रुकुम पश्चिम - स्यार्पु तालको छेउमै पर्यटन व्यापार तथा सांस्कृतिक महोत्सव हुने भएको छ । बाँफिकोट गाउँपालिकाको आयोजना र राष्ट्रिय लोक तथा दोहोरी गीत प्रतिष्ठानको व्यवस्थापनमा राष्ट्रिय कलाकारको प्रस्तुति तथा व्यापारिक स्टल सहितको महोत्सव हुने भएको हो ।
स्यार्पूमा विगत १३ वर्ष देखि खेलकुद र स्थानीय झाँकी तथा नाच गान सहित मेला लाग्दै आएको छ । तर यो पटक भने राष्ट्रिय कलाकारको प्रस्तुति र व्यापारिक स्टल सहितको ठुलो महोत्सव आयोजना गरिएको राष्ट्रिय लोक तथा दोहोरी गीत प्रतिष्ठान रुकुम पश्चिमका अध्यक्ष तुल देवकोटाले जानकारी दिए ।
स्यार्पु ताल बाँफीकोट गाउँपालिकास्थित वडा नम्बर ३ र ५ मा फैलिएको छ ।सुन्दर टापुमा अवस्थित उक्त ताल र वरपरको दृश्य निकै मनोरम रहेको छ । स्यार्पू तालमा पहिलो पटक २०६७ साल असोज ११ गते देखि १५ गतेसम्म स्यार्पू महोत्सव लागेको थियो । त्यसैको सम्झनामा स्यार्पूमा हरेक वर्ष एक साताको महोत्सव हुने गरेको छ ।पर्यटकीय स्यार्पु तालको संरक्षण प्रवर्धन र प्रचारप्रसार गर्ने उदेश्य रहेकाे गाउँपालिकाले जनाएको छ ।
पर्यटकीय दृष्टिले प्रचुर सम्भावना बोकेको स्यार्पु ताल उचित संरक्षण र सरकारको बेवास्ताका कारण पुरिएर लोप हुने सम्भावना बढ्दै गएको छ । तालको चारैतर्फ मिलेर बनेका वस्ती, नजिकै रहेको स्यानीदह, दादुरे ताल, सिमैछरी झरना र स्यार्पुसम्म पुग्दा सोही बाटो भएर सुसाउँदै बहने सानीभेरी नदीको दृश्यले अझ स्यार्पुको महत्वलाई दर्साएको छ ।
स्थानीय भेषभुषा, संस्कृति, आधुनिक डुंगा शयर तथा अर्गानिक वस्तुको प्रर्दशन हुने गाउँपालिकाले जनाएको छ । महोत्सवमा ब्याटमिन्टन, महिला पुरुष भलिवल प्रतियाेगिता हुने मेला व्यवस्थापक समितिले जनाएको छ । असोज ११ देखि २१ गतेसम्म महोत्सव हुने आयाेजकले जनाएकाे हो । असोज ११ गतेदेखि असोज २१ गतेसम्म बाँफिकोट गाउँपालिका ३ मा महोत्सव हुने भएको हो ।
महोत्सवमा गायक बद्री पङ्गेनी, रामजी खाँड, सुप्रिम मल्ल ठकुरी, गायिका ज्योति मगर लगायतका राष्ट्रिय स्तरका कलाकारहरू आउने देवकोटाले बताए। कलाकारका विषयमा अझै छलफल चलिरहेकोले थप कलाकारका बारेमा पछि थाहा हुने उनको भनाई छ । त्यस्तै महोत्सवमा विभिन्न व्यापारिक स्टलहरू रहने छन् भने भलिबल लगायतका खेलकुद प्रतियोगिता पनि सञ्चालन हुने उनले बताए ।
उनका अनुसार स्थानीय झाँकीहरू समेत महोत्सवको आकर्षण हुने छन् भने स्थानीय उत्पादनलाई प्राथमिकता दिइने छ । बाँफिकोट गाउँपालिका आयोजकका रूपमा रहने छ भने महोत्सवको अन्य सबै व्यवस्थापन राष्ट्रिय लोक तथा दोहोरी गीत प्रतिष्ठानले गर्ने छ । खेलकुदका लागि बाँफिकोट गाउँपालिकाले रकम छुटाएको छ भने अन्य सबै खर्चको व्यवस्थापन पनि प्रतिष्ठानले नै गर्ने बताइएको छ ।
