अन्तिम परिणाम आएका ५१० पालिका एमालेलाई पछि पार्दै कांग्रेस पहिलो
काठमाडौं- वैशाख ३० गते सम्पन्न स्थानीय तह निर्वाचनको मतपरिणाम आउने क्रम जारी छ । बुधबार राति ११ बजेसम्म ५१० पालिकाको अन्तिम मतपरिणाम घोषणा भइसकेको छ । छ वटा महानगरपालिकासहित २४३ वटा पालिकाको मतगणना चलिरहेको छ ।
यो समाचार तयार पार्दासम्म प्रँप्त मतपरिणामका आधारमा नेपाली कांग्रेसले अग्रस्थान ओगटेको छ । कूल २२९ पालिकाको प्रमुख/अध्यक्ष जित्दै कांग्रेसले नेकपा एमालेलाई दोस्रो स्थानमा धकेलेको हो । २०७४ को स्थानीय निर्वाचनमा एमाले सबैभन्दा धेरै पालिकामा जित हात पार्दै पहिलो दल बनेको थियो ।
यसपटक सत्तारुढ पाँच दलले गठबन्धन गरी चुनाव लडेका कारण एमालेले पहिलो स्थान गुमाउन पुगेको हो । बुधबार रातिसम्मको परिणामअनुसार एमालेले १४६ पालिकामा प्रमुख/अध्यक्ष जितेको छ ।
यस्तै, नेकपा माओवादी केन्द्र ९८ पालिका प्रमुख/अध्यक्षमा विजयी हासिल गर्दै तेस्रो स्थानमा कायम रहेको छ । २०७४ को स्थानीय चुनावमा पनि माओवादी तेस्रो स्थानमा थियो । जनता समाजवादी पार्टी (जसपा)ले ११ पालिकामा जित हात पारेको छ । नेकपा एकीकृत समाजवादीले नौ पालिकाको प्रमुख/अध्यक्ष जितेको छ ।
यसैगरी राष्ट्रिय जनमोर्चाले चार, राष्ट्रिय प्रजातन्त्र पार्टीले दुई तथा नेपाल मजदुर किसान पार्टी (नेमकिपा), लोकतान्त्रिक समाजवादी पार्टी (लोसपा), तराई मधेस लोकतान्त्रिक पार्टी (लोसपा) र जनमत पार्टीले एक/एक पालिकामा जित हात पारेका छन् । सातवटा पालिकामा स्वतन्त्र उम्मेदवार विजयी भएका छन् ।
यता उपप्रमुख/उपाध्यक्षतर्फ नेपाली कांग्रेसले २१४, एमालेले १५४, माओवादी केन्द्रले १०५, एकीकृत समाजवादीले १६ र जनता समाजवादीले १२ पालिकामा जित हात पारेका छन् । राष्ट्रिय जनमोर्चाले तीन, लोसपाले दुई, नेमकिपा र राप्रपाले एक/एक तथा स्वतन्त्र एक पालिकामा उपप्रमुख/उपाध्यक्ष जितेका छन् ।
नेपाली कांग्रेसले अझै ८६ पालिकाको प्रमुख/अध्यक्ष र ७९ पालिकाको उपप्रमुख÷उपाध्यक्षमा अग्रता लिइरहेको छ । यस्तै, एमाले ५३ पालिका प्रमुख/अध्यक्ष र ८३ उपप्रमुख/उपाध्यक्ष पदमा अग्रता बनाइरहेको छ । माओवादी केन्द्र २० पालिका प्रमुख/अध्यक्ष र १९ उपप्रमुख/उपाध्यक्ष, जसपा २३ प्रमुख/अध्यक्ष र १५ उपप्रमुख/उपाध्यक्ष, एकीकृत समाजवादी ११ प्रमुख/अध्यक्ष र चार उप्रमुख/उपाध्यक्ष तथा लोसपाले १० प्रमुख/अध्यक्ष र १० उप्रमुख/उपाध्यक्ष पदका लागि अग्रता बनाइरहेका छन् ।
महानगरको अपडेट
छ वटा महानगरपालिकामध्ये कांग्रेस दुई, माओवादी केन्द्र, एकीकृत समाजवादी, जसपा र स्वतन्त्र एक/एक वटामा अगाडि छन् । काठमाडौं महानगरपालिकामा स्वतन्त्र उम्मेदवार बालेन (बालेन्द्र) शाहले अग्रता कायम राखेका छन् । बुधबार राति ११ बजेसम्मको परिणामअनुसार उनले १९ हजार ५२३ पाएका छन् । उनलाई पछ्याइरहेका एमाले उम्मेदवार केशव स्थापितले १० हजार ३० मत जोडेका छन् भने कांग्रेसकी सिर्जना सिंहले नौ हजार १३२ मत पाएकी छन् । यहाँ मतगणना सुस्त गतीमा भइरहेको छ ।
भरतपुर महानगरपालिकामा गठबन्धनबाट उम्मेदवार बनेकी माओवादी केन्द्रकी रेनु दाहाल ११ हजार ९० मतका साथ अगाडि छन् । एमालेका विजयी सुवेदीले नौ हजार ९० मतका साथ रेनुलाई पछ्याइरहेका छन् । कांग्रेसका बागी उम्मेदवार जगन्नाथ पौडेलले चार हजार ९५८ मत जोडेका छन् ।
पोखरा महानगरपालिकामा एकीकृत समाजवादीका धनराज आचार्य अगाडि छन् । उनले १७ हजार २४२ मत जोड्दा एमालेका कृष्णबहादुर थापाले १५ हजार २१० मत पाएका छन् । आचार्य गठबन्धनबाट उम्मेदवार बनेका हुन् ।
यस्तै, वीरगञ्ज महानगरपालिकामा जसपाका राजेशमान सिंह १४ हजार २६८ मतका साथ अगाडि छन् । एमालेका विजय सरावगी सात हजार २४४ मतका साथ दोस्रो स्थानमा छन् ।
ललितपुर महानगरपालिकामा गठबन्धनका उम्मेदवार कांग्रेसका चिरीबाबु महर्जन १३ हजार ६४६ मतका साथ अगाडि छन् । एमालेका अरिकृष्ण व्यञ्जनकार सात हजार ५१ मतका साथ दोस्रो स्थानमा छन् ।विराटनगर महानगरपालिकामा कांग्रेसका नागेश कोइराला १५ हजार ४३० मतका साथ अगाडि छन् । गठबन्धनका उम्मेदवार कोइरालालाई एमालेका सागरकुमार थापाले ११ हजार ४९३ मतका साथ पछ्याइरहेका छन् ।
