काठमाडौं– प्रमुख विपक्षी दल नेकपा एमालेको प्रदेश अधिवेशन जारी रहँदा अध्यक्ष केपी शर्मा ओलीले नेताहरूलाई प्यानल बनाएर गुटगत चुनाव नलड्न बारम्बार निर्देशन दिइरहेका छन् ।एमालेमा गुटको कुनै स्थान नभएको बताउने गरेका ओलीको त्यस्तो निर्देशन भने नेताहरूले एकपछि अर्को प्रदेश अधिवेशनमा अवज्ञा गरिरहेका छन् । त्यसका लागि प्यानल खडा गरेर गुटगत राजनीतिको अभ्यासमा प्रदेशका नेताहरू देखिएका छन् । यसलाई कतिपयले भने ओलीविरुद्धको विद्रोहको रूपमा लिएका छन् ।
देशभरका सात प्रदेशमध्ये अधिवेशन सम्पन्न भइसकेको लुम्बिनी प्रदेशमा नेताहरू प्यानल खडा गरेर चुनाव लडेको केही दिनमै बाग्मती प्रदेशमा पनि प्यानलसहित चुनाव लड्ने सुरमा नेताहरू देखिएका छन् । कैलाश ढुंगेल र कृष्णप्रसाद दाहाल प्यानल खडा गरेर चुनाव लड्न लागेका छन् । बुधबार अध्यक्षमा पाँच जनाको उम्मेदवारी परेकोमा सानु श्रेष्ठ र केशर बुढाथोकीले दाहाललाई समर्थन गर्दै उम्मेदवारी फिर्ता लिए भने केशव पाण्डेले ढुंगेललाई समर्थन गरेका छन् । ढुंगेललाई महासचिव शंकर पोखरेल र महेश बस्नेतको साथ रहेको छ भने दाहाललाई उपाध्यक्ष विष्णु पौडेल र गोकुल बास्कोटाको साथ छ ।
ओलीले महासचिव शंकर पोखरेल, उपमहासचिव प्रदीप ज्ञवाली, विष्णु रिमाल, प्रदेश इन्चार्ज गुरु बराललगायतलाई सहमतिमै पदाधिकारीदेखि सदस्यसम्मै चयनका लागि खटाएका थिए । तर, सहमतिको प्रयास असफल भएको प्रदेश इन्चार्ज बरालले प्रभावसँग बताए ।‘अध्यक्ष कमरेडले प्यानल बनाएर चुनाव नलडाउनुहोस् भन्नुभयो । सोहीअनुसार सहमतिको प्रयास भएको हो तर सफल भएनौं’, उनले भने, ‘अब शुक्रबार चुनाव हुन्छ ।’
अध्यक्ष ओलीले घोषितरुपमा प्यानल बनाए कारबाही गर्नेसम्मको चेतावनी दिइसकेका छन् । बिहीबार कर्णाली प्रदेशको अधिवेशनको खुला सत्रलाई सम्बोधन गर्ने क्रममा ओलीले नेतृत्वको निर्देशन मान्नुपर्ने पनि बताए । यदि, कुनै पनि हालतमा सहमति नभए प्यानलबिना चुनाव लड्न उनको सुझाव छ ।‘इन्चार्जलाई मेरो अथोरिटी छ । महासचिव पनि यहीँ बस्नुहुन्छ । लिडरसीपको कुरा सुनेर अधिवेशन गर्नुपर्छ’, उनले भने, ‘सहमति नभए चुनाव लड्नुहोस्, एउटाले जित्छ एउटाले हार्छ प्यानल बनाएर नलड्नु होला ।’
अध्यक्ष ओली प्यानलको विरुद्धमा छन् । प्यानलसहित चुनाव लड्दा अन्ततः पार्टीमा गुट खडा हुने भय उनमा देखिएको छ । त्यही भएर उनी प्यानलसहितको चुनावी प्रतिस्पर्धाको विपक्षमा छन् । तर, उनले भनेजस्तो प्रदेश अधिवेशनमा भइरहेको छैन । कर्णाली प्रदेशमा पनि प्यानलसहित चुनाव लड्न नेताहरू तयार भएका छन् । महासचिव शंकर पोखरेल सहमितको प्रयास असम्भव भएपछि काठमाडौं फर्किसकेका छन् ।
