विश्वमाझ नेपाली एउटा गीतको संगीत धेरैले मन पराउँछन्, त्यो हो रेशम फिरिरि... । चाहे त्यो संगीतमा जे सुकै होस् मन परेपछि पर्यो पर्यो ।नेपालीलाई त आफ्नो भाका मन पर्छ नै तर त्यही गीत विदेशीहरूमाझ पनि अझै लोकप्रिय नै छ, र रहोस् पनि । मंसिर ४ गतेको निर्वाचनपश्चात् राजनीतिक दलका शीर्षस्थ नेताहरूलाई घण्टीको रालोले निकै नै छट्पटाहट बनाएको छ ।
त्यही छट्पटाहटले गर्दा सत्ता लोलुपताका कारण अहिले सत्ताधारी विग्रेस पार्टीलाई पनि रेशम निकै मन परेको छ । विग्रेसको इतिहास नै पछिल्लो समय नामजस्तै काम हुन थालेको छ ।
त्यसमा मट्याङ्ग्रेहरूले सत्ताको स्वाद लिन पाएपछि किन छाड्थे र ! वाद, सिद्धान्त र विचार मारेर सत्ताको स्वाद लिन पल्केका मट्याङ्ग्राहरू आफ्नो स्वार्थ पूरा गर्नका लागि जे पनि गर्न सक्छन् भन्ने कुराको पुष्टि पुनः अध्यादेशले ल्याएको रेशम फिरि रिले गरिदिएको छ ।
सत्ताका लागि जोडघटाउमा लागेको वर्तमान ‘कठपुतली’ (जे मन लाग्यो त्यही गर्ने) सरकारले अहिले रेशमलाई निकै नै मन पराएको देखिन्छ । टीकापुर घटनाको मुख्य योजनाकारका रूपमा जेल रहेका रेशमलाई देउवा सरकारले जेल निकाला गर्ने भएछन् ।
‘मट्याङ्ग्रे’ अध्यादेशबाट रेशमलाई जेल निकाला गरी ‘फिरिरि’ गराउने अरे । हुन त नेपालाँ अहिले न्याय भनेकै ज्यानमारा, भ्रष्ट, विखण्डनकारीहरूले पाउनुपर्ने हो । विचराहरू कत्ति दुःख गरेर ज्यान मार्छन् भ्रष्टाचार गर्छन्, देश टुक्रयाउनुपर्दछ भन्ने त्यस्ता न्याय पाउन नै सकेका छैनन् ।
यस्ता होनहारले त न्याय नपाएको बेला जनता बबुरोले के पाउँछन्, र कसरी पाउँछन् त ? यही मौकामा विचरा रेशमलाई जेल निकाला गर्नु कुनचाहिँ
पाप भयो र ? डडेलधुराबाट देउ बा भन्दा भन्दै अहिले त दिउ वा भनेजस्तै भएछ ।
‘काले काले मिलेर खाउँ भाले’ भन्दै बालकोटबाट उखान टुक्का आयो भने रिसाउँछन् व्वाँसाहरू । आफूमात्र खाउँ भन्छन् कि क्या हो ! छेपारे उखानजस्तो नागरिकलाई यो दिन्छु र त्यो दिन्छु भनेर ढाँटेको जस्तो कहाँ हुन्छ र । त्यसमाथि पनि जाबो पुलिसाँ एसपीलाई ढिस्याउँ गर्दिएको त हो !
