‘म प्रधानमन्त्री छु । मन्त्री बनाउने मैले हो अहिले । यो प्राङ्गण लक्की छ ।’
पुष्पकमल दाहाल
प्रधानमन्त्री
‘गोविन्द भट्टराईलाई जिताउनुहोस्, उहाँ योग्य उम्मेदवार हो । उहाँले प्रस्तुत गरेका सबै विकासको कामको जिम्मा हाम्रो भयो ।’
शेरबहादुर देउवा
सभापति, नेपाली कांग्रेस
काठमाडौं– प्रतिनिधिसभा उपनिर्वाचनको चुनावी संघारमामात्रै सत्ता गठबन्धनका शीर्ष नेताहरू मतदातासँग मत माग्न मैदानमा ओर्लिएका छन् । उनीहरू मतदाताहरूलाई आश्वासन बाँडेर मत प्रभावित पार्न उद्धत देखिएका छन् । उनीहरूको अर्जुनदृष्टि गठबन्धनका साझा उम्मेदवारहरूलाई जिताउन छ ।
त्यही भएर बुधबार प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा र नेकपा एकीकृत समाजवादी (एस)का अध्यक्ष माधवकुमार नेपाल तनहुँ–१ स्थित डुम्रे पुगे ।
त्यहाँ गठबन्धनको तर्फबाट कांग्रेस नेता गोविन्द भट्टराई साझा उम्मेदवार छन् । उनलाई मत दिएर जिताउन प्रधानमन्त्री दाहालले मतदातासँग आग्रह गरे । जिताएको अवस्थामा मन्त्री बनाइदिने आश्वासन बाँड्न भ्याए ।
‘तपाईंहरूले रामचन्द्रजीजस्तै गठबन्धनका साझा उम्मेदवार गोविन्द भट्टराईलाई रूख चिह्नमा मतदान गरेर विजयी गराउनुस् । बाँकी काम शेरबहादुर देउवाजीले जिम्मा लिइसक्नुभयो । म शेरबहादुर देउवाजीसँगै छु,’ दाहालले तनहुँको डुम्रे बजारमा आयोजित सभामा भने, ‘मन्त्री बनाउने जिम्मेवारी मेरो हो अहिले ।’
निर्वाचन क्षेत्रका मतदातालाई प्रभावित पार्न उनले मुग्लिन–पोखरा सडकको काम सुस्त गतिमा भएकाले जनताले असजिलो महसुस गरेको भन्दै तीव्रता दिइने बताए ।
यस्तो आश्वासन दिने प्रधानमन्त्री दाहाल मात्रै होइनन्, उम्मेदवार भट्टराईकै दल कांग्रेसका सभापति देउवा पनि छन् । उनले त अझ तनहुँको विकासको जिम्मा लिने कबोल नै गरे ।
‘तनहुँ ऐतिहासिक महत्वपूर्ण बोकेको जिल्ला हो । राष्ट्रपति रामचन्द्र पौडेलको गृहजिल्ला पनि हो । गोविन्द भट्टराईलाई जिताउनुहोस्, उहाँ योग्य उम्मेदवार हो । उहाँले प्रस्तुत गरेका सबै विकासको कामको जिम्मा हाम्रो भयो,’ देउवाले भने ।
निर्वाचनमा मतदातालाई प्रभावित पार्न आश्वासन दिने यो पुरानो शैली हो । यस्ता आश्वासनले कतिपय मतदाता विश्वस्त पनि हुन्छन् र आशले मत दिन्छन् । यही बुझेका देउवाले भट्टराईलाई मत दिएर विजयी गरे तनहुँको विकासको ठेक्का लिएका हुन् ।
