काठमाडौं- देशभरका ७५३ पालिकामध्ये आइतबार साँझ ८ बजेसम्ममा ७१६ पालिकाको अन्तिम परिणाम सार्वजनिक भएको छ । हाल दुई पालिकाको गणना स्थगित रहेको छ भने र बाँकी ३५ पालिकाको गणना जारी छ ।
हालसम्म छ महानगरपालिकामध्ये विराटनगर महानगरपालिकाको मात्रै अन्तिम नतिजा सार्वजनिक भएको छ । काठमाडौं महानगरपालिका, ललितपुर महानगरपालिका, पोखरा महानगरपालिका, भरतपुर महानगरपालिका र वीरगञ्ज महानगरपालिकाको गणना जारी छ ।
उपमहानगरपलिकामा हालसम्म धरान, धनगढी, इटहरी, हेटौँडा, बुटवल, नेपालगञ्ज, घोराही, जीतपुर–सिमरा र कलैया गरी नौ वटाको अन्तिम परिणाम सार्वजनिक भएको छ । अझै तुलसीपुर र जनकपुरको गणना जारी छ ।
तनहुँको व्यास नगरपालिका, पाल्पाको रम्भा गाउँपालिकालगाायत विभिन्न नगरपालिकामा पनि गणना जारी रहेको निर्वाचन आयोगले जनाएको छ । आयोगले जेठ १० गतेभित्र सबै पालिकामा गणना सकाउन आग्रह गरेको छ ।
लसम्मको गतिका आधारमा काठमाडौं, ललितपुर महानगरपालिकालगायत गणना समयमा नसकिने देखिएको छ ।
काठमाडौं महानगरपालिका प्रमुखमा स्वतन्त्र उम्मेदवार बालेन्द्र शाह र उपप्रमुखमा नेकपा एमालेकी सुनिता डंगोलको अग्रता छ । आइतबार राति ११ बजेसम्म शाहले ४१ हजार २७१ र उनका निकटतम प्रतिस्पर्धी नेपाली कांग्रेसकी सिर्जना सिंहले २३ हजार ८५५ मत प्राप्त गरेका छन् । उपप्रमुखमा डंगोलको ४२ हजार ४२८ र उनको निकटतम प्रतिस्पर्धी नेकपा एकीकृत समाजवादीका रामेश्वर श्रेष्ठको १४ हजार २५२ मत पाएका छन् ।
ललितपुर महानगरपालिका प्रमुखमा कांग्रेसका उम्मेदवार चिरीबाबु महर्जन र उपप्रमुखमा एमालेकी मञ्जली शाक्यको अग्रता रहेको छ । आइतबार राति ११ बजेसम्मको मतपरिणामअनुसार कांग्रेसका उम्मेदवार महर्जनले ३३ हजार ७६७ र उनका निकटतम प्रतिस्पर्धी एमालेका हरिकृष्ण ब्यञ्जनकारले १९ हजार ४९९ मत पाएका छन् । उपप्रमुखमा एमालेकी उम्मेदवार मञ्जली शाक्यले १८ हजार ९७६ मत र उनका निकटतम प्रतिस्पर्धी नेकपा माओवादी केन्द्रका बाबुराजा बज्राचार्यले १४ हजार ३७१ मत पाएका छन् ।
भरतपुर महानगरपालिकामा माओवादी केन्द्रकी रेनु दाहाल र पोखरा महानगरमा एकीकृत समाजवादीका धनराज आचार्यले अग्रता लिइरहेका छन् । यस्तै वीरगञ्ज महानगरपालिकामा जनता समाजवादी पार्टीका उम्मेदवार राजेशमान सिंह अगाडि रहेका छन् । दाहाल, आचार्य र सिंह गठबन्धनबाट उम्मेदवार बनेका हुन् ।
प्रकाशित मिति: सोमबार, जेठ ९, २०७९ ११:१४
