नयाँ दिल्ली – भारतको राजधानी नयाँ दिल्लीमा विधानसभाका लागि शनिबार मतदान भइरहेको छ ।
बिहान ८ बजेदेखि शुरु भएको मतदान बेलुका ६ बजेसम्म जारी रहने निर्वाचन आयोगले जनाएको छ । आयोगका अनुसार ७० विधानसभा सदस्यका लागि मतदान भइरहेको हो ।
मतदानका लागि मतदाताहरू बिहानदेखि मतदान केन्द्रमा लाइन लागेको प्रत्यक्षदर्शीहरूले जानकारी दिएका छन् ।
निर्वाचनमा विशेष गरेर दिल्ली प्रदेशको सत्तारूढ दल आम आद्मी पार्टी (आप), भारतीय जनता पार्टी (भाजपा) र भारतीय राष्ट्रिय काँग्रेसका बीचमा मुख्य प्रतिस्पर्धा हुने अनुमान गरिएको छ ।
यस अघिको निर्वाचनमा अत्यधिक बहुमतका साथ आम आद्मी पार्टी विजयी भएको थियो । कूल ७० सिटमा आम आद्मीले ६७ सिट जितेको थियो भने भारतीय जनता पार्टीले तीन सिट मात्रै जितेको थियो । अर्को प्रमुख दल मानिने भारतीय काँग्रेसले त एक सिट पनि नजितेर चित्त बुझाउनु परेको थियो ।
भ्रष्टाचार विरोधी आन्दोलनकारीले स्थापना गरेको नयाँ दल भएकाले उसप्रतिको आशा र भरोसाका कारण आम आद्मी पार्टीले त्यतिबेला दिल्ली विधानसभामा अत्याधिक मत हासिल गरेको थियो । अहिले भएको मतदानको नतिजा दुई दिनपछि आउनेछ ।
एक करोड ४० लाखभन्दा बढी मतदाता रहेको दिल्लीमा यस पटकको चुनावका लागि कूल ६७२ जना उम्मेदवार मैदानमा उत्रिएका छन् । आम आद्मी पार्टी दोस्रोपटक पनि सत्तालाई निरन्तरता दिने कोसिसमा छ भने लगातार तीनपटक दिल्लीको सत्तामा रहेको काँग्रेस आम आद्मीबाट सत्ता खोस्ने दाउमा रहेको छ । केन्द्रीय सत्ताको नेतृत्व गरेको भाजपाले पनि सत्ता हत्याउन सम्पूर्ण शक्ति लगाएको देखिन्छ ।
दिल्लीमा यसअघि सन् २०१३ को डिसेम्बरमा भएको विधानसभामा भने कुनै पनि पार्टीले बहुमत ल्याउन सकेका थिएनन् तर आम आद्मी पार्टी नै सबैभन्दा ठूलो दल बनेको थियो ।
शुरुमा काँग्रेससँग मिलेर सरकार बनाएको आम आद्मीले ४९ दिनपछि सरकारबाट बाहिरिएर नयाँ चुनावको माग गरेको थियो । राम्रा काम गर्न पूर्ण बहुमत सहितको सरकारको आवश्यकता पर्ने भएकाले साथ दिन आह्वान गरेको आम आद्मी पार्टीलाई जनताले अपेक्षा गरेभन्दा बढी साथ दिए ।
ऐतिहासिक सफलतासहित पार्टीका नेता अरविन्द केजरिवालको नेतृत्वमा बनेको दिल्ली सरकारको कार्यकाल यही फेब्रुअरी २२ तारिखमा सकिँदैछ । नयाँ सरकारमा फेरि केजरिवालले मौका पाउनु हुनेछ कि अन्य पार्टीको भाग्य खुल्ने छ भन्ने कुराको फैसला शनिबार हुने भएको हो ।
प्रमुख प्रतिस्पर्धी दलहरूका बीचमा चुनाव प्रचारप्रसारका क्रममा एक अर्काप्रति चर्को आरोप प्रत्यारोप चलिरहेको थियो । उनीहरूले विवादास्पद अभिव्यक्ति पनि दिएका थिए । केही नेताहरूलाई त निर्वाचन आयोगले केही समयका लागि निलम्बन र प्रतिबन्ध लगाउनु परेको थियो । (रासस÷एएनआई)
