नयाँ दिल्ली– भारतको नयाँ दिल्लीमा विधानसभाका लागि भएको निर्वाचनमा आम आदमी पार्टी (आप) ले यस पटक पनि विशाल जीत हासिल गर्ने पक्का देखिएको छ ।
साँझ ५ः३० बजेसम्मको मत गणनामा आपले कूल ७० सीटको विधानसभामा ३४ सीटमा जीत निकालेको छ भने २९ सीटमा अग्रता कायम गरेको छ ।
केन्द्र सरकारको नेतृत्वमा रहेको भारतीय जनता पार्टी (भाजपा) ले दिल्लीमा यस पहिलेको तुलनामा जनमत जम्मा गरेको देखिए पनि निर्वाचनमा धेरै सीट विजय गर्न भने नसक्ने देखिएको छ । दिल्ली विधानसभामा भाजपाले साँझसम्म तीन सीटमा विजय निकालेको छ भने अन्य चार स्थानमा अग्रता कायम गरेको छ ।
दिल्ली विधानसभामा भारतीय कँग्रेसले प्रारम्भिक मतगणनामा एक दुई स्थानमा अग्रता कायम गरे पनि दिन ढल्दै जाँदा उसलाई अन्य दलले पछाडि पारिदिएका छन् । कँग्रेसले दिल्लीमा सन् २०१३ पूर्व लामो समयसम्म आफ्नो नेतृत्वमा सत्ता चलाएको थियो ।
आपले निर्वाचनमा दोहो¥याएर विशाल विजय निकाल्ने देखिएपछि देशका विभिन्न राजनीतिक नेताहरूले नेता अरविन्द केजरीवाललाई वधाई सन्देशहरू आउन थालेको छन् ।
केजरीवाललाई वधाई दिँदै पश्चिम बङ्गालका मुख्यमन्त्री ममता बनर्जीले सामाजिक सञ्जाल ट्विटरमा लेखेकी छिन् ‘अरविन्द केजरीवाललाई धेरै धेरै वधाई ! अहिले भारतीय जनता रोटी, कपडा र बास (घर) चाहन्छन् । प्रवृत्ति एकदमै स्पष्ट छ कि राजनीतिमा छलकपटले काम गर्दैन ।’
त्यस्तै केरलाका मुख्यमन्त्री पिनाराई विजयनले पनि केजरीवाललाई उनको पार्टीको शानदार विजयका लागि बधाई दिएको छ । ‘अरविन्द केजरीवाल र आमआदमी पार्टीलाई दिल्ली चुनावमा ठूलो जीतका लागि बधाई छ । यो जीत हाम्रो देशको जन–समर्थक र समावेशी राजनीतिको लागि आश्रयस्थल होस् ।’
द्रविदा मुन्नेत्र काझागम (डीएमके)का नेता एमके स्टालिनले ट्वीटर सन्देशमा मार्फत भनेका छन्, ‘अरविन्द केजरीवाल र आमआदमी पार्टीलाई पुनः दिल्लीमा सरकार गठन गर्न पाएको वृहत् जनादेशका लागि बधाई छ । विकासले साम्प्रदायिक राजनीतिलाई बिगार्न सक्छ भन्ने कुरा स्पष्ट छ । सङ्घीय अधिकार र क्षेत्रीय चाहनालाई हाम्रो देशको हितमा सुदृढ बनाउनुपर्दछ ।’
समाजवादी पार्टीका अध्यक्ष र उत्तर प्रदेशका पूर्वमुख्यमन्त्री अखिलेश यादवले दिल्ली निर्वाचन परिणामबारे पत्रकारहरूसँग कुराकानी गर्दै भने ‘दिल्ली चुनावको नतिजाले देशभर सन्देश पठाउनेछ कि किसान, गरिब र युवाले विकास र समृद्धिलाई मतदान गर्छन् । जनताले दिल्लीमा साम्प्रदायिक राजनीतिको विरूद्ध मतदान गरे ।’
कडा सुरक्षाका बीचमा शहर भरिका २१ केन्द्रहरूमा मतगणना भइसकेको छ । (रासस÷एएनआई)
