- प्रदर्शनमा आएकाहरू घर फर्किए
- अपेक्षित प्रदर्शन गर्न प्रसाईं असफल
- युट्युबरसँग अन्तर्वार्ता दिँदै दिन कटाउँदै प्रसाईं
- राजतन्त्रको नारा छाडेर जनतन्त्रको वकालत
काठमाडौं– केही हजार मानिसलाई गत बिहीबार काठमाडौंको बल्खुमा आयोजित प्रदर्शनमा उतारेर व्यवस्था परिवर्तनका लागि ‘जनविद्रोह’ सुरु गरेको भनेर दाबी गरेका विवादित मेडिकल व्यवसायी दुर्गा प्रसाईं नेतृत्वको अभियान शिथिल बनेको छ । प्रदर्शनका लागि देशका विभिन्न स्थानबाट आएकाहरू राजधानीबाट धमाधम फर्किएका छन् । उनी प्रदर्शन गर्नै नसक्ने अवस्थामा पुगेका छन् । घोषित कार्यक्रमअनुसार आइतबार प्रदर्शन गर्न उनी असफल नै भए ।
भक्तपुरको सानोठिमीस्थित घरमै केही सातादेखि राखिएका करिब ६० जना लघुवित्त र सहकारीका ऋणीहरूलाई भने एकैछिन ¥यालीमा सहभागी गराए । प्रदर्शन गर्न नसक्नुको दोष भने प्रसाईंले जाडो बढ्नुलाई दिएका छन् ।‘मान्छेहरू बस्थे । तर, यहाँ (काठमाडौंमा) चिसो बढेको छ । कति थेग्न सकिन्छ र चिसो ? सकिँदैन नि,’ उनले प्रभावसँग भने, ‘तर, अभियान रोकिँदैन । देशभर भइरहन्छ ।’
आइतबार काठमाडौंको सिफल चौरमा गरेको प्रदर्शनमा ५०० जना मानिस सहभागी गराउन पनि प्रसाईंलाई हम्मे भयो । यसपछि प्रसाईंले ‘लज्जास्पद प्रदर्शन’ गर्न नचाहेको उनीनिकट एक नेताले बताए । ती नेताका अनुसार अहिले प्रदर्शनका लागि आएकाहरू झन् घटेका छन् । जबकि, प्रसाईंले उनीहरूलाई चामल र गुन्द्रुक बोकेर आजसम्म प्रदर्शन गर्नका लागि आउन आह्वान गरेका थिए । प्रदर्शन गर्नुको कारण संघीय लोकतान्त्रिक गणतन्त्रात्मक व्यवस्थामा लघुवित्त, सहकारी र बैंकहरूबाट जनता पीडित भएको र यसबाट मुक्तिका लागि व्यवस्था नै परिवर्तन गर्नुपर्ने उनको धारणा थियो । त्यसका लागि १ फागुन २०५२ मा तत्कालीन नेकपा माओवादीको नेतृत्वमा भएजसरी जनविद्रोह गर्नुपर्ने बताएका थिए । तर, उनले भनेको ‘जनविद्रोह’ सामसुम भइसकेको छ ।
मान्छेहरू बस्थे । तर, यहाँ चिसो बढेको छ । कति थेग्न सकिन्छ र चिसो ? सकिँदैन नि । तर, अभियान रोकिँदैन । देशभर भइरहन्छ ।- दुर्गा प्रसाईं, विवादित व्यवसायी
उसो त चारवटै सुरक्षा संगठनहरू नेपाली सेना, नेपाल प्रहरी, सशस्त्र प्रहरी र राष्ट्रिय अनुसन्धान रहेको राष्ट्रिय सुरक्षा परिषद्ले गत बिहीबार नै दुई दिन पनि प्रसाईं नेतृत्वको समूहले प्रदर्शन गर्न नसक्ने निष्कर्ष निकालेको थियो ।प्रसाईं नेतृत्वमा ‘राष्ट्र, राष्ट्रियता, धर्म, संस्कृति र नागरिक बचाऊ महाअभियान’ नामक समूह छ । हिन्दू धर्मगुरु, राजावादी र धर्मनिरपेक्ष विरोधीहरू आबद्ध उक्त समूहले पहिले दाबी गरेअनुसार लगातार प्रदर्शन गर्न सकेन । प्रहरीले शुक्रबार एकै दिनमा आन्दोलनलाई नियन्त्रणमा लियो । यसपछि प्रसाईं युट्युबरसँग अन्तर्वार्ता दिएर दिन कटाउन थालेका छन् ।
