- घेराबन्दी गर्नेहरू सत्ता गठबन्धन, पहिचानवादी र दुर्गा प्रसाईं नेतृत्वको समूह
- घेराबन्दी तोड्न एमालेलाई सकस
- आगामी राष्ट्रिय सभा निर्वाचनमा पनि एमालेलाई एक्ल्याउने संकेत
काठमाडौं– संसद्को प्रमुख विपक्षी दल नेकपा एमाले चौतर्फी घेराबन्दीमा परेको छ । घेराबन्दी गर्नेहरू सत्ता गठबन्धन, पहिचानवादीहरू र दुर्गा प्रसाईं नेतृत्वको महाअभियान हुन् । मधेसवादी दलहरूको घेराबन्दी भने राजनीतिकरूपमा जनमतका आधारमा एमालेले तोडिसकेको छ । गत निर्वाचनमा मधेसको सर्वाधिक ठूलो शक्ति हुनुलाई एमालेले मधेसवादी दलहरूको घेरा तोडेको अर्थमा व्याख्या गर्दै आएको छ । एमालेलाई अहिले मधेसमा राजनीतिक गतिविधि गर्न सहज पनि छ ।
तर, एमालेमाथि अहिले सत्ता गठबन्धन, पहिचानवादीहरू र प्रसाईं समूहको घेराबन्दी कायमै छ । यसप्रति एमाले असन्तुष्ट छ । ‘मुख्य रूपमा लोकतान्त्रिक गणतन्त्र संस्थागत गर्नुपर्छ, प्राप्त राजनीतिक उपलब्धिहरूको रक्षा गर्नुपर्छ, सुशासन र समृद्धिको बाटोमा तीव्र गतिमा देशलाई लानुपर्छ भन्ने धारको नेतृत्व एमालेले गर्दै छ,’ एमाले प्रमुख सचेतक पदम गिरीले प्रभावसँग भने, ‘तर, नेपाल र नेपालीको हित नचाहने देशीविदेशी शक्तिहरू एमालेलाई कमजोर पार्न लागेका छन् । यो ठीक छैन ।’
नेपाल र नेपालीको हित नचाहने देशीविदेशी शक्तिहरू एमालेलाई कमजोर पार्न लागेका छन् । यो ठीक होइन ।
पदम गिरी- प्रमुख सचेतक, एमाले
एमाले र यस दलका नेताहरूप्रति अहिले कोशीमा पहिचानवादीहरूले प्रतिरोध गरिरहेका छन् । सचिव योगेशकुमार भट्टराईको गाडी शनिबार गृहजिल्ला ताप्लेजुङमा तोडफोड भयो । अध्यक्ष केपी शर्मा ओली र प्रदेशको नाम ‘कोशी’ राख्ने एमालेसहितका ८२ जना सांसदहरूको विरुद्धमा उनीहरू छन् ।
शुक्रबार पहिचानवादीहरूले विज्ञप्ति जारी गर्दै ओली, भट्टराईसहितका नेताहरू पहिचान विरोधी भएको र आदिवासी जनजातिलाई दबाउन खोजेको भन्दै उनीहरूलाई अभियानमा सहभागी नगराउन चेतावनी दिएका थिए । अभियानमा नभए पनि गृहजिल्ला पुगेका सचिव भट्टराईको गाडी सोही दिन तोड्फोड भयो । यसअघि गत वैशाखको दोस्रो साता ओली गृहजिल्ला झापा हुँदै इलाम, पाँचथर र तेह्रथुम जाँदा पनि पहिचानवादीहहरूले ठाउँ–ठाउँमा ओलीलक्षित ढुंगामुढा गरेका थिए ।
यसरी पहिचानवादीहरूको प्रतिरोध सामना गरिरहँदा विवादित मेडिकल व्यवसायी दुुर्गा प्रसाईं नेतृत्वको समूह पनि एमालेलाई घेराबन्दी गर्न आइपुुगेको छ । व्यवस्था परिवर्तनका लागि प्रदर्शन गरिएको भनिए पनि समूह संयोजक प्रसाईं सरकारभन्दा ओली र उनी नेतृत्वको एमालेविरुद्ध बारम्बार खनिँदै आएका छन् । अनेक लाञ्छना पनि लगाउँदै आएका छन् । उनले कात्तिकको तेस्रो साता कम्बोडियाको एक दूरसञ्चार कम्पनीमा अध्यक्ष ओलीको लगानी तीन हजार करोड रहेको आरोप लगाएका थिए । यसको प्रतिवाद ओली र नेता महेश बस्नेतले गरिसकेका छन् । तर, यही ७ मंसिमार प्रसाईं समूहले गरेको प्रदर्शन ओली नेतृत्वको एमाले र सरकारविरुद्ध थियो ।
