन्मिदै कोही राजा हुने, कोही दास हुने, धनी र गरिब हुने जन्मिछ भनेर मान्दैनौ ।-केपी शर्मा ओली,अध्यक्ष, नेकपा एमाले
‘अहिलेको दुनियाँ कति अगाडि बढिसक्यो तर हाम्रो देश अझै ओरालो लाग्दै छ । म प्रधानमन्त्रीबाट हटाइएपछि अढाई वर्षमा देशको राजनीति अस्थिरतामा गयो । अर्थतन्त्र ओरालो लाग्यो, राजनीतिक अस्थिरता र अराजकतामा गयो,’ उनले भने, ‘रोजगारीका अवसर समाप्त भए, उद्योग धन्दा खुल्ने होइन भएका पनि बन्द भए । अनि पनि प्रतिगामी शक्तिहरू टाउको उठाउँदैनन् ?’
उनले तस्करी र कमिसनतन्त्रको खेलकै कारण अर्थतन्त्र ओरालो लागेको ठोकुवा गरे । यस्तो स्थितिले जनतामा निराशा र अन्योल पैदा मात्रै होइन, नागरिक विदेश जानुपर्ने अवस्था सिर्जना भएको पनि बताए । यस्तो स्थिति भने प्रतिगामी शक्तिका लागि भने अफवाह फैलाउने अनुकूल समय भएको उल्लेख गरे । ‘प्रतिगामी शक्तिहरू मौका आउँछ कि भनेर दुलोबाट टाउको निकालेर फेरि सल्बलाउन खोजेका छन्,’ उनी भन्छन् । तर, संघीय लोकतान्त्रिक गणतन्त्रात्मक देश राजतन्त्रात्मक प्रणालीमा नफर्किने ठोकुवा ओलीको छ । नेपाली जनताले पनि रैती हुन नचाहेको बताए ।
‘हामी पछाडि फर्किन सक्दैनौं, फेरि रैती हुन सक्दैनौं । दास हुन सक्दैनौं, छुवाछूत जस्ता प्रथातर्फ फर्किन सक्दैनौं । फेरि जन्मिदै कोही राजा हुने, कोही दास हुने, धनी र गरिब हुने जन्मिछ भनेर मान्दैनौ,’ ओलीले भने । दुर्गा प्रसाईं नेतृत्वको समूहले चाहिँ राजतन्त्र र हिन्दूराष्ट्र कायम गराउन संघर्ष प्रारम्भ भएको र हाल गणतन्त्रको जग हल्लिएको समेत जिकिर गर्दै आएको छ । यस्तो अवस्थाबीच ओलीले खण्डनयुक्त अभिव्यक्ति दिएका हुन् ।
उपेक्षित भीम रावल
१९ दिन लामो एमालेको संकल्प यात्रामा नेता डा. भीम रावल देखिएका छैनन् । रावलनिकट एक नेताका अनुसार उनलाई बेवास्ता गरेर ओलीले यात्राको थालनी गरेका हुन् । यसो हुनुको कारण भने गत फागुनमा सञ्चालन मिसन ग्रास रुट अभियानलाई लिएर ओली र रावतबीच कडा मतभेद हुनु र रावललाई बाहिर राखेर सुदूरपश्चिम प्रदेश अधिवेशन गर्नु ठानिएको छ ।
किन मध्यपहाडमा एमाले
देश विकास भइरहँदा पनि राजावादी दल राप्रपा र दुर्गा प्रसाईंको समूहले निराशा फैलाउने कोशिस भइरहेको भन्दै ओलीको दल एमाले असन्तुष्ट छ । यसलाई चिर्दै देश बन्ने र बनिरहेको आशा र विश्वास जनतामा जगाउन पनि अभियानको औचित्य हुने एमाले उपाध्यक्ष युवराज ज्ञवालीले बताए ।
उनका अनुसार कम्युनिस्ट पार्टी स्थापना भएको ७५ वर्ष पूरा भएको र यसबीचमा कम्युनिस्ट पार्टीहरूले देशको विकास र समृद्धिका लागि गरेका मूलभूत गतिविधिबारे जनतालाई थाहा दिन पनि अभियान सञ्चालन गर्न लागिएको हो । एमालेले अभियान सञ्चालन गर्न लागेको राजमार्गको पूरा नाम भने ‘पुष्पलाल मध्यपहाडी लोकमार्ग’ हो ।
नेकपाका संस्थापक महासचिव पुष्पलाल श्रेष्ठको नामबाट लोकमार्गको नाम राखिएको हो । उनै पुष्पलाल र २००६ सालमा नेकपा स्थापना गरिँदाको इतिहासलाई वर्तमान कम्युनिस्ट आन्दोलनसँग जोड्न पनि अभियान महŒवपूर्ण हुने दाबी एमालेको छ ।
तर, अभियानलाई भने अवरोध पु¥याउने पहिचानवादीहरूको तयारी छ । उनीहरूले अध्यक्ष ओली, सचिव योगेशकुमार भट्टराईसहितका नेताहरूलाई अभियानमा सहभागी नगर्न चेतावनी नै दिएका छन् ।
भट्टराई सवार गाडीमा त सोमबार ताप्लेजुङको फुंलिङमा तोडफोड नै भयो । ओली, भट्टराईसँगै प्रदेशका ८२ जना सांसदका कारण प्रदेशको नाम कोशी राखिएको भन्दै पहिचानवादीहरू असन्तुष्ट छन् ।
०००
-1752335779.jpg)
