- यस वर्ष अन्तिम पटकका लागि २०७२ सालको पद्धतिअनुसार नै सैद्धान्तिक र प्रयोगात्मकको अंक जोडेर परीक्षाफल प्रकाशित
- अघिल्लो वर्षभन्दा ‘ए प्लस’ र ‘ए ग्रेड’ ल्याउनेको संख्या झण्डैै तीन प्रतिशत बढी
- सामुदायिक र संस्थागत विद्यालयका आधारमा नतिजालाई तुलना गरेर विद्यार्थीबीच विभेद सिर्जना नगर्ने राष्ट्रिय परीक्षा बोर्डको भनाइ
काठमाडौं- यसपटक माध्यमिक शिक्षा परीक्षा (एसइई)को नतिजामा सुधार देखिएको छ । राष्ट्रिय परीक्षा बोर्ड मातहतको परीक्षा नियन्त्रण कार्यालयले बिहीबार सार्वजनिक गरेको एसइई नतिजामा गत वर्षभन्दा सुधार देखिएको हो ।
बोर्डले २०७९ चैतमा सञ्चालित एसइई परीक्षाको परीक्षाफल प्रकाशित गरेको छ ।बोर्डका अध्यक्ष डा. महाश्रम शर्मासहितको उपस्थितिमा भक्तपुरस्थित कार्यालयमा बिहीबार बसेको बोर्डको बैठकले परीक्षाफल प्रकाशित गर्ने निर्णय गरेसँगै परीक्षफल प्रकाशित भएको हो । बोर्डले यस वर्ष अन्तिमपटकका लागि २०७२ सालको पद्धतिअनुसार नै सैद्धान्तिक र प्रयोगात्मकको अंक जोडेर परीक्षाफल प्रकाशित गरेको छ ।
गत चैत १७ गतेदेखि २९ गतेसम्म देशभरका दुई हजार ३७ परीक्षा केन्द्रमा सञ्चालित परीक्षामा सामुदायिक र संस्थागत विद्यालयका साधारणतर्फ कूल चार लाख ८४ हजार ९३९ विद्यार्थीको सहभागिता रहेको थियो । परीक्षामा दुई लाख ४२ हजार ७१२ जना छात्रा र दुई लाख ४२ हजार ६७४ जना छात्रले भाग लिएको बोर्डको भनाइ छ । बोर्डका अनुसार प्राविधिक धारतर्फ १५ हजार ४६१ जना परीक्षार्थी थिए ।
सुध्रिँदो परीक्षाफल
| ग्रेड |
२०७९ |
२०७८ |
| ए प्लस |
२२,४२५ |
९,६३३ |
| ए |
५५,०६९ |
४१,६२७ |
| बी प्लस |
७२,३६२ |
६९,९०० |
| बी |
८९,३३१ |
९०,७५८ |
| सी प्लस |
१०२,२९३ |
११२,७३३ |
| सी |
८८,४४७ |
१००,५९४ |
| डी प्लस |
३८,७७० |
४४,५८६ |
| डी |
२,२०० |
३,२८० |
| ई २२,५३७ |
१३,९९२ |
२२,५३७ |
यसपटकको नतिजा हेर्दा अघिल्लो वर्षभन्दा सुध्रिएको देखिन्छ । अघिल्लो वर्ष ‘ए प्लस’ ल्याउनेको संख्या नौ हजार ६३३ जना रहेकोमा यसपटक यो ग्रेड ल्याउने २२ हजार ४२५ जना रहेका छन् । यो झण्डैै दुई प्रतिशतकै वृद्धि हो ।
त्यसैगरी ‘ए ग्रेड’ ल्याउनेको संख्या पनि यसपटक १३ हजार ४४२ जना बढी थपिएका छन् । अघिल्लो वर्ष ४१ हजार ६२७ जनाले यो ग्रेड पाउँदा यसपटक ‘ए ग्रेड’ ल्याउनेको संख्या ५५ हजार ६९ जना छन् । ‘बी प्लस’मा अघिल्लो वर्ष ६९ हजार ९०० रहेकोमा यसपटक ७२ हजार ३७२ जनाले यो ग्रेड ल्याउन सफल भए ।
एसइईको परीक्षाफल समग्रमा सुधारोन्मुख हुनुमा शिक्षक–विद्यार्थीको मिहेनत र अभिभावकको जागरुकता मुख्य कारण रहेको शिक्षाविद् र शिक्षाकर्मीहरूको बुझाइ रहेको छ । यद्यपि, मध्यमस्तरलाई उत्कृष्टमा उकास्ने चुनौती भने कायमै रहेको देखिन्छ ।
