- भारत भ्रमणपछि सदनमा जवाफ दिन प्रधानमन्त्री पुष्पकमल दाहाल रोस्ट्रममा उभिँदा पनि सभामुख घिमिरेमाथि ‘एमाले’ हाबी भएको आरोप लागेको थियो - सभामुखको हडबडाहडकै कारण अघिल्लो बुधबार ध्वनी मतले पारित गरिसकेको बजेट पुनः मतदानमा लगियो -यो बुधबार पनि सभामुख हडबडिँदा बोलिरहेको सांसदलाई वास्तै नगरी बैठक स्थगित गरिदिए
काठमाडौं- प्रतिनिधिसभाका सभामुख देवराज घिमिरेले सभा सञ्चालनका क्रममा आफ्नो हडबडापन पटक–पटक दोहो¥याउन थालेका छन् । सभामुख चुनिनासाथ विवादमा तानिएका घिमिरेले एकपछि अर्को गर्दै अत्तालिएर सभा सञ्चालन गरेको दृश्य सदनमा देखिन थालेको हो । बुधबार भयो त्यस्तै ।प्रधानमन्त्री पुष्पकमल दाहालको पछिल्लो भनाइलाई लिएर प्रमुख प्रतिपक्षी दल नेकपा एमाले आक्रोशित थियो । बुधबार नै संसदीय बैठक डाकेर एमाले अध्यक्ष केपी शर्मा ओलीले संसद्मा प्रधानमन्त्री दाहालको राजीनामा माग्ने निर्णय गराए । दिउँसो ३ बजेका लागि बेलाइएको संसद् बैठकमा एमाले अध्यक्ष ओली पनि पुगे । हत्तपत्त संसद्मा हाजिर नहुने ओली प्रधानमन्त्रीको राजीनामा माग्ने कार्यक्रम भएपछि पुग्ने नै भयो । बुधबार चारवटा विधेयक सदनमा टेबल गर्ने सम्भावित कार्यसूची थियो । सभामुख देवराज घिमिरेले प्रतिनिधिसभाको औपचारिक सुरुआत गर्नासाथ एमाले र राष्ट्रिय स्वतन्त्र पार्टीले उठेर विरोध जनाए । लगत्तै सभामुखले एमालेका रघुजी पन्तलाई बोल्ने समय दिए । पन्तले नेपालीहरुको मनमा बादल लागेको छ भन्दै प्रधानमन्त्रीको राजीनामाको प्रसंग कोट्याए । ‘आज नेपालीहरुको मनमा बादल लागेको छ, नेपालीहरुको स्वाभिमानमा ठेस लागेको छ,’ पन्तले भने, ‘त्यो पनि अरु कसैबाट होइन । सम्माननीय प्रधानमन्त्रीज्यूबाट । प्रधानमन्त्रीज्यू पनि भनुँ कि नभनुँ लाग्छ कहिलेकहीँ ।’ सरदार प्रितम सिंहकी छोरी किरणदीप सन्धुले लेखेको किताब विमोचन कार्यक्रममा प्रधानमन्त्री दाहालले दिएको अभिव्यक्तिले नेपालीको मनमा बादल लागेको पन्तको भनाइ थियो । प्रधानमन्त्रीको भनाइ पेस गर्दै नेपालको प्रधानमन्त्री बनाउन दिल्लीतिर जानुपर्ने कस्तो बाध्यता आइप¥यो भनी प्रश्न गरे । ‘नेपालको प्रधानमन्त्री बनाउन नेपाली जनतातिर फर्कने कि दिल्लीतिर जाने हो । नेपालको प्रधानमन्त्री बनाउने दिल्ली जानुपर्ने ?,’ त्यसपछि आक्रोशित देखिएका पन्तले प्रधानमन्त्रीको राजीनामा नआई सदन चल्नै नदिने अडान राखे । झण्डै १० मिनेट पन्तले बोलेपछि सभामुखले दैनिक कार्यसूचीमा बैठक प्रवेश गराए । एमालेको विरोधका बाबजुद घिमिरेले माओवादी केन्द्रकी सांसद छिरिङल्हामु लामा तामाङलाई बोल्ने समय दिए । तामाङलाई बोल्न दिएपछि राष्ट्रिय प्रजातन्त्र पार्टी राप्रपा र राष्ट्रिय स्वतन्त्र पार्टी रास्वपा पनि एमालेकै कित्तामा उभिए । सांसद तामाङ जुम्लामा भएको जातीय विभेदको समस्या सदनमा उठाउँदै थिइन् । सांसद बोल्दै गर्दा सभामुख घिमिरे हडबडिएर बोलेको बोल्यै गरे । सभामुखको बोलीले प्रतिपक्षी झनै हौसिए र बेल घेर्न उत्रिए । यतिमात्र हैन उनीहरुले नाराबाजीसमेत गर्न थाले ।