यद्यपि हाँक दिँदै उनले भने, ‘यो कुरा बुझ्नुहोस् कि यी गणतन्त्रवादीहरूले एकदिन सत्ता छाड्नुपर्छ । दुर्गति हुन्छ, हुन्छ ।’उनी नेतृत्वको समूह भने शक्तिहीन देखिएको छ । समूहमा आबद्ध राजावादीहरू पनि अलग हुन थालेका छन् । यसपछि प्रसाईंले आफू राजतन्त्र फर्काउनेभन्दा पनि संघीय लोकतान्त्रिक गणतन्त्र ढालेर जनतन्त्र र हिन्दू राष्ट्र कायम गर्ने पक्षमा रहेको बताउन थालेका छन् । उनका अनुसार जनतन्त्रमा जनताका प्रतिनिधिहरू शासक हुन्छन् । यससँगै उनी आफूलाई राजतन्त्रभन्दा पनि वैदिक सनतान हिन्दू धर्म सापेक्ष हिन्दू राज्य कायम होस् भन्ने पक्षमा रहेको बताए ।
यसअघि बिहीबार बल्खुमा आयोजित प्रदर्शनमा उनले पूर्वराजा ज्ञानेन्द्र शाहको उपस्थिति चाहन्थे । तर, शाहले उनको प्रदर्शनलाई बेवास्ता गरे । प्रदर्शनप्रति सहानुभूतिसमेत प्रकट गरेनन् । बरु, राजेन्द्र लिङ्देन अध्यक्ष रहेको राष्ट्रिय प्रजातन्त्र पार्टी (राप्रपा)ले शनिबार गरेको प्रदर्शनका लागि शुक्रबार साँझ नै झापाको विर्तामोडतर्फ लागेका थिए । यसपछि प्रसाईं शाहसँग रुष्टमात्रै भएका छैनन्, आफू राजतन्त्रको पक्षमा नभएको बताउन थालेका छन् । यसो भन्दा राजावादीहरू बिच्किएका छन् । परिणामतः प्रसाईं अहिले प्रदर्शन नै गर्न नसक्ने अवस्थामा पुगेका हुन् ।
राप्रपा अध्यक्ष लिङ्देनले यसअघि नै प्रसाईंलाई लक्षित गर्दै जनताले बैंकमा बचत गरेको रकम ऋणको रूपमा लिएर नतिर्ने बेइमानीले राजतन्त्र र हिन्दू राष्ट्र पुनःस्थापना गर्छु भन्नु पत्यारलाग्दो कुरो नभएको टिप्पणी गरेका थिए । उनले प्रसाईंको प्रदर्शनलाई समर्थनसमेत जनाएनन् । पार्टीका वरिष्ठ उपाध्यक्ष रवीन्द्र मिश्र र प्रवक्ता ज्ञानेन्द्र शाहीले भने समर्थन जनाए ।
‘लौरो र अटेरी’को काँध
गत वर्ष भएको प्रदेश र प्रतिनिधिसभा चुनावका बेला ‘स्वतन्त्र तथा वैकल्पिक शक्तिको लौरो अभियान’मा संगठित भएका स्वतन्त्र उम्मेदवारहरू नै अहिले दुर्गा प्रसाईं नेतृत्वको समूहमा देखिएका छन् । देशलाई राजतन्त्र र हिन्दू राष्ट्र पुनःस्थापनाको दिशामा अघि बढाउन प्रसाईंलाई उनीहरूको साथ रहेको खुलेको छ ।
प्रसाईं नेतृत्वमा रहेको समूहको नीति निर्माण तहमा काम गर्दै आएका डा. नवीन मण्डलका अनुसार मुलतः लौरो अभियानकै साथ पाएपछि प्रसाईं अघि बढेका हुन् । ‘लौरो’ प्रदेश र प्रतिनिधिसभा चुनावको एउटा चिह्न हो । सोही चिह्नधारी अधिकांश स्वतन्त्र उम्मेदवार र समर्थकहरू हाल हाम्रो नेपाली पार्टीमा आबद्ध छन् । पार्टी अध्यक्ष भने अनन्तराज घिमिरे हुन् । यस पार्टीका बागमती प्रदेश संसद्मा दुई जना समानुपातिक सांसद छन् ।
जनमत भएको यही दलको समर्थन प्रसाईंले अहिले पाएका हुन् । उनलाई पोखरामा स्थानीय तह चुनावका बेला प्रभावशाली देखिएको ‘अटेरी अभियान’को पनि सहयोग रहेको पाइएको छ । अटेरी अभियान लेखक तथा स्तम्भकार गणेश पौडेलले चलाएका हुन् । उनै पौडेल प्रसाईंको समूहमा आबद्ध रहेको डा. मण्डलले बताए ।
प्रधानमन्त्रीको एक तीर, दुई निशाना !