नागरिक उन्मुक्तिका लागि पार्टीको उबेला ढिस्याउँ गर्दिएबापत जेल गाको मान्छेलाई बेला न कुबेला जेल निकाला गर्ने त महान् नेता हुन् । जेल निकाला त्यसै भइन्छ र ? जेल निकाला हुन त यस्तै एसस्पी, बालबालिका जोसुकै हुन् ढिस्याउँ गर्न सक्नुपर्दछ । जसले ढिस्याउँ गर्छ त्यसैले देश चलाउँछ ।
मट्याङ्ग्रे मुर्दार, खाली किचकण्डेजस्तो गर्छ । खुरुखुरु नियमानुसार आका गर्दिनु नि । हुन त देउवाले पनि आका गर्दै रेशम फिरिरि गर्दिएका हुन् अध्यादेशमार्फत । रेशमको योगदानको कदर गर्दै बर्दिया र कैलालीका जनहरूले उनका अर्धांगिनीलाई मात्र होइन पिता महोदयलाई पनि मंसिर ४ मा पुष्प गुच्छासँग भारी मतले सेतो घरमा पुर्याइसकेका छन् ।
अब त दुई–चार दिनमा सेता घरमा पुग्ने छन् अनि त ढिस्याउँ गर्नेहरूसँगै कुम जोड्दै जनहरूलाई थर्काउने छन् । उ बेला जे भन्ने पापीले रेशम फिरिरि भन्दै सारंगी रेटेका थिए रे, ‘सेतासेता कपडामा कालाकाला मान्छे जनताद्धारा जनताले जनतालाई भन्थे कंगाल भए जनता नांगो पारेर यो देशको काट्टो खानेहरूले’हुन पनि अहिले त्यस्तै देखिन्छ ।
जनताले साधारण गल्ती गरे जीन्दगी भरी जेल कोच्ने कानून र ज्यान मारेर जेल गएकाहरूलाई सत्ताको स्वार्थका लागि जेल निकाला गर्ने महान नीति निर्माण गर्ने हाम्रा देउऽ बा जस्ता महान् पर धानमन्त्री भएपछि मट्याङ्ग्राहरूले धेरै फूर्ति नलगाए हुन्छ ।
न्याय नपाए गोर्खा जानु भन्ने उक्तिले काम गर्दैन अब । पाप धुरीबाट कराउँछ पनि होइन अब । पाप संसद्मा छिर्छ, नीति निर्माण गर्छ र जनता बबुरलाई थिच्नुसम्म थिच्छ भन्ने मट्याङ्ग्रे सिद्धान्तमा छ ।
अनि त्यही मट्याङ्ग्रेवादबाट प्रेरित भएको छ । त्यसले त्यो पापीले गीत सारंगी रेटेजस्तै जनतालाई महँगी, अन्याय, अत्याचार, भ्रष्टाचारले रेटिरेटि रेशम फिरिरि गर्ने हो । ‘संविधानकाँ नुन, ऐन, जनताहरूलाई मात्र छैन चैन ।’ जसले सक्छ त्यसले हान्छ भन्थे उ बेला । अब त्यस्ता मट्याङ्ग्राका गुलेलीले पनि काम छैन ।
गोली बारुदले ढिस्याउँ ढिस्याउँ गरेर सत्तामा पुग्ने अनि शोकलाई शौखमा बदल्ने साम्यवाद पाएपछि कसका बाउका के जान्छ । बरु रेशम फिरिरि गरिन्छ । काम नभएको नुन मट्याङ्ग्रेको भाषामा काँ ऽ नुनले देश, जनता चल्ने हो । नेता चल्ने होइन । नेता भएपछि नेताअनुसार कानुन चल्ने हो, खै कुरा बुझ्या मट्याङ्ग्राले ! मिल्ने भए मध्यरातमा पनि सुर्जेलाई दक्षिणमा ल्याएर राखिदिन्थे ।
घडीको सुई पनि रोकिदिन्थे । त्यही भएर त निर्वाचन भएर नयाँ कथा कोर्ने कथाकारहरू सेता घरमा छिर्नुअघि नै अध्यादेश ल्याउन परेको छ नि विचरा देउवालाई । उनका सारथीहरू ढेऽउवा खोज्दै छन् । ढिस्याउँ ढिस्याउँ गर्दै शोकलाई शौखमा बदल्नेहरूलेसाथ दिएका छन् ।
त्यसमा पनि अब त जाबो एसपीलाई ढिस्याउँ गर्दिएकै भरमा जेल बस्नु भनेको ठूलो अन्याय पो हुन्छ त । त्यही अन्याय भो भनेर बा र स्वास्नीलाई समेत सत्तामा पर्दापण गराउनका लागि जेल निकाला गर्दै रेशम फिरिरि गाउँदै छन्, अहिले देउऽ वा र ढेउवाहरु !
