बेलायत– बेलायतका पूर्व प्रधानमन्त्री बोरिस जोनसन आठौं पटक पिता बन्न लागेका छन् । ५८ वर्षीया बोरिसका श्रीमती क्यारी जोनसनले शुक्रबार इन्स्टाग्राममा एक पोष्ट मार्फत आफुहरु तेस्रो पटक मातापिता बन्न लागेको खुलासा गरेकी हुन् । उनले बच्चा ‘केही हप्तामा’ आउने बताइन् ।
उनले लेखेकी छिन्, ‘टिमको नयाँ सदस्य केही हप्तामा आउँदैछ। मैले पछिल्लो ८ महिनामा धेरै थकित महसुस गरिरहेकी छु तर हामी हाम्रो तेस्रो बच्चालाई भेट्न धेरै समय कुर्न सक्दैँनौ । ’
बोरिसका ३५ वर्षीया श्रीमती जोनसन बेलायती मिडिया कन्सल्टेन्ट हुन् र कन्जरभेटिभ पार्टीका लागि मिडिया अफिसरका रूपमा कार्यरत छिन्। उनी महासागर संरक्षण परोपकारी संस्था ओशिनाकी वरिष्ठ सल्लाहकार पनि हुन्।
मे २०२१ मा विवाह गरेका दम्पतीका पहिले नै दुई सन्तान छन् । जोन्सनको यो तेस्रो विवाह हो।
उनको अघिल्लो विवाह मरिना व्हीलरबाट चार सन्तान छन्। बीबीसीका अनुसार कला सल्लाहकार हेलेन म्याकिन्टायरसँगको सम्बन्धबाट उनको अरु बच्चाहरु छ। यद्यपी उनले आधिकारिक रुपमा यकिन संख्या भने पुष्टि गरेका छैनन् । उनको पहिलो पत्नी एलेग्रा मोस्टिन ओवेनसँग कुनै सन्तान छैन।
