काठमाडौं– वर्तमान सत्ता गठबन्धनलाई आउँदो चुनावसम्म निरन्तरता दिने वा नदिने विषयमा सत्ताको नेतृत्वकर्ता नेपाली कांग्रेसभित्र प्रस्ट दुई धार देखिएको छ ।
प्रधानमन्त्रीसमेत रहेका कांग्रेस सभापति शेरबहादुर देउवा गठबन्धनलाई निरन्तरता दिने पक्षमा छन् भने नेता डा.शेखर कोइराला समूह यसको विपक्षमा छ । जसले गर्दा कांग्रेसभित्र विवाद देखिएको छ ।
शेखर समूह नेतृत्वस“ग असन्तुष्ट बनेको छ । छुट्टै भेला, बैठक गर्न थालेको छ ।शेखर समूहको असन्तुष्टिमा बल पुग्नेगरी सभापति देउवाले अर्को काम गरे– नेपाल विद्यार्थी संघ र तरूण दलमा अध्यक्ष नियुक्ति । देउवाले बुधबार नेविसंघको अध्यक्षमा डुजाङ शेर्पा र तरूण दलको अध्यक्षमा विद्वान गुरुङलाई नियुक्त गरेपछि शेखर समूह थप सशंकित बनेको छ ।
नेविसंघ र तरूण दलको जिम्मेवारी पाएका शेर्पा र गुरुङ दुवैजना देउवापक्षका हुन् ।व्यक्तिप्रति कुनै आपत्ति नरहे पनि पद्धति मिचिएको शेखरपक्षको भनाइ छ । कार्यसम्पादन समितिस“ग परामर्श गरेर टुंग्याउनुपर्नेमा एकलौटी ढंगले नियुक्ति गरेर सार्वजनिक गर्ने कुरा पद्धतिविरुद्ध रहेको उक्त पक्षको बुझाइ छ । यसलाई केन्द्रीय समितिमा लैजाने यो समूहको तयारी छ ।
गठबन्धनलाई निरन्तरता दिनुपर्छ भनेर सार्वजनिक अभिव्यक्ति दिने गरेको र पार्टीभित्र एकलौटी निर्णय गर्न थालेको भन्दै शेखर समूह झस्किएको हो । देउवाले बिहीबार पनि तनहुँमा भएको एक कार्यक्रममा गठबन्धनलाई चुनावसम्म बचाएर लैजानुपर्ने अहिलेको आवश्यकता रहेको दोहोर्याए । स्थानीय चुनावमा मात्र नभई प्रतिनिधिसभा र प्रदेशसभाको निर्वाचनसम्म नै गठबन्धनलाई लैजानुपर्ने देउवाले बताए ।
यता शेखर समूहले बुधबार पनि भेला गरेको थियो । जहाँ नेताहरूले गठबन्धनका नाममा पार्टीको संस्थापनपक्षले आफूहरूलाई किनारा लगाउन खोजेको आशंका गरेका थिए । केन्द्रीय समितिको बैठकअघि बसेको शेखरपक्षको बैठकले गठबन्धनको सन्दर्भमा संस्थापनपक्षले लिएको नीतिप्रति चर्को असन्तुष्टि जनाएको थियो । त्यसको भोलिपल्ट (बिहीबार) तनहुँ पुगेर देउवाले शेखरपक्षको आशंकालाई बल पुग्नेगरी बोलेपछि यो समूह थप झस्किएको छ ।
‘पार्टीभित्रको एकपक्षलाई किनारा लगाएर गठबन्धन गर्ने नाममा जुन भागबण्डा गर्ने प्रयास भइरहेको छ, त्यसको प्रतिवाद गर्ने निर्णय भएको छ । आगामी केन्द्रीय समिति बैठकमा हामी यो कुरा उठाउनेछौं,’ बुधबारको भेलापछि शेखर समूहका एक नेताले भनेका थिए ।
शेखर समूहको भेलामा उपसभापति धनराज गुरुङ, महामन्त्री गगन थापा, सहमहामन्त्रीद्वय जीवन परियार र बद्री पाण्डे, नेताहरू अर्जुननरसिंह केसी, बलबहादुर केसी, चन्द्र भण्डारी, मिनेन्द्र रिजाल, अजयबाबु शिवाकोटी, सञ्जय गौतम, प्रतिमा गौतमलगायत सहभागी भएको बतँइएको छ ।
