काठमाडौं - प्रधानमन्त्री पुष्पकमल दाहालले साढे तीन महिना नहुँदै तेस्रोपटक मन्त्रिपरिषद् विस्तार गर्दै छन् । आज मन्त्रिपरिषद् विस्तारका लागि तयारी गरिएको प्रधानमन्त्रीको सचिवालयले जनाएको छ । मन्त्रिपरिषद्मा गठबन्धनका आठ दल समेटिने छन् ।
प्रधानमन्त्रीका राजनीतिक सल्लाहकार हरिबोल गजुरेलका अनुसार दिउँसो ३ बजे मन्त्रीहरूलाई शपथ ग्रहण गराउने कार्यक्रमसमेत तय भएको छ । १६ वटा मन्त्रालयको बागडोर सम्हाल्नुपर्ने दायित्वबाट मन्त्रिपरिषद् विस्तारसँगै प्रधानमन्त्री दाहाल मुक्त पनि हुने छन् । राष्ट्रपति र उपराष्ट्रपति निर्वाचनपछि बनेको नयाँ गठबन्धनका दलहरू समेटिएर विस्तार गर्न लागेको भने यो नै पहिलो हो ।
कांग्रेस:-पूर्णबहादुर खड्का र रमेश रिजाल (रक्षा र परराष्ट्रमध्ये एक), धनराज गुरुङ (सामान्य प्रशासन), डा. प्रकाशशरण महत (अर्थ), डिकबहादुर लिम्बू (कानुन), एनपी साउद (सहरी) सीता गुरुङ (भूमि व्यवस्था), मोहन बस्नेत (स्वास्थ्य)
माओवादी :- नारायणकाजी श्रेष्ठ (गृह), रेखा शर्मा (सञ्चार), सुदन किराती (संस्कृति), अमनलाल मोदी (ऊर्जा) र महिला (?)
जसपा:- मन्त्रीको नाम टुंगिन बाँकी
नेकपा एस:-डा. बेदुराम भुसाल (वन) र प्रकाश ज्वाला (भौतिक)
जनमत:- अब्दुल खान (उद्योग)
लोसपा:- शरदसिंह भण्डारी (श्रम)
नाउपा:-रञ्जिता श्रेष्ठ चौधरी (युवा तथा खेलकुद)
नेसपा:-महेन्द्रराय यादव (खानेपानी)
मन्त्रिपरिषद्मा नेपाली कांग्रेसले आठ जनालाई पठाउँदै छ । पहिले मन्त्री भएका र नभएका नेताहरूलाई दाहाल नेतृत्वको सरकारमा पठाउन लागिएको सहमहामन्त्री भीष्मराज आङ्देम्बेले बताए । उनका अनुसार बिहीबार बसेको कार्यसम्पादन समिति बैठकले उपसभापति पूर्णबहादुर खड्काको नेतृत्वमा कांग्रेस सहभागी हुने निर्णय गरेको छ । खड्काले उपप्रधानसहित रक्षा वा परराष्ट्र मन्त्रालयको जिम्मेवारी सम्हाल्ने भएका छन् ।
पार्टीका अर्का उपसभापति धनराज गुरुङ संघीय मामिला तथा सामान्य प्रशासनमन्त्री, प्रवक्ता डा. प्रकाशशरण महत अर्थमन्त्री, डिकबहादुर लिम्बु कानुन, न्याय तथा संसदीय मामिला र सीता गुरुङ भूमि व्यवस्थामन्त्री हुने टुंगो लागेको छ । सांसदहरू एनपी साउद सहरी विकासमन्त्री, मोहनबहादुर बस्नेत स्वास्थ्य तथा जनसंख्यामन्त्री र रमेश रिजाल परराष्ट्र र रक्षामध्ये एक मन्त्रालयको मन्त्री बन्ने निश्चितजस्तै भएको सहमहामन्त्री आङ्देम्बेले बताए ।
‘ज–जसको नाम अहिले मन्त्रीको रूपमा चर्चामा छ । उहाँहरू नै मन्त्री हुने हो,’ उनले प्रभावसँग भने, ‘कार्यसम्पादन समिति बैठकबाट टुंगो लागेका नामहरू हो ।’ उपसभापति गुरुङ, लिम्बू र रिजाल पहिलोपटक मन्त्री हुन लागेका हुन् ।खड्का, महत, बस्नेत र साउद पटक–पटक मन्त्री भइसकेका छन् । सांसद गुरुङ यसअघि नै राज्यमन्त्री भइसकेकी छन् । उनी कांग्रेसबाट प्रत्यक्ष निर्वाचित एक्ली महिला सांसद पनि हुन् । कांग्रेसबाट मन्त्री बन्नेहरुमध्ये गुरुङ र लिम्बू मात्रै संस्थापनइतर समूहका हुन् ।
