तेहरान–तेहरानमा युक्रेनी विमान दुर्घटनामा मारिएका व्यक्तिहरूको सम्झनामा गरिएको एक कार्यक्रममा सहभागी भएर फर्किने बेला इरानको सुरक्षाकर्मीद्वारा पक्राउ परी छुटेका इरानका लागि बेलायती राजदूत इरानबाट फिर्ता भएको छ ।
‘राजदूत रोबर्ट मकेयरले तेहरानलाई आफू स्वदेश फिर्ता हुने विषय इरान सरकारलाई यस पहिले नै जानकारी गराएको थियो,’ इरानी राष्ट्रिय समाचार संस्था (आईआरएनए) इरानी अधिकारीलाई उद्धृत गरी बुधबार जनाएको छ ।
कूटनीतिक कानूनअनुसार कुनै पनि देशको राजदूत वा कूटनीतिज्ञहरूले बिदामा वा अन्य उद्देश्यका लागि स्वदेश फिर्ता हुन चाहेमा सरकारलाई सूचना दिई बाहिरिन सक्ने प्रावधान रहेको छ ।
‘मकेयरले इरान सरकारलाई आफू लण्डन फिर्ता हुने विषयमा पहिले नै जानकारी गराई सकेका थिए,’ आईआरएनएले आङ्खनो समाचारमा लेखेको छ ।
गत मङ्गलबार इरानी न्यायापालिकाका प्रवक्ता गुलामहुसेन इस्माइलीले इरानका लागि बेलायती राजदूत मकेयर सरकारविरोधी कार्यक्रममा ‘सहभागी भएको’ आरोप लगाउँदै उनलाई देश निकाला गर्नुपर्ने बताएको थियो ।
उनलाई गत शनिबार तेहरानमा युक्रेनी विमानमा मारिएका व्यक्तिहरूको सम्झनामा आयोजित कार्यक्रम, जुनपछि सरकारविरोधी प्रदर्शनमा परिणत भएको थियो, मा सहभागी भई कूटनीतिक मर्यादाविपरीत कार्य गरेको भन्दै इरानी अधिकारीहरूले उनलाई पक्राउ गरी सोधपुछपछि रिहा गरेका थिए ।
इरानी अधिकारीले तेहरानस्थित एक विश्वविद्यालयमा विद्यार्थीहरूले आयोजना गरेको कार्यक्रममा सहभागी भई सरकारविरूद्ध गतिविधि गर्न प्रोत्साहन गरेको आरोप लगाएका छन् ।
शनिबार नै इरानी प्रहरीका उच्च अधिकारीले उनलाई पक्राउ गरेको तर सोधपुछका क्रममा बेलायती कूटनीतिज्ञ भएको जानकारी पछि रिहा गरिएको जनाएको थियो । कार्यक्रममा सहभागिता जनाएको आरोपमा सरकारले उनलाई पत्राचार गरी मङ्गलबार जानकारी लिएको थियो ।
उनले युक्रेनी विमानमा ज्यान गुमाएका व्यक्तिहरूको सम्मानमा विश्वविद्यालयमा आयोजना गरिएको कार्यक्रममा आफूलाई निमन्त्रणा भएअनुसार सहभागी भएको तर कार्यक्रम हुँदै गर्दा आक्रोशित भीडले कुनै छेउबाट सरकारविरोधी नारा लगाउन थालेपछि त्यहाँबाट निस्किएको बताएको थियो ।
आफूले एक सैलुनमा सेवाका लागि रोकिएका समय इरानी सुरक्षाकर्मीले एक्कासी पक्राउ गरी करिब आधा घण्टा सुरक्षा नियन्त्रणमा राखेको मकेयरले बताएको थियो । (रासस÷सिन्ह्वा)
