नोमपेन्ह–कम्बोडियाको अर्थतन्त्र सन् २०२० मा सुदृढ रहने आसियान अनुसन्धान कार्यालय (आम्रो)ले प्रक्षेपण गरेको छ ।
आम्रोका अनुसार मुलुकको कूल गार्हस्थ्य उत्पादन सन् २०१९ र २०२० मा करिब ७.१ प्रतिशतको स्थिर अवस्थामा रहने छ । मुलुकको सुदृढ निर्माणकार्य, बलियो घरेलु लगानी वृद्धि तथा बढ्दो घरेलु मागका कारण अर्थतन्त्रमा सकारात्मक प्रभाव परेको हो ।
मुद्रास्फिती भने यस वर्ष २.३ प्रतिशतले वृद्धि हुनेछ जुन गत वर्षको २.१ प्रतिशतभन्दा केही बढी हो । आम्रोले बुधबार जारी गरेको विज्ञप्तिमा एउटा क्षेत्रमा अर्थतन्त्र बढी निर्भर रहेकाले त्यसलाई विस्तार गर्नुपर्ने उल्लेख छ ।
कम्बोडियाको बजार खासगरी युरोपेली मुलुकमा मात्र केन्द्रित रहेको छ ।
युरोपेली युनियनले कम्बोडियासँगको व्यापारमा कटौती गरेमा त्यसले कम्बोडियाली अर्थतन्त्रमा गम्भीर असर पु¥याउने आम्रोको भनाइ छ ।
युरोपेली युनियनले गत वर्ष फेब्रुअरीमा कम्बोडियाको मानव अधिकार र श्रम अधिकारसम्बन्धी विषयमा चासो व्यक्त गर्दै कम्बोडियामा यी दुई क्षेत्रमा सुधार गर्न चेतावनी दिएको थियो । युनियनले कम्बोडियाले यी दुई क्षेत्रमा पर्याप्त सुधार नगरे स्वतन्त्र व्यापार पहुँच नदिने बताएको थियो ।
अतिकम विकसित मुलुकको सूचीमा परेको कम्बोडियालाई युनियनले केही दशकदेखि हातहतियार र गोलाबारुद बाहेकका सबै किसिमका वस्तुलाई युरोपेली बजारमा भन्सार छुट (ड्युटी–फ्री)मा प्रवेश दिएको छ ।
युरोपेली युनियनमा कम्बोडियाबाट सन् २०१८ मा करिब पाँच अर्ब ८६ करोड अमेरिकी डलरको सामान निर्यात भएको थियो ।
तीमध्ये तयारी पोशाक र जुत्ताचप्पलको निर्यात करिब दुई तिहाइ रहेको थियो ।
यस क्षेत्रमा करिब एक हजार १०० कारखाना रहेका र त्यहाँ करिब सात लाख ५० हजारले रोजगारी पाएका छन् ।
गत वर्ष मार्चमा कम्बोडिया सरकारले युरोपेली बजारको परनिर्भरता हटाउन विभिन्न सुधारका कदम घोषणा गरेको थियो । (रासस÷सिन्ह्वा)
