काठमाडौं (प्रस)– गठबन्धनबाट उम्मेदवार बनेका जसपाका रामसहायप्रसाद यादवविरुद्ध दुईवटा उजुरी परेको छ । एमाले उम्मेदवार अष्टलक्ष्मी शाक्यको तर्फबाट सोही दलका सांसद महेशकुमार बर्तौलाले शनिबार उपराष्ट्रपति निर्वाचन अधिकृतको कार्यालयमा उजुरी दिएका हुन् ।
उनले उपराष्ट्रपति पदमा महिलाले मात्रै उम्मेदवारी दिन पाउने जिकिर गरेका छन् । उनले उजुरीमार्फत राष्ट्रपतिमा पुरुष निर्वाचित भइसकेका कारण उपराष्ट्रपतिमा महिलामात्रै उम्मेदवार बन्न मिल्ने तर्क अघि सारे ।
उपराष्ट्रपतिमा गठबन्धनबाटै उम्मेदवार बनेकी जनमत पार्टीकी ममता झाले पनि रामसहायविरुद्ध उजुरी दिएकी छन् । राष्ट्रपतिमा पुरुष खसआर्य समुदायबाट निर्वाचित भइसकेकोले उपराष्ट्रपतिमा महिला हुनुपर्ने माग राखेर झाले उजुरी दिएको निर्वाचन अधिकृतको कार्यालयकी सूचना अधिकारी अमृताकुमारी शर्माले बताइन् ।
तर, झाको पनि विवादित छवि छ । गएको स्थानीय तह निर्वाचनअघि जनमतमा प्रवेश गरेकी उनी साझा प्रकाशनको अध्यक्ष हुँदा साझाको भवन निर्माण गर्दा महालेखापरीक्षकको कार्यालयले अनियमितता गरेको प्रतिवेदन सार्वजनिक गरेको थियो । प्रतिवेदनका आधारमा अख्तियार दुरुपयोग अनुसन्धान आयोगले साझामा छापा मारेर भवन निर्माणसम्बन्धी सम्पूर्ण कागजात नियन्त्रणमा लिएको थियो । त्यसपछि उनी स्वतः पदबाट निलम्बनमा परिन् । उनी पदबाट निलम्बित हुन पुगिन् । आयोगले त्यो प्रकरणको छानबिन गरे पनि त्यसको किनारा लागेको छैन । आयोगले अझै छानबिन गरिरहेको छ ।
प्रकाशित मिति: आइतबार, फागुन २८, २०७९ १०:३२
-1745656903.jpeg)