थिमि - मध्यपुर थिमिमा यही चैत २५ गते शनिबार उपत्यकाव्यापी धिमे बाजा प्रतियोगिता हुने भएको छ । विगतका वर्ष ओस्ला नेपालले आयोजना गर्दै आएको सो धिमे बाजा प्रतियोगिता यस वर्ष नगरपालिका स्वयंले आयोजना गर्न लागेको हो ।
प्रतियोगिता श्री श्री श्री विष्णुवीर धिमे बाजा खलःको संयोजनमा हुन लागेको बिहीबार आयोजित पत्रकार सम्मेलनमा जानकारी दिइयो । प्रतियोगितामा उपत्यकाका ३२ धिमे खलः वा पुचः सहभागी हुने अपेक्षा गरिएको प्रतियोगिता संयोजक एवं वडा नं ४ का वडा सदस्य मदन ख्या श्रेष्ठले बताए ।
“मध्यपुर थिमिको बिस्काः जात्रामा विभिन्न देवी देवताका ३२ खटको जात्रा हुने गर्दछ । त्यसैको प्रतीक धिमे बाजा प्रतियोगितामा ३२ खलः तथा पुचःको सहभागिता गराउने लक्ष्य रहेको छ”, उनले भने ।
प्रतियोगितामा ३० खलः तथा पुचःले नाम दर्ता गरिसकेको जानकारी दिँदै उनले इमेलबाट पनि दर्ता गर्न सकिने व्यवस्था भएकाले अन्तिमसम्म लक्ष्यअनुसार ३२ वा सोभन्दा बढी खलः तथा पुचःको सहभागिता हुन सक्ने बताए ।
प्रतियोगितामा उपत्यकाका भक्तपुर, चाँगुनारायण, बालाजु, ठेचो, गोकर्ण, धर्मस्थली, बज्रबाराही, कीर्तिपुरलगायतका स्थानका धिमे खलः तथा पुचःले नाम दर्ता गरिसकेको संयोजक श्रेष्ठले बताए । एउटा खलः वा पुचःबाट बढीमा दुई टोलीको सहभागिता हुनेछ ।
एउटा टोलीमा धिमे दुई, भुस्या दुई र छुस्या वा अन्य बाजा एक गरी बढीमा पाँच वाद्यवाधकको सहभागिता हुनेछ । प्रत्येक सहभागी टोलीलाई पाँच मिनेटको समय दिइने र सहभागी टोलीले पाँच मिनेटको समय बढीभित्र प्रस्तुती टुङ्ग्याउनुपर्नेछ ।
प्रतियोगितामा चार जनाको निर्णायक टोली रहनेछ । निर्णायक मण्डलले प्रस्तोता टोलीको अनुशासन, समयको परिपालना, वेशभूषा, रचनाको छनोट, एक आपसमा तालमेल, प्रष्टता, बोल, ताल र लय हाउभाउको आधारमा अङ्क प्रदान गर्नेछ । प्रतियोगितामा प्रथम हुनेलाई नगद रु ४० हजार, शिल्ड, मेडल र प्रमाणपत्र, दोस्रोलाई नगद रु २० हजार, शिल्ड, मेडल र प्रमाणपत्र, तेस्रोलाई नगद रु १० हजार, शिल्ड, मेडल र प्रमाणपत्र, सान्त्वना पुरस्कार स्वरुप नगद रु पाँच हजार, मेडल, शिल्ड र प्रमाणपत्र प्रदान गरिनेछ ।
प्रतियोगिता सञ्चालनका लागि नगरपालिकाले रु पाँच लाख दिने निर्णय गरेको जानकारी दिँदै संयोजक श्रेष्ठले नपुग रकम आयोजक समितिमा रहेका पदाधिकारी र अन्य इच्छुक दाताले दिने स्वेच्छिक सहयोगले परिपूर्ति गरिने बताए ।
प्रतियोगिताका लागि विगतमा जस्तो आर्थिक सहयोग सङ्कलनका लागि कुनै सङ्घ संस्थासँग अनुरोध नगर्ने तर स्वेच्छाले दिन आए लिने नीति बनाएका उल्लेख गर्दै उहाँले भन्नुभयो, “सोहीअनुसार दातामध्ये कसैले शिल्ड सहयोग गर्ने, कसैले मेडल सहयोग गर्ने इच्छा व्यक्त गरेका छन् ।”
प्रतियोगितालाई सफल बनाउन मूल आयोजक समिति, प्रचारप्रसार, अतिथि सत्कार, मञ्च व्यवस्थापनलगायतका विभिन्न समिति तथा उपसमिति गठन गरिएको संयोजक श्रेष्ठले बताए ।
मध्यपुर थिमि उपत्यकाकै सबैभन्दा धेरै धिमे खलः भएको क्षेत्र हो । यहाँको बिस्काः जात्रामा एक साथ हजारौँको सङ्ख्यामा धिमे बाजा बज्ने गर्दछ । यहाँको मूर्तअमूर्त कला संस्कृतिको जगेर्ना गर्ने र नयाँ पुस्तामा पुस्तान्तरण गर्नुका साथै बिस्काः जात्राको छुट्टै रौनक बढाउन धिमे बाजा प्रतियोगिता आयोजना गरिएको श्री श्री श्री विष्णुवीर धिमे खलःका अध्यक्ष इन्द्रभक्त श्रेष्ठले बताए ।
पत्रकार सम्मेलनमा प्रदीप जामन श्रेष्ठ र वडा नं ४ का वडा सदस्य उमेश श्रेष्ठले प्रतियोगिताको तयारी पूरा भएको जानकारी दिँदै प्रतियोगिताको विविध पक्षका बारेमा जानकारी दिएका थिए ।