व्यवस्था परिवर्तनलाई मूल एजेण्डा बनाएर प्रदर्शनमा उत्रिएका दुर्गा प्रसाईं प्रधानमन्त्री पुष्पकमल दाहालप्रति निकै नरम भएर प्रस्तुत हुँदै आएका छन् । आइतबार त उनले दाहालसँग उच्च राजनीतिक संस्कार रहेको भन्दै प्रशंसा गरे । यतिसम्म कि व्यवस्था परिवर्तनका लागि आफूले थालेको प्रदर्शनका लागि प्रधानमन्त्री दाहालसँग पैसा मागेको पनि दाबी गरे । तर, प्रधानमन्त्री दाहालले हाँसेर टारेको उनी बताउँछन् ।
‘मैले त प्रधानमन्त्री प्रचण्डलाई यो गणतन्त्र फ्याँक्नलाई मलाई सहयोग गर्नुहोस् भनेर पैसै मागें । तर, हाँस्नुमात्रै भयो,’ प्रसाईंले भने, ‘उहाँ केपी शर्मा ओलीजत्तिको छुद्रो हुनुहुन्न । शालीन हुनुहुन्छ ।’प्रसाईंको यस्तो अभिव्यक्तिले कतै प्रसाईं र उनको समूहलाई प्रधानमन्त्री दाहालले एमालेविरुद्ध प्रदर्शनमा उतारेका त होइनन् ? शंका गर्नेहरू पनि छन् । फेरि, प्रधानमन्त्री दाहाल ती नेता हुन्, जसको चाहनाअनुसार एमालेविरुद्धको वर्तमान सत्ता गठबन्धन बनेको हो ।
एमाले भने दाहाल नेतृत्वको गठबन्धन सरकार ढाल्ने प्रयासमा छ । संसद्मै प्रतिनिधित्व गर्दै आएको अर्को दल राष्ट्रिय प्रजातन्त्र पार्टी (राप्रपा) पनि दाहाल नेतृत्वको सरकारको टाउको दुखाइ बन्दै आएको छ । राजतन्त्र र हिन्दू राष्ट्रको मुद्दा सडकदेखि संसद्सम्मै चर्कोगरी उठाउँदै आएको छ । यहीबेला प्रसाईंलाई उचालेर एमाले र राप्रपालाई एकैपटक प्रहार गर्ने नीति प्रधानमन्त्री दाहालले अख्तियार गरेको हुन सक्ने विश्लेषण पनि हुँदै आएको छ ।
शनिबार राप्रपाले झापामा पूर्वराजा ज्ञानेन्द्र शाहलाई उपस्थित गराएर गरेको शक्ति प्रदर्शन छायामा पर्नुलाई पनि यस विषयसँग जोडिएको छ । यसबीच माओवादी प्रसाईंको अभियानप्रति मौन पनि छ । जबकि, प्रसाईं नेतृत्वको समूहले विरोध गर्दै आएको संघीय लोकतान्त्रिक गणतन्त्रको सच्चा पहरेदार माओवादीले आफूलाई ठान्ने गरेको छ ।