बोलिरहेका बेला पनि सभामुख घिमिरेले बैठकमा सांसदहरुलाई बस्न र पालैपालो बोल्न अनुरोध गरिरहे । सभामुख कतिसम्म हडबडाएका थिए भने उनले तामाङको नामसमेत राम्ररी उच्चारण गर्न सकिरहेका थिएनन् । हतपतको काम लतपत भनेझैं सभामुखले छिरिङलाई ‘पासाङ ल्हामो’ पनि भन्न भ्याए । केही क्षणको विरोधमै अत्तालिएका सभामुखले सचिवालयका कर्मचारीलाई बोलाएर कानेखुसी गरेपछि बोलिरहेको सांसदलाई वास्तै नगरी आधा घण्टाका लागि बैठक स्थगित गरे । आधा घण्टाका लागि बोलाइएको संसद् दुई घण्टासम्म सुरु हुन सकेन । बरु एकैचोटि दुई दिनपछि बैठक बस्ने सूचना संघीय सचिवालयबाट जारी भयो । बैठक शुक्रबार ३ बजेसम्मका लागि स्थगित भएको संघीय संसद्का महासचिव डा. भरतराज गौतमले विज्ञप्तिमार्फत जानकारी दिए । बजेट परितका दिन उस्तै हडबड अघिल्लो बुधबार प्रतिनिधिसभा बैठकमा अर्थमन्त्री डा. प्रकाशशरण महतले आगामी वर्ष २०८०÷८१ का लागि प्रस्तुत बजेट पारित गर्ने प्रस्ताव पेस हुँदै थियो । उक्त दिन पनि सभामुख घिमिरेले आफ्नो झुकाव एमालेतिरै रहेको देखिनेगरी हडबडाहड प्रस्तुत गरेका थिए । बजेट पारित गर्ने क्रममा सभामुख घिमिरे सरकारप्रति कठोर र एमालेप्रति लचक बनेको पटक–पटकको व्यवहारबाट प्रस्ट देखिन्थ्यो । त्यसो त भारत भ्रमणपछि सदनमा जवाफ दिन प्रधानमन्त्री पुष्पकमल दाहाल रोस्ट्रममा उभिँदा पनि सभामुख घिमिरेमाथि ‘एमाले’ हाबी भएको आरोप लागेको थियो । त्यही व्यवहार दोहोरियो बजेट पारित गर्ने दिन । सभामुखका कारण बजेट दुई–दुई पटक पारित भयो ।दलीय सहमतिपछि अर्थमन्त्री डा. महतले विनियोजन विधेयक २०८० लाई पारित गरियोस् भनी रोस्ट्रमबाट अनुरोध गरे । अर्थमन्त्रीले प्रस्ताव राख्नसाथ सभामुख घिमिरेले उक्त प्रस्तावलाई निणयार्थ पेस गरे । सभामुखले प्रस्तावको पक्षमा हुन्छ भन्ने धेरै देखिएकोले बजेट बहुमतले पारित भएको घोषणा गरे । ‘हुन्छ भन्ने माननीयको बहुमत भएकोले विनियोजित बजेट–२०८० बहुमतले पारित भएको घोषणा गर्दछु,’ सभामुखले घोषणा गर्नसाथ ताली गुञ्जियो सत्तापक्षबाट । तत्कालै एमाले सांसदहरुले उठेर विरोध जनाए । कत्ति पनि नपर्खी सभामुख घिमिरेले एमालेका सचेतक महेश बर्तौलालाई बोल्न समय दिए । प्रस्तावको विपक्षमा बहुमत भएको बर्तौलाले दाबी पेस गरिहाले । उनको अनुरोधलाई कति पनि नपर्खी सभामुख घिमिरेले प्रतिनिधिसभाको नियमावली २०७९ को नियम २९ को उपनियम १ बमोजिम प्रस्तावलाई निर्णयार्थ पेस गरे । घोषणा भइसकेको विषयमा सभामुखले एमालेको विरोधलाई सदर गर्दै पुनः मत विभाजनतिर लम्ब्याए । उक्त उपनियममा २८ भन्दा बढी सांसद उठेर असहमति जनाएमा मत विभाजन गरी मत संकलन गर्ने व्यवस्था छ । सोहीअनुरुप सभामुखले मत विभाजनको घोषणा गरे । सभामुख घिमिरेले पहिलोपटक पास भएको घोषणा गरेको आधा घण्टापछि बजेट मत विभाजनबाट पुनः पास भयो । प्रतिनिधिसभामा २५५ सांसद उपस्थित रहेकामा बजेटको पक्षमा १४७ मत र विपक्षमा १०८ मत परेको र बहुमतले पारित गरेको सभामुख घिमिरेले घोषणा गरेका थिए ।
