- विश्वासको मत लिन बिहीबारका लागि अधिवेशन आह्वान
- विश्वासको मत ‘फेल’ गराउने गठबन्धनको निर्णय
- मुख्यमन्त्रीमा कांग्रेस र माओवादी केन्द्र दुवैको दाबी
-९३ सदस्यीय प्रदेशसभामा बहुमतका लागि ४७ मत आवश्यक
- एमाले गठबन्धनसँग एमालेको ४० र राप्रपाको ६ गरी ४६ जना
-विपक्षी गठबन्धनसँग कांग्रेसको २९, माओवादी केन्द्र १२ (समामुखबाहेक), एकीकृत समाजवादी पार्टीका ४ र जनता समाजवादी पार्टी (जसपा)को एक गरी ४६ सांसद
काठमाडौं– नेकपा माओवादी केन्द्रले सरकार छाड्नसाथ संकटमा परेको कोशी प्रदेशका मुख्यमन्त्री हिक्मतबहादुर कार्कीले आगामी बिहीबार विश्वासको मत लिने भएका छन् । निर्णायक मतदानका लागि पर्सी बिहीबार प्रदेशसभाको अधिवेशन आह्वान गरिएको छ ।आइतबार बसेको प्रदेश सरकार मन्त्रिपरिषद्को बैठकको सिफारिसमा प्रदेश प्रमुख पर्शुराम खापुङले सोमबार प्रदेशसभाको तेस्रो अधिवेशन आह्वान गरेका हुन् ।
कार्कीको मुख्यमन्त्री पद टिक्छ कि टिक्दैन ? प्रदेशसभामा बिहीबार हुने मतदानपछि नै थाहा हुनेछ ।यता प्रदेशसभाको अधिवेशन आह्वान गरेकै दिन सोमबार काठमाडौंमा विपक्षी गठबन्धनको बैठक बस्यो । नेपाली कांग्रेस, नेकपा माओवादी केन्द्रसहित चार दलीय गठबन्धनले विश्वासको मत ‘फेल’ गराउने रणनीति तय गरेको बैठकमा सहभागी नेताहरु बताउँछन् ।
‘प्रदेशसभाले असार १४ गतेका लागि अधिवेशन आह्वान गरेको छ । यही विषयमा काठमाडौंमा हामी जुटेका हौं,’ नेपाली कांग्रेस कोशी प्रदेश संसदीय दलका प्रमुख सचेतक भूपेन्द्र राईले प्रभावसँग भने, ‘कांग्रेससहितको गठबन्धनले विश्वासको मत असफल बनाउने निर्णय गरेको छ ।’
यस्तै बैठकले चार दलीय गठबन्धनको नेतृत्वमा नयाँ सरकार गठन गर्ने निर्णय गरेको पनि उनले जानकारी दिए । बैठकमा कांग्रेसको तर्फबाट संसदीय दलका नेता उद्धव थापा, प्रमुख सचेतक राई, सांसद प्रदीपकुमार सुनुवार र कार्की, माओवादी केन्द्रको तर्फबाट दलका नेता इन्द्रबहादुर आङ्बो, नेताहरु दुर्गाप्रसाद चापागाईं, जीवन आचार्य र राजेन्द्र कार्की सहभागी थिए । जसपाको तर्फबाट भने निर्मला तावा लिम्बू सहभागी थिइन् ।
निर्वाचनलगत्तै संघदेखि प्रदेश सरकारमा कब्जा जमाएको नेकपा एमाले माओवादी केन्द्रले गठबन्धन परिवर्तन गरेसँगै कोशी प्रदेशमामात्र सीमित हुन पुगेको थियो । संघ र अन्य प्रदेशमा एमाले सरकार क्रमशः ढले पनि कोशीमा एमालेले आफ्नो नेतृत्वमा सरकार चलाइरहेको छ । प्रदेशको नामाकरणसँगै विवादको घेरामा परेको कोशी प्रदेशमा एमाले नेतृत्वको सरकार अल्पमतमा परेको हो । गत फागुन १७ गते प्रदेशको नामाकरण कोशी भएको थियो ।
त्यसविरुद्ध पहिचानवादीहरु निरन्तर आन्दोलनमा छन् ।कोशीमा एमाले नेतृत्वको सरकार ढलाउन गठबन्धनले निर्णायक मानिएकी जनता समाजवादीकी निर्मला लिम्बूले १७ जेठमा सरकार छाडेकी थिइन् । कोशीमा जसपाको एकमात्र सांसद छ । माओवादीले २३ जेठमा सरकार छाडेसँगै कार्की नेतृत्वको प्रदेश सरकार अल्पमतमा परेको हो ।
माओवादीका दुर्गाप्रसाद चापागाईं भौतिक पूर्वाधार र जीवन आचार्य पर्यटनमन्त्री रहेका थिए । सरकारमा सहभागी दलले समर्थन फिर्ता लिएमा ३० दिनभित्र प्रदेशसभाबाट विश्वासको मत लिनुपर्ने संवैधानिक प्रावधान छ ।
मुख्यमन्त्रीबारे गठबन्धनमा जुटेन सहमति
चार दलीय गठबन्धनमा मुख्यमन्त्री को बन्ने भन्ने विषयमा भने सहमति जुट्न सकेको छैन । कांग्रेसले आफ्नो नेतृत्वमा सरकार बन्नुपर्ने दाबी यसअघि नै पेस गरिसकेको छ ।‘२९ सांसदसहित कांग्रेस पहिलो दल हो । हाम्रो दाबी हामीले नै नेतृत्व पाउनुपर्ने भन्ने हो,’ कांग्रेस प्रमुख सचेतक राईले भने । कांग्रेसबाट मुख्यमन्त्रीका दाबेदार संसदीय दलका नेता उद्धव थापा हुन् ।
यसैगरी माओवादीले पनि आफ्नो नेतृत्वमा सरकार बन्नुपर्ने दाबी गर्दै आएको छ । माओवादीले दलका नेता इन्द्र आङ्बोलाई मुख्यमन्त्री बनाउने तयारी गरेको छ । दुई दलबीच कसलाई पहिले मुख्यमन्त्री दिने विषयमा मात्र विवाद बाँकी रहेको राईले बताए । यद्यपि, आलोपालो गरी सरकार चलाउने भन्ने विषयमा भने सहमति भइसकेको उनको भनाइ छ ।
यस्तो छ अंकगणित
९३ सदस्यीय प्रदेशसभामा बहुमतका लागि ४७ मत आवश्यक पर्छ । अहिले एमालेको ४० र राप्रपाको छ गरी ४६ जना सांसदको साथ सरकारलाई छ । प्रदेशसभामा बहुमतका लागि ४७ सिट आवश्यक पर्छ ।
त्यसो त कांग्रेसको २९, माओवादी केन्द्र १२, एकीकृत समाजवादी पार्टीका चार र जनता समाजवादी पार्टी (जसपा)को एक गरी अर्को गठबन्धनसँग पनि ४६ सांसद नै छ । यसले गर्दा सभामुख निर्णायक बन्नुपर्ने देखिन्छ । सभामुख माओवादीका बाबुराम गौतम छन् । गत पुस २४ गते ६० सांसदको समर्थनमा कार्की प्रदेश १ (कोशी) को मुख्यमन्त्री नियुक्त भएका थिए ।
