यसपटकको स्थानीय चुनावमा नेकपा एमालेलाई जनताले सही ठाउँ देखाइदिएका छन् । एमालेले गरेको क्रियाकलापहरुको प्रतिफल निर्वाचनमा देखिसकिएको छ । जनताले नपत्याएर हार्दा पनि एमाले सहज तरिकाले आफ्नो हार स्वीकार गर्न तयार छैन । बरू, आरोपप्रत्यारोप गर्नमै एमाले नेतृत्व व्यस्त छ ।
के कारणले हामी हार्यौं भनेर कारण खोज्नुको साटो अरूमाथि दोष देखाएर एमाले पन्छिन खोज्दै छ । सत्तापक्षले सत्ताको दुरुपयोग र धाँधली गरेर आफूलाई हराएको एमालेको दाबी छ । २०७४ सालमा सबैभन्दा बढी स्थानीय तहमा एमाले निर्वाचित भएको थियो । यता, संसदीय चुनाव पनि एमाले नै पहिलो पार्टी बनेको थियो ।
यी दुवै चुनाव गराउँदा प्रधानमन्त्री शेरबहादुर देउवा थिए । तर, त्यतिखेरको चुनावमा कांग्रेसले हार्यो । सत्ता नै प्रयोग गर्ने भएको भए त त्यतिखेर कांग्रेस नै सरकारमा आउनुपथ्र्यो । चाहेको भए देउवाले त्यतिखेर नै धाँधली गर्न सक्थे । तर, उनले हार स्वीकारे, आरोप लगाउने काम गरेनन् ।
प्रधानमन्त्री पद त्याग्ने बेलामा देउवाले एउटा महत्वपूर्ण निर्णय गरेका थिए । जनताको हितमा गरिएको निर्णय केपी ओली प्रधानमन्त्री भएर आउनेबित्तिकै उल्टाइदिए । ७० वर्षबाट घटाएर ६५ वर्षमै ज्येष्ठ नागरिकभत्ता दिने निर्णय गरिएको थियो । अर्कोतिर, मिर्गौला, क्यान्सर, मेरुदण्डलगायत दीर्घकालिन रोग लागेकालाई मासिक पा“च हजार रुपैयाँ दिने भनिएको थियो ।
यो निर्णयले धेरै गरिब र बिरामीहरु निकै खुसी भएका थिए । बिरामीहरुलाई निकै राहत भएको थियो । पाँच हजारले बिहानबेलुका पेटमा अन्न हाल्न पाइन्छ कि भनेर धेरै हर्षित बनेका थिए । देउवाको निर्णयबाट एमालेकै कार्यकर्ताहरु पनि मख्ख परेको थिए । आफ्नो आन्दोलन सफल हुने भयो भनेर खुसी भएका दीर्घकालीन रोगीहरुको एकछिनमै गुपचुप हुन बाध्य भए ।
बालुवाटार अगाडि चर्को घाममा आन्दोलन गरे । माइतीघरमा भोको पेट धर्ना बसे । केका लागि मासिक पाँच हजार ? त्यसले औषधि खान भए पनि हुन्छ भन्नेमा उनीहरु विश्वस्त थिए । ७० वर्षमा दिने भत्ताको उमेर हद घटाउनुपर्छ । भत्ता बढाएर पाँच हजार रुपैयाँ पुर्याउनुपर्छ ।
सार्वजनिक यातायातमा भाडा छुट दिनुपर्छ भनेर पनि ज्येष्ठ नागरिकहरुले मिनभवनमा धर्ना दिएका थिए । एमालेले यसअघिको स्थानीय र संसदीय चुनावमा मासिक भत्ता बढाइदिने भनेर भोट माग्यो । त्यतिखेर सरकारले ज्येष्ठ नागरिकलाई जम्मा दुई हजार भत्ता दिन्थ्यो । त्यसलाई बढाएर पा“च हजार पुर्याउँछौं भन्ने आश्वासन दिएर मतजति सबै आफ्नो पोल्टामा पार्यो ।
जनताको भोटबाट एमाले पहिलो पार्टी बन्यो । २०७४ फागुन ३ गते ओली प्रधानमन्त्री भए । प्रधानमन्त्री भएलगत्तै देउवाको निर्णय सबै पानीमा बग्यो । ज्येष्ठ नागरिक र दीर्घकालीन रोगीको हितमा गरिएको निर्णय खारेज गरियो । कांग्रेस पार्टी जनतासामु बिक्छ भन्ने डरले यसो गरिएको प्रस्ट बुझिएको छ ।
आफू पहिलो पार्टी हुँदा एमालेले किन एक शब्द पनि निकालेन । त्यतिखेर पनि धाँधली भयो भनेर बोल्नुपथ्र्यो । अब आउने चुनावमा एमालेस“ग जनतासामु जाने नारा छैन । जनतालाई झुक्याउने बहाना पनि छैन ।
चुनावअघि चर्को कुरा गर्ने एमाले अध्यक्ष केपी ओली अहिले पार्टी खुम्चिएपछि धाँधली भयो भनिरहेका छन् । यो भनेको हार स्वीकार गर्न नसक्नु हो । सधैँ आफैं मात्र जित्नुपर्छ भन्ने अहम् ओलीमा रहेको यसबाट प्रस्ट हुन्छ । यो प्रवृत्ति आफ्नै लागि घातक हुनेछ भन्ने कुरा अब बुझ्न जरुरी छ ।
(अमित राना -सातदोबाटो, ललितपुर)