अधिवेशनमा प्रदेश संसदीय दलका नेतासमेत रहेका स्थायी कमिटी सदस्य यामलाल कँडेलले नेता गुलाबजंग शाहलाई अध्यक्षमा अघि सारेका छन् । अर्का नेता विनोदकुमार शाहले मीनबहादुर शाहीलाई अध्यक्षको उम्मेदवार बनाएका छन् । उम्मेदवारहरूले प्यानल नै खडा गरेका छन् । पार्टी केन्द्रीय अध्यक्ष ओलीले भने नेता शाहीलाई अध्यक्ष बनाउन दबाब दिएका छन् । यद्यपि, उनको नाममा सहमति जुटेन । परिणामतः त्यहाँ पनि चुनाव हुँदैछ । यसरी प्रदेशहरूको अधिवेशनमा ओलीको चाहनाविपरीत प्यानलसहित चुनाव भइरहेको हो ।
२३ फागुन २०७७ मा सर्वोच्च अदालतको आदेशपछि नेकपा विघटन हुँदै एमाले ब्युँतिएपछि पार्टीका हरेक कमिटीका सदस्यदेखि पदाधिकारी ओली मनमौजी ढंगले छनोट गर्थे । यतिसम्मकि उनले २०७८ मंसिरमा चितवनमा भएको पार्टीको १०औं महाधिवेशनबाट मनमौजी पदाधिकारीदेखि केन्द्रीय सदस्यसम्म छाने । पार्टीको वडादेखि स्थानीय तह हुँदै प्रदेश तथा संघीय निर्वाचन क्षेत्र हुँदै जिल्ला तहसम्मका अधिवेशनमा पनि ओलीले प्यानलसहित चुनाव लड्न घोषितरूपमै नेता कार्यकर्तालाई प्रतिबन्ध लगाए । तर, यसपटक प्रदेश अधिवेशनमा भने उनको निर्देशनको अवज्ञा भइरहेको छ ।
एमाले उपाध्यक्ष अष्टलक्ष्मी शाक्य प्रदेश अधिवेशनमा नेताहरू चुनाव लड्नु अन्यथा नभएको बताउँछिन् । उनलाई चुनाव लडेर नेतृत्वमा स्थापित हुन चाहने कार्य लोकतान्त्रिक पद्दतिको उपज लाग्छ । ‘सके सहमतिमै नेतृत्व छान्दा राम्रो । तर, चुनाव लड्नु पनि नराम्रो चाहिँ होइन । यसलाई अन्यथा मान्नु हुँदैन । किनभने लोकतन्त्रमा चुन्ने चुनिने हुन्छ’, उनले भनिन् ।
यही असोजको तेस्रो साता हुने भएको सुदूरपश्चिम प्रदेश अधिवेशनमा त झन् अहिलेदेखि नै नेताहरू तीनवटा प्यानलसहित चुनाव लड्ने तयारीमा देखिएका छन् ।
ओलीनिकट नेता कर्ण थापाले अछामका कृष्णप्रसाद जैसी, पूर्वमाओवादी नेता लेखराज भट्ट र प्रदेशका वर्तमान अध्यक्ष दामोदर भण्डारीले बाजुराका लालबहादुर थापा नेतृत्वमा प्यानल बनाउने कसरत गरिरहेका छन् । नेता भीम रावलले अघोषितरूपमा नेता झपट रावललाई अध्यक्षमा अघि बढाउन लागेका छन् ।गण्डकी प्रदेशमा पनि उपमहासचिव पृथ्वीसुब्बा गुरुङ र नेता खगराज अधिकारीले आ–आफ्ना गुट खडा गरेका छन् । यी दुई नेताबीच गण्डकीमा लामो समयदेखि शक्ति संघर्ष पनि चल्दै आएको छ ।
अध्यक्ष ओलीकै गृहप्रदेश कोशीमा पनि नेताहरू प्यानलसहित चुनाव लड्न लागेका छन् । मधेस प्रदेशमा पनि स्थिति त्यस्तै छ । जबकि, ओलीको भने प्यानलसहित चुनाव नलड्न पटकपटक निर्देशन छ । तर, ओलीको निर्देशन प्रदेश अधिवेशनहरूमा पूरै अवज्ञा भइरहेको देखिएको छ ।
