- उपनिर्वाचनमा जाँदै गर्दा रास्वपाले नारा नै बनाएको थियो– एकको बदला तीन
- रमेश खरेल निकैपछि पर्दा रास्वपा बारामा भने नारामा भने झैं हुन सकेन
- मंसिरमा छाएका राजेन्द्र लिङ्देनको दल राप्रपालाई तनहुँमा २१८, चितवनमा ३७५
काठमाडौं– नागरिकता मुद्दामा दोषी ठहरपछि पुनः चुनावी मैदानमा उत्रेका राष्ट्रिय स्वतन्त्र पार्टीका सभापति रवि लामिछानेले ‘सानदार’ कमब्याक गरेका छन् । मंगलाबार सम्पन्न मतपरिणाम अनुसार गठबन्धनबाट उम्मेदवार रहेका कांग्रेसका जीतनारायण श्रेष्ठलाई भारी मतान्तरले पराजित गर्दै पुनः संसदको यात्रा तय गरेका हुन् ।
लामिछानेले ५४ हजार एक सय ७६ मत कांग्रेसका जीतनारायणले ११ हजार दुई सय १४ मत प्राप्त गरे । यस्तै नेकपा (एमाले) का रामप्रसाद न्यौपानेले १० हजार नौ सय ३६ मत प्राप्त गरे । राप्रपाका जीवलाल पुरीले तीन सय ७५ मत प्राप्त गरे ।
चितवन क्षेत्र नं –२ मा ७८ हजार छ सय ६४ मत खसेकोमा एक हजार एक सय ९८ बदर भयो । कुल एक लाख २४ हजार छ सय ९५ मतदाता रहेका यस क्षेत्रमा गत मंसिरमा लामिछानेले ४९ हजार दुई सय ६४ मत प्राप्त गरेका थिए । गठबन्धनबाट उम्मेदवार रहेका नेपाली कांग्रेसका उमेश श्रेष्ठले १४ हजार नौ सय ८३, एमालेका कृष्णभक्त पोखरेलले १४ हजार छ सय ४७ र राप्रपाका रवीन अधिकारीले नौ सय ५५ मत प्राप्त गरेका थिए ।
उपनिर्वाचनमा जाँदै गर्दा रास्वपाले नारा नै बनाएको थियो – एकको बदला तीन । तीन क्षेत्रमा उपनिर्वाचन हुँदै गर्दा रास्वपाको अर्को नारा थियो – जनताको ह्वीप, रास्वपाको क्लिन स्विप । यो समाचार तयार पार्दासम्म बारा २ मा रास्वपाका उम्मेदवार रमेश खरेल निकै पछि परेका छन् । यहाँ गठबन्धनबाट उम्मेदवार रहेका जनता समाजवादी पार्टीका अध्यक्ष उपेन्द्र यादवले अग्रता कायम गरेका छन् ।
यद्यपि रास्वपाले एकको बदला दुई भने पक्का ग¥यो यो निर्वाचनमा । उपनिर्वाचनमा लामिछानेले तनुहँमा उभ्याएका डा स्वर्णिम वाग्लेले पनि सानदार जित निकालेका छन् । २४ दिनअघि कांग्रेस छाडेका स्वर्णिमले कांग्रेसकै गोविन्द भट्टराईलाई हराएका हुन् । मंगलवार सम्पन्न मतगणनाअनुसार वाग्लेले ३४ हजार नौ सय ११ मत प्राप्त गरे । उनका प्रतिस्पर्धी कांग्रेसका गोविन्दले २० हजार एक सय २२ मत प्राप्त गरे । नेकपा (एमाले)का सर्वेन्द्र खनालले आठ हजार चार सय ८८ मत प्राप्त गरे ।
यसैगरी राप्रपाका शोभा गुरुङले दुई सय १८, नागरिक उन्मुक्ति पार्टीका भीमबहादुर सुनारले ९९, नेमकिपाका रामप्रसाद प्रजापतिले ३१, नेकपा समाजवादीका गणेश श्रेष्ठले पाँच, मङ्गोल नेसनल अर्गनाइजेसनका प्रेमबहादुर थापाले एक सय ६६ र राष्ट्रिय जनमुक्तिका पूर्णबहादुर रानाले ८७ मत प्राप्त गरे । निर्वाचनमा ६५ हजार तीन सय १६ मत खसेकामा ६४ हजार एक सय ३५ मत सदर भएको थियो भने एक हजार एक सय ८१ मत बदर भएको थियो ।
तनहुँ–१ का प्रतिनिधिसभा सदस्य नेपाली कांग्रेसका रामचन्द्र पौडेल राष्ट्रपति पदमा निर्वाचित भएपछि रिक्त निर्वाचन भएको हो ।
सबै दलसँग सहकार्य गर्छु : स्वर्णिम
तनहुँ १ बाट निर्वाचित भएसँगै डा वाग्लेले तनहुँवासीले गर्व गर्न लायक सांसद बनेर देखाउने प्रतिबद्धता व्यक्त गरे । उनले जिल्लाको विकासका साथै देशका मुद्दा सम्बोधनका लागि आफूले भूमिका खेल्ने उल्लेख गरे ।
तनहुँवासीको विश्वास र भरोसालाई डगमगाउन नदिने उल्लेख गर्दै उनले भने, ‘जनताका अपेक्षा न्याय गर्नेछु ।’ डा वाग्लेले जिल्लाका सबै राजनीतिक दलसँग सहकार्य र समन्वय गरेर काम गर्ने बताए । नीति, क्षमता सही भएको खण्डमा देश विकास सम्भव रहेको जनाउँदै सामूहिक प्रयासलाई इमानदारीपूर्वक निभाउनेसमेत उनको भनाई थियो । देश विकास गर्ने हुटहुटीले आफूहरू आएको उल्लेख गर्दै उनले भने, ‘सबैको सामूहिक प्रयत्नबाट मात्र देश विकास हुन्छ ।’
मत बढ्दा जिम्मेवारी थपियो : रवि लामिछाने
संसदमा कमब्याक गरेका रास्वपा सभापति लामिछानेले सुशासनको ‘एजेन्डा’मा टेकेर समृद्धिको बाटो तय गर्ने बताएका छन् । पुनः निर्वाचित भएपछि प्रतिक्रिया दिंँदै आम नागरिकका अपेक्षा भनेको मौलाएको भ्रष्टाचार नियन्त्रण गर्नुपर्छ भन्ने पाएको लमिछानेले बताए ।
‘मेरो प्रमुख एजेन्डा सुशासन नै हो,’ यही अपेक्षालाई आफूले शिरोपर गरेको तर्क गर्दै उनले भने, ‘यही अपेक्षालाई आम जनताले अनुमोदन गरेको मैले महसुस गरेको छु ।’ पहिलेको भन्दा धेरै मतका साथ विजयी हुँदै गर्दा जिम्मेवारी थपिएको भन्दै उहाँले राजनीतिक निर्णय गर्दा आफू थप जिम्मेवार भएर सोचेर गर्नुपर्ने अवस्थामा आएको बताए ।
‘ठूला राजनीतिक निर्णय गर्दा आफू जिम्मेवार भएर सोच्नुपर्ने अवस्था सिर्जना भएको छ । यसलाई जिम्मेवारीका साथ लिनेछु ।’
