काठमाडौं– कोरोना भाइरसको संक्रमण तिव्ररूपमा फैलिँदै गएको छ । जसले गर्दा आममानिसमा त्रास फैलिएको छ । चीनबाट फैलिएको यो भाइरस १६ वटा मुलुकमा पुगेको विभिन्न अन्तर्राष्ट्रिय समाचार एजेन्सीहरूले जनाएका छन् ।
कोरोना भाइरसप्रति सर्तक रहन नेपाल सरकारले निर्देशन जारी गरिसकेको छ । चीनको वुहानबाट फैलिएको यो संक्रमण चीनबाट नेपाल आएका मानिसमा देखिएपछि स्वास्थ्य मन्त्रालयले सर्तक रहन निर्देशन गर्दै विभिन्न खाले सजकता अपाएको छ । चीनमा यो भाइरसबाट मंगलबारसम्ममा ८२ जनाको मृत्यु भइसकेको छ भने कम्तीमा ३ हजार संक्रमित भएको चिनियाँ सञ्चारमाध्यमले जनाएका छन् । त्यस्तै, कोरोनाभाइरसले अन्यत्र थप ४७ जना संक्रमित भएको मंगलबार सार्वजनिक भएको छ ।
नेपालसहित कम्तीमा १६ देशमा यो संक्रमण फैलिएको हो । यो भाइरसको संक्रमण पछिल्लोपटक क्यानडामा पनि फेला परेको जनाएको छ । हालसम्म चीनभन्दा बाहिर कोरोनाभाइरसको संक्रमणबाट कसैको मृत्यु भने भएको छैन । तर, विश्व स्वास्थ्य संगठन तथा राष्ट्रिय निकायहरूका अनुसार चीनबाहिर कम्तीमा ४७ संक्रमित देखिएको घटना पुष्टि गरेको छ ।
ती निकायका अनुसार अहिलेसम्म यो संक्रमणबाट थाइल्याण्डमा ८ र अमेरिका, अस्ट्रेलिया र सिंगाापुरमा समेत संक्रमित देखिएका छन् । ताइवान, मलेसिया र दक्षिया कोरियामा समेत यो संक्रमण देखिएको छ । ती निकायका अनुसार यी मुलुकमा अहिलेसम्म एक–एक जना संक्रमित देखिएका छन् ।
त्यस्तै, फ्रान्स र जापानमा पनि यो संक्रमण देखिएको छ । भियतनाममा समेत कोरोना भाइरसबाट तीन संक्रमित देखिएको बताइएको छ । साथै, क्यानडा, क्याम्बोडिया, श्रीलंका र जर्मनीमा समेत कोरोना भाइरसको संक्रमण देखिएकपछि विश्व स्वास्थ्य संगठनले चिन्ता व्यक्त गरेको छ । बेलैमा नियन्त्रण गर्न नसकेमा यो भाइरसले विश्वव्यापी रूपमा लिने हो कि भन्ने चिन्ता बढाएको छ ।
सोमबारमात्रै चीनको राजधानी बेइजिङमा एकजना ६० वर्षीय पुरुषको कोरोनाभाइरस संक्रमणका कारण ज्यान गएको छ । चीनमा फैलिरहेको कोरोनाभाइरसको संक्रमणमा बेइजिङमा ज्यान गएको यो पहिलो घटना हो । संक्रमणको केन्द्र वुहान सहर रहेको हुबेइ प्रान्तमा मात्र ७६ जनाको ज्यान गइसकेको चिनियाँ समाचार एजेन्सी सिन्हवाले जनाएको छ । अन्य बाँकी ६ जनाको चीनका अन्य भागमा ज्यान गएको हो ।
वुहान तथा चीनका कैयौँ अन्य सहरमा आवत–जावत कडाइपूर्वक नियन्त्रण गरिएको छ । एक करोड १० लाख जनसंख्या भएको वुहान सहरमा यातायात आवागमन मंगलबारदेखि बन्द गरिएको बताइएको छ ।
जहाँ अनावश्यक गाडीहरूलाई सडकमा निषेध गरिएको छ । हुबेइ प्रान्तको सिमानामा त्यहाँभित्र जान खोज्ने मानिसहरूको ज्वरो नाप्न थालिएको छ भने स्थानीय सरकारका अनुसार बितेको चार दिनमा वुहानबाट कोही पनि चीन बाहिर गएको छैन । वुहानका करिब ४ हजार ९६ जना अहिले देश बाहिर छन् । साथै, ५० लाख बासिन्दा नयाँ वर्षको उत्सवका मनाउन अगावै चीनका अन्य भागमा घुम्न गएका थिए । सांघाइ सहरमा १० फेबु्रअरीमा बिदा दिइएको छ । व्यवसायिक निकायहरूमा त्यतिञ्जेल काममा नआउन भनिएको छ ।