प्रधानमन्त्री दाहाल र पूर्वप्रधानमन्त्रीसमेत रहेका देउवाले यसरी विकास र मन्त्रीको आश्वासन दिँदा सत्ता गठबन्धनकै एउटा घटक नेकपा एसका अध्यक्ष नेपालले भने राजनीतिक अभिव्यक्ति दिए । उनले भने, ‘गठबन्धनका उम्मेदवारलाई १० यही वैशाखमा जिताउनुहोस् । राजनीति सही दिशामा जान्छ ।’
गठबन्धनका शीर्ष नेताहरूले यसरी दिएको आश्वासन कति प्रभावी हुन्छ ? मतपेटिका खुलेपछि थाहा हुनेछ । तर, यहाँ गठबन्धनका उम्मेदवार भट्टराईलाई कडा टक्कर राष्ट्रिय स्वतन्त्र पार्टी (रास्वपा)का उम्मेदवार डा. स्वर्णिम वाग्लेले दिने ठानिएको छ । उसो त यहाँ नेकपा एमालेबाट पूर्वप्रहरी महानिरीक्षक सर्वेन्द्र खनाल पनि उम्मेदवार छन् ।
खनाल भए पनि भट्टराई–वाग्ले चर्का प्रतिस्पर्धी हुनसक्ने अनुमानका विवरणहरू सार्वजनिक हुन थालेका छन् । अन्य दलका पनि यहाँ उम्मेदवार छन् । तर, पछिल्ला विकसित राजनीतिक घटनाक्रम र चुनावी माहोलले भट्टराई अप्ठेरोमा पर्न सक्ने अड्कलबीच प्रधानमन्त्री दाहाल, सभापति देउवा र अध्यक्ष नेपाल तनहुँ पुगेका हुन् ।
यसअघि महामन्त्रीद्वय गगन थापा, विश्वप्रकाश शर्मासँगै उपसभापति धनराज गुरुङ, नेकपा एसका सांसद किसान श्रेष्ठसहितका नेताहरू पनि तनहुँ पुगेर भट्टराईलाई मत मागेका छन् । आफ्ना दलका उम्मेदवार भट्टराई नहारुन् भन्ने उनीहरूको चाहना छ ।
नेकपा एमालेबाट भने अध्यक्ष केपी शर्मा ओली भने खनाललाई मत माग्न तनहुँ गएका छैनन् ।
प्रेसविज्ञ रामशरण बजगाईंका अनुसार ओली अस्वस्थ छन् । सोहीकारण उनी तनहुँ नगएका हुन् । पार्टी उपमहासचिव पृथ्वी सुब्बा गुरुङ, नेता किरण गुरुङलगायत भने ‘क्याम्प’ खडा गरेरै खनाललाई मत मागिरहेका छन् । डा. स्वर्णिमलाई मत माग्न भने रवि स्वयं तनहुँ गएका छन् । यसरी प्रधानमन्त्रीसहित दलहरूका शीर्ष नेता तनहुँ जाँदा चुनावी माहोल अझै तातेको छ ।
तर, कतिपयले भने यो प्रतिष्ठाको लडाइँ भन्दै आएका छन् । यदि, भट्टराई चुनावमा हारे गठबन्धन हारेको अर्थ लाग्ने बताइन्छ ।
यहाँ गत ४ मंसिरमा भएको निर्वाचनमा गठबन्धनको तर्फबाट कांग्रेसका पौडेल निर्वाचित भएका थिए । त्यसबेला पौडेलले २५ हजार ३६१ मत पाएका थिए । निकटतम प्रतिद्वन्द्वी एमालेका एकबहादुर रानाले १९ हजार ९८१ मत पाउँदा स्वतन्त्र उम्मेदवार गोविन्दराज जोशीले छ हजार ८८६ र रास्वपाका विकास सिग्देलले छ हजार ४४ मत पाएका थिए ।
उनै पौडेल गत २५ फागुनमा राष्ट्रपति निर्वाचित भएपछि उपनिर्वाचन हुन लागेको हो । गठबन्धनलाई आफ्ना उम्मेदवार भट्टराईलाई जिताउन दबाब पनि छ । तर, भट्टराईलाई निर्वाचन जित्न सहज हुने छाँट भने देखिएको छैन ।
