- तस्करीको सुन काण्डका मुख्य नाइकेलाई पक्राउ गर्न माग
- सुन काण्डको जरैसम्म नपुगे सरकारको दिनगन्ती सुरु हुने चेतावनी
- एमालेको अवरोधपछि संसद् बैठक स्थगित
- हालसम्म १७ जना पक्राउ, अझै पत्ता लागेन मालिक
काठमाडौं– त्रिभुवन अन्तर्राष्ट्रिय विमानस्थलको भन्सारबाट पास भएपछि पक्राउ गरिएको एक क्विन्टल सुन प्रकरणले संसद् तताएको छ । बुधबारको प्रतिनिधिसभा बैठकमा सत्तापक्ष र विपक्षी दलका सांसदहरूले उक्त तस्करीको सुनका मुख्य नाइके खोजेका छन् ।
एक जना चिनियाँ नागरिकबाहेक भरिया, गोदाम व्यवस्थापक, गाडी चालकदेखि भन्सार कर्मचारी र भन्सार एजेन्टमात्रै पक्राउ परेका बेला बुधबार तस्करका मुख्य नाइकेको खोजी संसद्मा भएको हो । अघिल्ला सुन काण्डहरूमा सुनका मालिक अर्थात् मुख्य नाइके जोगिन्थे । यसपटक पनि जोगाउन सक्ने आशंकामा सांसदहरूले सुन तस्करका मुख्य नाइके खोजेका हुन् ।
राष्ट्रिय स्वतन्त्र पार्टी (रास्वपा)का सभापति रवि लामिछानेले बुधबारको बैठकमा अवैध सुन आयात प्रकरणमा संलग्न मुख्य दोषीलाई जुनसुकै हालतमा पक्राउ पर्नुपर्ने बताए । विमानस्थल बाहिर ट्याक्सीमा सुन आएको थाहा पाएपछि त्यहीँ नसमातेर ट्याक्सी मालिककोमा पुगेपछि समातेको भए मालिक पक्राउ पर्नसक्नेतर्फ किन ध्यान नपुर्याएको भन्दै उनले प्रश्न गरे । सरकारले नक्कली भुटानी शरणार्थी प्रकरण, ललिता निवासको जग्गा प्रकरणलगायतमासमेत जरोसम्म नपुगेर गिजोल्ने काममात्र गरेको आरोप लगाएका लामिछानेले केही कर्मचारीलाई सरुवा गरेर सुन तस्करी प्रकरणलाई टार्न नपाइने बताए ।
ललिता निवास, नक्कली भुटानी शरणार्थी, सुन तस्करीलगायत प्रकरणको जरोसम्म पुग्ने साहस लिएको हो भने ठीक छ । यदि फाइल खोल्ने काममात्र हो भने सरकारको दिन गन्ती सुरु हुन्छ ।
रवि लामिछाने
सभापति, रास्वपा
‘भ्रष्टाचारविरुद्ध चालेको कदममा साथ दिँदा फाइदाका रुपमा मात्र नलिइयोस् । जरोसम्म पुग्ने साहस लिएको हो भने ठीक छ,’ लामिछानेले चेतावनी दिए, ‘फाइल खोलेको गन्नमात्र सुरु गरेको हो भने सरकारको दिन गन्ती सुरु हुन्छ ।’ उनले एकातिर मुख्य सुन तस्कर (मालिक)लाई पक्राउ गर्न सरकारलाई दबाब दिँदा अर्कातिर भ्रष्टाचार काण्डको अनुसन्धान गम्भीररुपमा अघि बढाउनुपर्ने चेतावनीसहितको सुझाव दिए । रास्वपाले प्रतिनिधिसभामा सुन काण्डको अनुसन्धान गराउन सार्वजनिक महŒवको प्रस्तावसमेत दर्ता गरेको छ ।
राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले पनि सुन तस्करको मालिक पक्राउ गर्नुपर्नेमा सरकारलाई दबाब दिए । उनका अनुसार सररले चाहे त्रिभुवन अन्तर्राष्ट्रिय विमानस्थलबाट भइरहेको सुन तस्करीको जरो (मालिक)सम्म पुग्न सक्छ । ‘त्यो सुन कुनै सूचनाको आधारमा बरामद गरियो होला नि त । सूचनाको स्रोत को हो ?,’ आक्रोशित हुँदै लिङ्देनले गृहमन्त्री नारायणकाजी श्रेष्ठलाई सोधे, ‘स्रोतले त्यसमा को–को संलग्न छ भन्ने सूचना दिएन होला ? कि यो कुनै बाह्य दबाब र सूचनाको आधारमा कसैलाई देखाउनकै निम्ति यो एक टिप सुन पक्रने काम भएको हो ?’
उनले भरिया, सुन व्यवस्थापकलगायतलाई मात्रै पक्राउ गरिएको भन्दै असन्तुष्टि व्यक्त गरेका छन् । यसो हुँदा तस्करका नाइके जोगाउने खेल हुनसक्ने उनको आशंका छ । उनले भने, ‘भरियालाई पक्रेर सुन तस्करका नाइकेहरूलाई जोगाउने काम नहोस् ।’
त्यो सुन कुनै सूचनाको आधारमा बरामद गरियो होला नि त । सूचनाको स्रोत को हो ? स्रोतले त्यसमा को–को संलग्न छ भन्ने सूचना दिएन होला ?
