- भारतका विदेश मामिला तथा संस्कृति राज्यमन्त्री मीनाक्षी लेखीले गरिन् स्वागत
- भोलि प्रधानमन्त्री दाहालले मध्यप्रदेशको उज्जैनमा महाकालेश्वरको पूजाअर्चना गर्ने
- प्रधानमन्त्री दाहाललाई राज्यमन्त्री तहबाट स्वागत भएको भन्दै कतिपयले भने यसको आलोचना गरेका छन्
काठमाडौं - प्रधानमन्त्री पुष्पकमल दाहाल ‘मिनी क्याबिनेट’सहित बुधबार दिउँसो भारतको नयाँदिल्ली पुगेका छन् । पाँच मन्त्रीसहित सयभन्दा बढीको टोलीसहित नयाँदिल्ली पुगेका प्रधानमन्त्री दाहाललाई इन्दिरा गान्धी अन्तर्राष्ट्रिय विमानस्थलमा भारतका विदेश मामिला तथा संस्कृति राज्यमन्त्री मीनाक्षी लेखीले स्वागत गरिन् । त्यसक्रममा विमानस्थलमा भारतका लागि नेपाली राजदूत डा. शंकर शर्मा, नेपालका लागि भारतीय राजदूत नवीन श्रीवास्तवलगायतको उपस्थिति थियो ।
प्रधानमन्त्री दाहाललाई राज्यमन्त्री तहबाट स्वागत भएको भन्दै कतिपयले भने यसको आलोचना गरेका छन् । सामाजिक सञ्जालमा नेपालको प्रधानमन्त्रीलाई यो स्तरबाट स्वागत गरिनु ठीक नहुने तर्कसहितको बहस भएको छ । यद्यपि, मित्रराष्ट्रका कार्यकारी प्रमुख आइपुग्दा भारतीय प्रधानमन्त्री विमानस्थलमा स्वागत गर्न नपुग्ने परम्परा रहेको बताइएको छ ।
२०७४ वैशाख ५ गते राष्ट्रपतिका रुपमा भारत पुगेकी विद्यादेवी भण्डारीलाई विमानस्थलमा महिला राज्यमन्त्री कृष्ण राजले स्वागत गरेकी थिइन् । तर, २०६२/६३ को आन्दोलनपछि प्रधानमन्त्रीका रुपमा भारत भ्रमणमा पुगेका गिरिजाप्रसाद कोइरालालाई भने प्रधानमन्त्री मनमोहन सिंहले स्वागत गरेका थिए ।
दाहालसँग भ्रमणको पहिलो दिन भारतीय प्रधानमन्त्रीका राष्ट्रिय सुरक्षा सल्लाहकार अजित डोभालले होटल मौर्यमा शिष्टाचार भेटवार्ता गरेका छन् । बुधबार अपराह्न भएको भेटमा द्विपक्षीय हित र चासोका बारेमा कुराकानी भएको बताइएको छ । यसैबीच पहिलो दिनै प्रधानमन्त्री दाहालसँग भारतीय विदेश सचिव विनयमोहन क्वात्राले पनि भेटवार्ता गरेका छन् । दोस्रो दिन आज प्रधानमन्त्री दाहालले राष्ट्रपति द्रौपदी मुर्मू र प्रधानमन्त्री नरेन्द्र मोदीसँग भेट गर्दै छन् ।
कसलाई कसको स्वागत ?