शिक्षाविद् डा. मनप्रसाद वाग्लेले मध्यम विद्यार्थीलाई उत्कृष्टमा उकास्ने योजना अबको आवश्यकता रहेको बताए । शिक्षाविद् प्रा.डा. विद्यानाथ कोइरालाले परीक्षाफललाई सरसर्ती हेर्दा स्थानीय तह र विद्यालयहरूमा एक प्रकारको सुधारको जागरण आएको देखिएको बताए ।
आगामी दिनमा एउटा स्थानीय तह र अर्काे स्थानीय तह तथा एक विद्यालय र अर्काे विद्यालयबीच प्रतिस्पर्धा गराउँदै हरेक विद्यार्थीलाई प्रविधि र सिकाइसँग जोड्न शिक्षकलाई स्तरोन्नति गर्न सक्ने हो भने अझै नतिजा वृद्धि हुने सुझाव दिए ।
नेपाल शिक्षक महासंघकी अध्यक्ष कमला तुलाधरको बुझाइमा सामुदायिक विद्यालयको अवस्था सुधारोन्मुख हुनुमा विद्यालय व्यवस्थापन समितिको जागरुकता, शिक्षकको मिहेनत र समुदायले विद्यालयलाई हेर्ने सकारात्मक दृष्टिकोण एवं सरकारको विद्यालय क्षेत्र सुधार हुँदै विद्यालय शिक्षा क्षेत्र सुधार कार्यक्रमको थालनीले प्रभाव पारेको हो ।
‘कोभिडपछि भौतिक उपस्थितिमा विद्यालयमा पढ्न पाउँदा अभिभावक र विद्यार्थीहरू उत्साहित भएको र कोभिडका समयमा सञ्चार प्रविधिबाट पढ्दा खेप्नुपरेको हैरानीको राम्रो क्षतिपूर्ति मिलेको अनुभव भएको छ,’ नतिजाको सुधारबारे अध्यक्ष तुलाधरले भने ।
बोर्डका अध्यक्ष शर्माले परीक्षा प्रणालीको सुधार र कक्षा कोठाको वातावरणमा सुधार आएमा नतिजामा सुधार आउने भन्दै समग्र नतिजाको मूल्यांकनबारे विस्तृत अध्ययनपछि के आधारमा सुधार आयो भन्न सकिने बताए । उनले सामुदायिक र संस्थागत विद्यालयका आधारमा नतिजालाई तुलना गरेर विद्यार्थीबीच विभेद सिर्जना नगरिने स्पष्ट पारे ।
तोकियो कक्षा ११ मा भर्नाका आधार
एसइईको परीक्षाफल प्रकाशन भएसँगै राष्ट्रिय परीक्षा बोर्डले कक्षा ११ मा भर्ना गर्ने आधारसहित क्याम्पस प्रमुखहरुलाई परिपत्र गरेको छ । बिहीबार बोर्डको प्रदेश परीक्षा व्यवस्थापन कार्यालय बागमती प्रदेशकी कार्यालय प्रमुख जयन्ती सत्यालले प्रधानाध्यापक र क्याम्पस प्रमुखको नाममा उक्त परिपत्र जारी गरेकी हुन् ।
साधारण शिक्षातर्फ कक्षा ११ मा भौतिक विज्ञान, रसायन विज्ञान, जीव विज्ञान र गणित विषय अध्ययन गर्न न्यूनतम औसत ग्रेड प्वाइंट (जिपिए) १.६ प्राप्त गरी कक्षा १० मा अध्ययन गरेका अनिवार्य अंग्रेजी, गणित र विज्ञान विषयमा सी प्लस ग्रेड प्राप्त गरेको हुनुपर्ने परिपत्रमा भनिएको छ ।
यसबाहेक अन्य विषय अध्ययन गर्न न्यूनतम औसत ग्रेड प्वाइन्ट (जिपिए) १.६ प्राप्त गरेको हुनुपर्ने परिपत्रमा भनिएको छ । मौका परीक्षाका भने बोर्डले साउन महिनाको अन्तिममा सञ्चालन गर्नेछ ।