राजेन्द्र लिङदेन
अध्यक्ष, राप्रपा
सांसदद्वय लामिछाने र लिङ्देनले मात्रै होइन, सत्तारूढ दल कांग्रेसकै सांसद रामहरि खतिवडाले पनि प्रहरी तस्करको नाइकेसम्म पुग्न नसकेको भन्दै रोष प्रकट गरे । नेपाल सुन तस्करीका लागि उर्वर भूमि हुन लागेको भन्दै जुनसुकै हालतमा प्रहरी नाइकेसम्म पुग्नुपर्नेमा जोड दिए ।‘भरियालाई पक्रिएर मेन नाइकेलाई छोड्न हुँदैन,’ संसद् बैठकमा खतिवडाले भने ।
कांग्रेसकै अर्का सांसद सुनिल शर्माले भने मुख्य नाइकेलाई नपक्रिए क्विन्टल सुन प्रकरणलाई सामसुम पार्नसक्ने भन्दै चिन्ता प्रकट गरे । यदि, त्यसो गरिएको अवस्थामा संसद् भवनभित्रै आमरण अनसन बस्ने शर्माले घोषणा गरे । सुन प्रकरण निकै गम्भीर विषय भएको उल्लेख गर्दै उनले गृहमन्त्री नारायणकाजी श्रेष्ठ र अर्थमन्त्री डा. प्रकाशशरण महतले राजीनामा दिनुपर्ने माग पनि गरे ।
‘गृहमन्त्री र अर्थमन्त्री फेरि त्यही विचरा भुजेललाई पक्रिएर मुख्य नाइकेलाई नपक्री बस्छु भनेर सोच्नुभएको छ भने म यो सदनमा घोषणा गर्न चाहन्छु– प्रधानमन्त्रीको आगमनपछाडि उहाँहरूले पक्राउ गर्नुभएन भने यो सदनभित्र म आमरण अनसन बस्ने घोषणा गर्न चाहन्छु,’ शर्माले बैठकमा भने ।
गृहमन्त्री र अर्थमन्त्रीले फेरि त्यही विचरा भुजेललाई पक्रिएर मुख्य नाइकेलाई नपक्री बस्छु भन्ने सोच्नुभएको छ भने म यो सदनभित्रै आमरण अनसन बस्ने घोषणा गर्न चाहन्छु ।
सुनिल शर्मा
सांसद, कांग्रेस
अन्य सांसदहरूले पनि सुन तस्करका नाइके पक्राउ गर्नुपर्ने भन्दै सरकारलाई दबाब दिए । जवाफमा सत्ता नेतृत्व दल नेकपा माओवादी केन्द्रका सचिव देवेन्द्र पौडेलले सुन काण्डमा टाउको नदुखाउन अन्य दलका सांसदरूलाई आग्रह गरे । उनले सुन प्रकरणसहित अगाडि बढेका भ्रष्टाचारका अन्य फाइलहरू खोल्ने क्रममा दोषी करार हुने गरीका प्रमाण जरोसम्म पुग्न आवश्यक रहेको र यस कार्यमा सरकारले कसैको अनुहार र कुनै दल हेर्न नहुने सुझाए ।
‘सुन तस्करीमा सत्तारूढ दलकै कतिपय नेताहरू दोषी रहेको भनी समाचारहरू प्रकाशन भएको भनी विपक्षी दलहरूले प्रश्न उठाएका थिए,’ पौडेलले भने, ‘माछा सानो ठूलोको प्रसंग होइन यहाँ । दोषीलाई कारबाही गर्ने कुरा हो, दोषीलाई कारबाही गर्दा खुसी हुनुपर्ने हो नि ।’
एमालेको अवरोध
संघीय संसद्को प्रमुख प्रतिपक्षी दल नेकपा एमालेले संसद् अवरोध गरेको छ । विमानस्थल सुन काण्डको निष्पक्ष अनुसन्धान गर्न उच्चस्तरीय छानबिन समिति गठन गर्नुपर्ने माग गर्दै एमाललेले संसद् अवरुद्ध गरेको हो । छानबिन समिति गठनका लागि सभामुख घिमिरेबाट रुलिङ नभएको भन्दै एमालेले प्रतिनिधिसभाको बुधबारको बैठक कार्यसूचीअनुसार अघि बढ्न दिएन ।
सभामुखले आकस्मिक समय सकिएपछि शून्य समयमा बैठकलाई अगाडि बढाउन खोजेका थिए । त्यहीबेला एमाले सांसदहरु बेल घेर्न पुगे । उनीहरुले नाराबाजीसमेत गरे । एमालेको विरोधका कारण सभामुख घिमिरेले कार्यसूचीमा भएका विषयहरू हटाए । अनि, बैठक स्थगित गरे । प्रतिनिधिसभाको अर्को बैठक यही १५ साउनमा बस्ने भएको छ ।
एमालेका सांसद ठाकुर गैरेले सुन तस्करी छानबिनका लागि उच्चस्तरीय समिति गठनको सुनिश्चितता नहुँदासम्म सदन चल्न नसक्ने बताए । सुन तस्करी भइरहने तर भरिया समातेर सामसुम पार्ने प्रवृत्ति विगतमा देखिएकाले पुनः दोहोरिन नदिन छानबिन समिति गठन हुनुपर्ने उनको भनाइ छ ।