मन्त्रिपरिषद् विस्तार हुँदा भने प्रधानमन्त्री दाहालको दल माओवादीका केही मन्त्रीहरूको मन्त्रालय भने हेरफेर हुने भएको छ । उपप्रधान तथा भौतिक पूर्वाधार मन्त्रालयको नेतृत्व गरेका नारायणकाजी श्रेष्ठ गृह मन्त्रालयको जिम्मेवारीमा हुने छन् । श्रेष्ठले ११ पुसमै उपप्रधानसहित गृहमन्त्री हुन चाहेका थिए । तर, यो मन्त्रालय भागबण्डा गर्दा राष्ट्रिय स्वतन्त्र पार्टी (रास्वपा)का सभापति रवि लामिछानेलाई प¥यो । श्रेष्ठ त्यसबेला रुष्ट भए । पछि उनले उपप्रधानमन्त्रीहरूको वरीयतालाई लिएर पनि असन्तुष्टि जनाए । उनै श्रेष्ठले तीन महिनापछि गृह मन्त्रालय पाउने भएको हो ।
यसअघि संघीय मामिला तथा स्थानीय विकास मन्त्रालय सम्हालेका अमनलाल मोदी पनि ऊर्जामन्त्री बन्ने भएका छन् । सञ्चार तथा सूचना प्रविधिमन्त्री रेखा शर्मा र संस्कृति, पर्यटन तथा नागरिक उड्डयनमन्त्री सुदन किरातीको भने मन्त्रालय हेरफेर नहुने भएको हो । माओवादीले महिला, बालिकामन्त्री कसलाई बनाउँछ भन्ने चाहिँ निक्र्योल भएको छैन ।
जनता समाजवादी पार्टी (जसपा)बाट एक जना अध्यक्ष अशोककुमार राई मन्त्री हुने सम्भावना बढी छ । अर्का एक मन्त्री भने मधेसको भूगोलबाट हुने चर्चा छ । जसपाको भागमा शिक्षा र कृषि मन्त्रालय परेको छ ।नेकपा एकीकृत समाजवादीले पार्टी उपाध्यक्ष डा. बेदुराम भुसाल र उपमहासचिव प्रकाश ज्वालालाई मन्त्री बनाउने बुधबार नै निर्णय गरेको हो । ज्वाला भौतिक पूर्वाधार तथा यातायातमन्त्री हुने निश्चित भएको छ । पहिलोपटक मन्त्री बन्न लागेका भुसाल भने वनमन्त्री हुने भएका छन् ।
जनमत पार्टीबाट मोहम्मद अब्दुल खानको मन्त्रालय हेरफेर हुने भएको छ । खानेपानीमन्त्री भएका उनी अब उद्योगमन्त्री हुने भएका छन् । उनले यसअघि यही मन्त्रालय चाहेका थिए । एक जना राज्यमन्त्री भने कसलाई बनाउँछ ? निश्चित छैन ।लोकतान्त्रिक समाजवादी पार्टी (लोसपा)ले भने यसअघि १५ पटक मन्त्री भएका शरदसिंह भण्डारीलाई मन्त्री बनाउँदै छ । उनी श्रममन्त्री बन्ने छन् । नागरिक उन्मुक्तिबाट अध्यक्ष रञ्जिता श्रेष्ठ युवा तथा खेलकुदमन्त्री बन्ने तयारीमा छिन् । श्रेष्ठ भने पहिलोपटक मन्त्री बन्न लागेकी हुन् ।
नेपाल समाजवादी पार्टीका महेन्द्र राय यादव खानेपानी मन्त्री हुने भएका छन् । उनी यसअघि पनि पटक–पटक मन्त्री भइसकेका नेता हुन् । समान एक÷एक जना सांसद भएका गठबन्धनको दुई दल राष्ट्रिय जनमोर्चा र आम जनता पार्टी (आजपा)ले भने सरकारमा सहभागी हुने मौका नपाउने भएका छन् । यसअघि आजपाले एक मन्त्रालय पाउने चर्चा थियो । पाउँदा उक्त दलबाट प्रभु साह मन्त्री हुन्थे । तर, उनले मन्त्रालय पाएनन् । स्वतन्त्र सांसद डा. अमरेशकुमार सिंह पनि मन्त्री हुने चर्चा थियो । उनले पनि मन्त्री हुने अवसर नपाउने भएको छ ।