स्वागतस्थल– इन्दिरा गान्धी अन्तर्राष्ट्रिय विमानस्थल
- विद्यादेवी भण्डारी राष्ट्रपतिका रुपमा २०७४ वैशाख ५ गते भारत पुग्दा भारतकी महिला राज्यमन्त्री कृष्ण राजद्वारा स्वागत
-माधव नेपाल प्रधानमन्त्रीका रुपमा पुग्दा राज्यमन्त्रीको स्वागत
- डा. बाबुराम भट्टराई प्रधानमन्त्रीका रुपमा २०६८ कात्तिकमा पुग्दा चिफ अफ प्रोटोकल रुचिरा कम्बोजको स्वागत
- सुशील कोइराला प्रधानमन्त्रीका रुपमा २०७१ जेठ १२ पुग्दा विदेश मन्त्रालयका सहसचिव अभय ठाकुरको नेतृत्वमा स्वागत
- केपी शर्मा ओली पहिलोपटक प्रधानमन्त्री भएपछि २०७२ मा पुग्दा भारतका विदेशमन्त्री सुष्मा स्वराजद्वारा स्वागत
- पुष्पकमल दाहाल २०७३ भदौ ३० मा प्रधानमन्त्रीका रुपमा पुग्दा विदेशमन्त्री सुष्मा स्बारजको स्वागत
- शेरबहादुर देउवा प्रधानमन्त्रीका रुपमा २०७४ भदौ ७ गते पुग्दा भारतीय विदेशमन्त्री सुष्मा स्वराजको स्वागत
- केपी शर्मा ओली प्रधानमन्त्रीका रुपमा २०७४ चैतमा पुग्दा तत्कालीन गृहमन्त्री राजनाथ सिंहको स्वागत
- शेरबहादुर देउवा प्रधानमन्त्रीका रुपमा २०७८ चैत १८ पुग्दा रक्षा राज्यमन्त्री अजय भटको स्वागत
- २०६२/६३ को आन्दोलनपछि गिरिजाप्रसाद कोइराला पुग्दा भारतीय प्रधानमन्त्री मनमोहन सिंहको स्वागत
यस्तो छ तालिका बिहीबार
-बिहान १०ः ३० बजे: राजघाटस्थित महात्मा गान्धीको समाधिस्थल जाने ।
- बिहान ११ः०५ बजे: भारतीय प्रधानमन्त्री मोदीसँग भेटवार्ता ।
- बिहान ११ः४५ बजे: प्रतिनिधिमण्डलस्तरको बैठकमा सहभागी हुने ।
- माध्याह्न १२ बजे: केही परियोजनाको उद्घाटन र पत्रकार सम्मेलन ।
- दिउँसो ४ बजे: भारतका उपराष्ट्रपति जगदीप धनखडसँग भेटवार्ता ।
- दिउँसो ४ः३० बजे: भारतीय राष्ट्रपति द्रौपदी मुर्मूसँग भेटवार्ता ।
- साँझ ५ः ३० बजे: नेपाल, भारत दुवै देशका उद्योगी, व्यवसायीलाई सम्बोधन ।
-सोही दिन मोदीले आयोजना गरेको दिवाभोजमा प्रधानमन्त्री दाहालसहितको नेपाली प्रतिनिधिमण्डल सहभागी हुने ।
- बिहीबार साँझ भने भारतका लागि नेपाली राजदूत शंकरप्रसाद शर्माले आयोजना गरेको स्वागत समारोहमा सहभागी हुने र भारतमा रहेका नेपाली समुदायसँग भेटघाट ।
शुक्रबार
प्रधानमन्त्री दाहालले मध्यप्रदेशको उज्जैनमा महाकालेश्वरको पूजाअर्चना गर्ने । त्यसपछि इन्दोर प्रस्थान गर्ने कार्यसूची । सोही दिन उनले मध्यप्रदेशका राज्यपालसँग पनि भेटघाट गर्ने ।
शनिबारः
प्रधानमन्त्री दाहाल इन्दोरमा रहेको फोहोर व्यवस्थापन प्लान्ट र विशेष आर्थिक क्षेत्रको भ्रमण गरेर दिउँसो १ बजे नयाँदिल्ली फर्किने । सोही दिन अपराह्न ४ः२० बजे नयाँदिल्लीबाट नेपाल एयरलाइन्सको उडानबाट उनी काठमाडौं फर्कने ।
-1752335779.jpg)