कांग्रेसको विधानअनुसार उम्मेदवार टुंग्याउन चारवटा संसदीय बोर्ड भए पनि सबै केन्द्रबाटै टुंग्याउने सभापति देउवापक्षको तयारीविरुद्ध पनि केन्द्रीय समितिमा कुरा उठाउने शेखरपक्षको तयारी छ । भागबण्डाका नाममा केन्द्रबाटै टुंग्याउने तरिका पद्धतिअनुसार नमिल्ने बताइएको छ । केन्द्रीय संसदीय बोर्डले पनि महानगरको मात्रै टुंग्याउन सक्ने एक नेताले बताए । तर, सबै केन्द्रबाटै टुंग्याउने कुरा मान्य नहुने उनको भनाइ छ ।
कांग्रेस केन्द्रीय समिति बैठक आज (शुक्रबार)का लागि बोलाइएको छ । दिउ“सो २ बजे केन्द्रीय कार्यालय सानेपामा बस्ने बैठकमा स्थानीय तह निर्वाचनको तयारी एवं ‘घर–घर जाऔँ, कांग्रेस जिताऔँ’ अभियानको प्रारम्भिक समीक्षा, संसदीय समिति गठनलगायत विषयमा छलफल हुने कार्यसूची रहेको कांग्रेस केन्द्रीय कार्यालयका मुख्यसचिव कृष्णप्रसाद पौडेलले जानकारी दिएका छन् ।
तर, शेखरपक्षले भने नेविसंघ र तरूण दलमा भएको नियुक्तिको विषयलाई केन्द्रीय समितिको बैठकमा मुख्य विषयका रूपमा उठाउने तयारी गरेको छ । केन्द्रीय समिति बैठकको पूर्वसन्ध्यामा बिहीबार पनि शेखरपक्षले छुट्टै भेला गरेको थियो । जहा“ नेविसंघ र तरूण दल अध्यक्ष नियुक्तिमा सशक्त प्रतिवाद गर्ने निर्णय भएको छ । छलफलमा समानान्तर नेतृत्व गठन गर्नुपर्नेसम्मका धारणा आएको नेताहरूले बताएका छन् ।
डा. कोइरालाले नेविसंघ, तरूण दल, महिला संघलगायतका भ्रातृ स“गठनका केही पूर्वनेतासहित आफूपक्षीय केन्द्रीय सदस्यहरूलाई उक्त निर्णयका विषयमा छलफलका लागि बोलाएका थिए । छलफलमा आएकाहरूले संस्थापनपक्षको निर्णयविरुद्ध उत्रिनुपर्ने धारणा राखेका थिए ।
स्थानीय निर्वाचनको छेकमा भएको यो निर्णयबाट शेखरपक्षका नेताहरूले देउवा एकपक्षीय रूपमा अघि बढ्न खोजेको रूपमा बुझेका छन् । आगामी निर्वाचनमा आफ्नो गुट र अनुकूललाई मात्रै टिकट दिन देउवा हदसम्म पुग्नसक्ने आशंका यो समूहको छ । पार्टीभित्र सहमति र सहकार्य गरेर भ्रातृस“गठनको नेतृत्व दिने कार्यसम्पादन समितिको निर्णय भए पनि देउवाले थप सल्लाह नगरी आफू अनुकूलकालाई नेतृत्व दिएको शेखरपक्षको दाबी छ ।
‘कांग्रेस नर्सरी’का रूपमा बुझिने नेविसंघ र ‘दोस्रो कांग्रेस’को रूपमा रहेको तरूण दलमा नेतृत्व ल्याउँदा विधि र पद्धतिको अवलम्बन गर्नुपर्ने शेखरपक्षका नेता मनोजमणि आचार्यले बताए । देउवा सि“गो कांग्रेसको नभएर एउटा समूहको मात्रै सभापति भएजस्तो देखिएको नेताहरूले बैठकमा टिप्पणी गरेको आचार्यले बताए । शेखर समूहका नेताहरूले वरिष्ठ नेता रामचन्द्र पौडेल, पूर्वमहामन्त्री शशांक कोइराला र प्रकाशमान सिंहलाई संस्थापन समूहकै भएको निष्कर्षसमेत निकालेका छन् ।
शेखर समूहको भेलामा नेता चन्द्र भण्डारी, केन्द्रीय सदस्य प्रतिमा गौतम र गोविन्द पोखरेल, नेविसंघका पूर्वअध्यक्ष गुरुराज घिमिरे, केशव सिंह, तरूण दलका पूर्वअध्यक्ष विनोद कायस्थ, नेविसंघका नेता मनोजमणि आचार्य, दिनेश राई, मोती भण्डारी, कमला थापा, रीता खनाल, कुसुम थापा, भूपेन्द्रजंग शाहीलगायत सहभागी थिए ।
