काठमाडौं– नेपाल सरकारबाट वैदेशिक रोजगारसम्बन्धी व्यवसाय सञ्चालन गर्न देशभर ८६७ वटा म्यानपावर कम्पनीले इजाजतपत्र लिएका छन् । यी नै म्यानपावर कम्पनीमार्फत वैदेशिक रोजगारीका लागि बर्सेनि लाखौंको संख्यामा नेपाली युवा विदेशिने गरेका छन् । व्यक्तिगत श्रम स्वीकृति लिएर रोजागारीका लागि विदेश जाने प्रावधान भए पनि संस्थागतरुपमा जाने कामदारको हिस्सा ठूलो रहेको वैदेशिक रोजगार विभागको तथ्यांकले देखाएको छ ।
कोभिड–१९ को महामारीले थला पारेको नेपालको वैदेशिक रोजगारीका क्षेत्र आर्थिक वर्ष २०७८/७९ पछि पुरानै लयमा फर्किंदै छ लाख ३० हजार नेपाली रोजगारीका लागि विदेश पुगे । गत आर्थिक वर्ष २०७९÷८० मा पनि वैदेशिक रोजगारीका लागि जाने कामदारहरुको संख्यामा उल्लेख्य वृद्धि भएको तथ्यांक छ । यस आवमा सात लाख ७१ हजार ३२७ नेपाली श्रम स्वीकृति लिएर कामका लागि विभिन्न मुलुक पुगेको तथ्यांक विभागले सार्वजनिक गरिसकेको छ । वैदेशिक रोजगारीको माध्यम बनिरहेका म्यानपावर कम्पनीहरुमध्ये वर्षभरिमा सबैभन्दा धेरै कामदार विदेश पठाउने २० कम्पनीको सूची यहाँ प्रस्तुत गरिएको छ ।
आव २०७९/८० मा सबैभन्दा धेरै संख्यामा नेपाली कामदार विदेश पठाउनेमा द रिभर ओभरसिज पहिलो स्थानमा देखिएको छ । यस कम्पनीमार्फत विभिन्न श्रम गन्तव्य मुलुकमा पाँच हजार ५४६ जना रोजगारीका लागि गएका छन् । दोस्रो स्थानमा इन्टरनेसनल म्यानपावर रिक्रुटमेन्ट प्रालि रहेको छ । यस कम्पनीले पाँच हजार ३३५ जनालाई वैदेशिक रोजगारीमा पठाएको तथ्यांक छ । तेस्रो स्थानमा रहेको निलकमल ह्युमन रिसोर्स प्रालिले उक्त आवभित्र चार हजार २३७ जना नेपालीलाई वैदेशिक रोजगारीमा पठाएको देखिन्छ ।
त्यस्तै वाइड स्पेस इन्टरनेसनल प्रालि तीन हजार ९७९ श्रमिक पठाउँदै चौथो स्थानमा रहेको छ । मोन्टाज ओभरसिज प्रालिले पाँचौं स्थान ओगटेको छ । उक्त कम्पनीले तीन हजार ६४९ जना नेपाली कामदारलाई विदेश पठाएको छ । एक्सेस पार्टनर्स प्रालि तीन हजार ५६४ जना पठाउँदै छैटौं स्थानमा रहँदा एसओएस म्यानपावर सर्भिस प्रालि तीन हजार ४५७ जना पठाउँदै सातौं, मेरिडियन ओभरसिज प्रालि तीन हजार ३७८ जना पठाएर आठौं, मास ह्युमन रिसोर्स प्रालि तीन हजार १७९ जनासहित नवौं र फ्रन्टलाइन रिक्रुटमेन्ट प्रालि दुई हजार हजार ९७३ जना नेपालीलाई वैदेशिक रोजगारीमा पठाएर धेरै कामदार पठाउने म्यानपावर कम्पनीको सूचीमा दशौं स्थानमा परेका छन् ।
विभागले तयार पारेको अभिलेखअनुसार ११औं स्थानमा रहेको ओमेगा इन्टरनेसनल प्रालिले एक वर्षमा दुई हजार ७७७ जना नेपालीलाई रोजगारीका लागि विदेश पठाएको छ । बाह्रौं स्थानमा रहेको साउण्डलाइन्स रिक्रुटमेन्ट प्रालिले दुई हजार ७०२ जना, १३औं स्थानको लक्की एचआर सोलुसन प्रालिले दुई हजार ५४६ जना, १४औं स्थानमा रहेको बिएस ओभरसिज प्रालिले दुई हजार ५२४ जना र १५औं स्थानमा परेको एयर किंग्स प्लेसमेन्ट प्रालिले दुई हजार ४४६ जनालाई वैदेशिक रोजगारीमा पठाएको तथ्यांक छ ।
यसैगरी १६औं स्थानमा रहेको मुस्कान ओभरसिजले दुई हजार ४०१, १७औं स्थानको लिंक इन्टरनेसनल प्लेसमेन्ट सर्भिस प्रालिले दुई हजार ३९१, १८औं स्थानमा रहेको दित्य इन्टरनेसनल प्रालिले दुई हजार ३१० जना नेपालीलाई रोजगारीका लागि विदेश पठाएका छन् । त्यसैगरी १९औं र २०औं स्थानमा क्रमशः पाल्ही ओभरसिज र ट्रस्ट नेपाल ओभरसिज प्रालि परेका छन् । पाल्हीले दुई हजार ३०१ जना र ट्रस्ट नेपालले दुई हजार २३६ जनालाई वैदेशिक रोजगारीमा पठाएका छन् ।
उल्लिखित अधिकांश म्यानपावर कम्पनीहरु अघिल्लो आर्थिक वर्षमा पनि ‘टप २०’भित्रै परेका थिए । यस वर्ष पनि अझ बढी संख्यामा नेपालीहरुलाई रोजगारीका लागि विदेश पठाएर आफ्नो स्थान कायमै राखेका छन् ।
कुन म्यानपावरमार्फत कति श्रमिक विदेशिए
| द रिभर ओभरसिज |
५५४६ |
| इन्टरनेसनल म्यानपावर रिक्रुटमेन्ट |
५३३५ |
| निल कमल ह्युमन रिसोर्स |
४२३७ |
| वाइड स्पेस इन्टरनेसनल |
३९७९ |
|
मोन्टाज ओभरसिज
|
३६४९ |
| एक्सेस पार्टनर्स |
३५६४ |
| एसओएस म्यानपावर सर्भिस |
३४५७ |
| मेरिडियन ओभरसिज |
३३७८ |
| मास ह्युमन रिसोर्स |
३१७९ |
| फ्रन्टलाइन रिक्रुटमेन्ट |
२९७३ |
| ओमेगा इन्टरनेसनल |
२७७७ |
| साउण्डलाइन्स रिक्रुटमेन्ट |
२७०२ |
| लक्की एचआर सोलुसन |
२५४६ |
| बि.एस. ओभरसिज |
२५२४ |
| एयर किंग्स प्लेसमेन्ट |
२४४६ |
| मुस्कान ओभरसिज |
२४०१ |
| लिंक इन्टरनेसनल प्लेसमेन्ट सर्भिस |
२३९१ |
| दित्य इन्टरनेसनल |
२३१० |
| पाल्ही ओभरसिज |
२३०१ |
| ट्रस्ट नेपाल ओभरसिज |
२२३६ |
