काठमाडौं– सरकारले पछिल्लो समय लगातार पेट्रोलियम पदार्थको मूल्य बढाउन थालेपछि सत्ता गठबन्धन दल आवद्ध संयुक्त विद्यार्थी संगठनहरू नै विरोधमा उत्रिएका छन् । पेट्रोलियम पदार्थको मूल्यवृद्धि भएकोप्रति उनीहरूले संयुक्त रूपमा विज्ञप्ति जारी गर्दै आपत्ति जनाएका छन् ।
सत्तारुढ गठबन्धनमा रहेका नेपाली कांग्रेसबाहेकका अरु चार दलका विद्यार्थी संगठनले शनिबार विज्ञप्ति जारी गरी मूल्यवृद्धि जनताको हितविरुद्ध भएको भन्दै फिर्ता लिन आग्रह गरेको छ ।
कांग्रेसको भ्रातृ संगठन नेपाल विद्यार्थी संघसहितको मोर्चामा रहेको अन्य चार विद्यार्थी संगठनले विरोध जनाए पनि नेविसंघले भने सहभागिता जनाएको छैन । यसअघि सबैजसो प्रकरणमा संयुक्त रूपमा धारणा सार्वजनिक गर्ने नेविसंघ पेट्रोलियम पदार्थको मूल्य वृद्धिविरुद्ध निकालिएको विज्ञप्तिमा सहभागी नभएको हो ।
विज्ञप्तिमा सरकारले जनताविरोधी निर्णय गरेको उल्लेख गरिएको छ । ‘जनतालाई राहत दिनेतर्फ नसोची पटकपटक गरिएको मूल्यवृद्धि जनहित विरुद्धमा छ,’ संयुक्त विज्ञप्तिमा भनिएको छ, ‘अर्कोतिर पेट्रोलियम पदार्थमा भएको मूल्यवृद्धि देखाएर जनताका दैनिक उपभोग्य समानमा समेत कालोबजारी व्यापक भइरहेको छ । हामी नेपाल सरकार र नेपाल आयल निगमसँग विगतमा संयुक्त विद्यार्थी संगठनसँग गरिएका सम्झौता तत्काल कार्यान्वयन गरी पछिल्लो समय गरिएको मूल्यवृद्धि तत्काल फिर्ता लिन जोडदार माग गर्दछौँ ।’
विज्ञप्तिमा हप्तादिन नबित्दै पेट्रोल, डिजल र मट्टितेलमा पटकपटक गरिएको मूल्यवृद्धिले यातायात र ढुवानीमा प्रत्यक्ष प्रभाव पारेको उल्लेख गर्दै यसले जनताको दैनिक उपभोग्य वस्तु र सेवामा समेत चरम मूल्यवृद्धि भएको बताइएको छ ।
त्यस्तै, चार विद्यार्थी संगठनले जनताको प्रत्यक्ष जीवनसँग जोडिएको पेट्रोलियम पदार्थमा राज्यले विभिन्न परियोजना निर्माणका निम्ति कर थोपर्नाले वास्तविक मूल्यभन्दा जनताले बढी कर तिर्न बाध्य भइरहेको उल्लेख गरेका छन् । उनीहले जनताले तिरेको उक्त करको वास्तविक अर्थमा सही सदुपयोग नभइरहेको आरोप लगाइएको छ । त्यस्तै, आयल नियमभित्रको चुहावट, भ्रष्टाचार, कमिसन दिनानुदिन बढ्दै गइरहेको उल्लेख गर्दै त्यसतर्फ नियन्त्रण गरी जनतालाई राहत दिनेतर्फ नसोची पटकपटक गरिएको मूल्यवृद्धि जनहितविरुद्धमा रहेको उल्लेख गरिएको छ ।
चार विद्यार्थी संगठनले पछिल्लोसमय बढाइएको मूल्यवृद्धि तत्काल फिर्ता लिन माग गर्दै पटकपटक पेट्रोलियम पदार्थमा हुनेगरेको मूल्यवृद्धिको दीर्घकालीन समाधान खोज्न आग्रह गरिएको छ ।संयुक्त विज्ञप्तिमा नेपाली कांग्रेसको विद्यार्थी संगठन नेपाल विद्यार्थी संघ (नेविसंघ) को भने हस्ताक्षर छैन । यसअघि सत्ता गठबन्धन आवद्ध सबै विद्यार्थीले हरेक विषयमा संयुक्त विज्ञप्ति निकाल्ने गरेका थिए ।
शनिबार जारी गरिएको विज्ञप्तिमा नेविसंघबाहेकका सत्ता गठबन्धनमा आवद्ध विद्यार्थी संगठनको मात्रै हस्ताक्षर छ ।विज्ञप्तिमा माओवादी केन्द्रको विद्यार्थी संगठन अखिल (क्रान्तिकारी) की अध्यक्ष पञ्चा सिंह, एकीकृत समाजवादीनिकट अनेरास्ववियुका अध्यक्ष सुदेश पराजुली, जनता समाजवादीनिकट समाजवादी विद्यार्थी युनियनका अध्यक्ष रूपनारायण श्रेष्ठ र राष्ट्रिय जनमोर्चानिकट अखिल छैटौँका अध्यक्ष देवेन्द्र कुँवरले हस्ताक्षर गरेका छन् ।
प्रकाशित मिति: आइतबार, चैत ६, २०७८ १०:५२