पहिचानवादीहरूपछि प्रसाईं समूह एमालेलाई घेर्नेगरी सडकमै ओर्लिएको हो । भलै अहिले प्रसाईं समूह शक्ति प्रदर्शन गर्न असमर्थ छ । तर, प्रभावसँग प्रसाईंले ओलीको आलोचना गर्दै भने, ‘उहाँ बढी छुद्र हुुनुहुुन्छ र उहाँको दल एमाले भ्रष्ट र तस्करहरूको हो । म यसविरुद्धमा छु ।’
एमालेको मूल नेतृत्व अझै पनि दक्षिणपन्थतिर उन्मुख छन् । नसच्चिएसम्म हातेमालो हुँदैन ।- देवेन्द्र पौडेल, सचिव, माओवादी केन्द्र
सत्ता गठबन्धन दलहरू भने एमालेलाई अझै पनि प्रतिगमनको कित्तामा उभिएको शक्ति मान्छन् । संविधानबाट संस्थागत भएको संघीय लोकतान्त्रिक गणतन्त्रलाई मास्न खोज्ने र संविधान च्यात्न खोज्ने शक्तिको रूपमा टिप्पणी गर्छन् । यही तर्क अघि सार्दै गठबन्धन दलहरू २९ असार २०७८ देखि एमालेको विरुद्धमा छन् । राष्ट्रिय सभा, स्थानीय, प्रदेश, प्रतिनिधिसभा निर्वाचन एमालेलाई अलग कित्तामा राखेर चुनाव लडे । अहिले देशभरका सबै प्रदेश र संघीय सरकारमा पनि गठबन्धन छ । एमाले प्रमुख विपक्षी दलको हैसियतमा छ । अर्थात् एमाले सत्ताविमुख छ ।
आगामी ११ माघका लागि प्रस्ताव भएको राष्ट्रिय सभा निर्वाचनमा पनि गठबन्धनले एमालेलाई एक्ल्याउन सक्ने सम्भावना देखिएको छ । नेकपा माओवादी केन्द्रका सचिव देवेन्द्र पौडेलका अनुसार एमालेसँग राजनीतिक सहकार्य गर्न सकिने आधार तय भइसकेको छैन । उनी भन्छन्, ‘एमालेको मूल नेतृत्व अझै पनि दक्षिणपन्थतिर उन्मुख छन् । नसच्चिएसम्म हातेमालो हुँदैन ।’
पौडेलको भनाइले एमालेविरुद्ध गठबन्धन अझै कायम हुने संकेत गरेको छ । उसो त प्रधानमन्त्रीसमेत रहेका माओवादी अध्यक्ष पुष्पकमल दाहाल, कांग्रेस सभापति शेरबहादुर देउवा, जसपा अध्यक्ष उपेन्द्र यादव, नेकपा एकीकृत समाजवादीका अध्यक्ष माधवकुमार नेपाललगायत गठबन्धनका नेताहरूले गठबन्धन पाँचै वर्ष टिक्ने बताउँदै आएका छन् ।
एमालेका अनुसार राष्ट्रवादी शक्तिलाई छेक्ने काम भइरहेको छ । दलका प्रमुख सचेतक गिरीले भने, ‘यो देशको प्रगतिशील पार्टी एमाले हो । राष्ट्रवादी शक्ति एमाले हो । जनताको लोकप्रिय पार्टी एमाले हो । यही पार्टीलाई रोक्ने काम भइरहेको छ । तर, यो सफल हुँदैन ।’
एमाले बारम्बार सत्ता गठबन्धन ढाल्न प्रत्यनशील छ । यसअघि कोशी प्रदेशमा कांग्रेसको डा. शेखर कोइराला पक्षलाई हातमा लिएर एमालेले सरकार ढाल्ने कोशिस नै ग¥यो । अन्तिममा सकेन । अहिले पनि एमाले नेताहरू गठबन्धनले देशलाई दुर्घटनातिर लाने भन्दै आलोचना गरिरहेका छन् ।
-1752335779.jpg)
