मुलुकको राष्ट्रिय राजनीति, गतिहीन, दिशाहीन तरिकाबाट अगाडि बढिरहेको छ । कहाँ पुग्ने गन्तव्यविहीन तरिकाबाट देशको हरेक क्षेत्र अघि बढिरहेको छ । गणतन्त्र, संघीयता र धर्मनिरपेक्षता यो देशको लागि अहिलेसम्मको सरकार संचालन तौरतरिकाबाट अफापसिद्ध हुँदै गइरहेको छ । भ्रष्टाचार नांगो रूपमा भइरहेको छ । दिनानुदिन नेपाली जनता परनिर्भर हुँदै विदेशिन बाध्य भएका छन् । स्वदेशमा उद्योग कलकारखाना खोल्नको लागि यो सरकारले कुनै तयारी गरेको देखिँदैन । खाद्यन्नदेखि दैनिक उपभोग्य सामग्रीहरू मित्र राष्ट्र भारत, चीन र अन्य मुलुकबाट आयात गरिरहनु पर्ने अवस्था छ । आज नेपालको उर्वर जमिनहरू बाँझो बनिरहेको छ । संघीयताकै कारणले असाधरण खर्च खेर गइरहेको छ । स्थानीय सरकारदेखि प्रादेशिक र संघीय सरकारहरूलाई गाडी, मोटरसाइकल तलब भत्ता दिनुपर्ने कारणले असाधारण खर्च बढेर गएको छ । ठूल्ठूला भ्रष्टाचारको काण्ड तथा मुद्दाहरू केपी ओली नेतृत्वको सरकार र शेरबहादुर देउवा नेतृत्वका सरकारले उन्मुक्ति दिँदै आइरहेको छ । भ्रष्टाचारीहरू, अपराधीहरू समाजमा दण्डहीनताको कारणले थप भ्रष्टाचार गर्नका लागि तम्तयार भएर बसेको अवस्था छ ।
भर्खर राष्ट्रिय प्रजातन्त्र पार्टीको ऐतिहासिक एकता महाधिवेशन सम्पन्न भएको छ । महाधिवेशन अत्यन्त प्रजातान्त्रिक विधि, पद्धतिअनुसार सम्पन्न भएको छ । अत्यन्त प्रजातान्त्रिक विधि, पद्धतिअनुसार नेतृत्व चयन भएको छ । मुलुकमा क्रियाशील राजनीतिक दलहरूमध्ये राष्ट्रिय प्रजातन्त्र पार्टी (राप्रपा) ले समावेशी, प्रजातान्त्रिक पार्टीको रूपमा स्थापना र सबै जाताजाति, धर्म, संस्कृति, रितिरिवाज, परम्पराप्रति आस्थावानहरूलाई पार्टीभित्र विधि, प्रकृया र स्थान सुनिश्चित छ भन्ने सन्देश राप्रपा महाधिवेशनले दिएको छ । अवश्य, नेपाल र नेपाली जनता र पार्टी हितको लागि हामीले आसा गरेको भन्दा बढी राजेन्द्र लिङ्देनले जिम्मेवारी पूरा गर्नु हुनेछ भन्ने मैले आसा भरोसा गरेको छु ।
यसै क्रममा राप्रपाका निवर्तमान अध्यक्ष कमल थापाले राप्रपाको सदस्य नरहने गरी पार्टी छोड्ने घोषणा गरेको सुन्नमा आएको छ, यो अप्रत्यासित घटनाले हामी सबैलाई दुःखी बनाएको छ । राप्रपाको स्थापनाकालदेखि विभिन्न पदहरूमा बस्दै १५ वर्ष राप्रपाको अध्यक्षसमेत भइसकेको र यही राप्रपाको नामबाट पटक–पटक मन्त्री, उपप्रधानमन्त्रीसमेत भइसकेको व्यक्तिले अप्रत्यासित रूपमा यस्तो निर्णय गरेको सुन्दा अत्यन्तै दुःख मनाउ लागेको छ । त्यसैले उपत्यकामा उपलब्ध पदाधिकारीहरूको बैठकले यो निर्णय फिर्ता लिन, फेरि पनि राप्रपामै सक्रिय भूमिका निर्वाह गर्न आग्रह गरेको छ । मलाई आसा छ उहाँले पुनः राप्रपामै रहेर सक्रिय राजनीतिमा पुनरागमन गर्नु हुनेछ ।
वर्तमान सत्ता गठबन्धन सत्ता शक्ति पैसा प्राप्त गर्नका लागि जस्तोसुकै कार्यहरू गर्न पनि तम्तयार रहेको देखिन्छ । जनजीविकाको मुद्दालाई कुनै वास्ता गरेको देखिँदैन । न्यायलयमा सत्ता गठबन्धन कै प्रभाव छ । व्यवस्थापिका संसद अनिर्णयको बन्दी बनिरहेको छ । यो सबै दोषको भागिदार सत्ता गठबन्धन र नेकपा एमालेलाई नै जान्छ । सत्ता गठबन्धन सत्ताको लागि मात्र लागेको देखिन्छ भने एमालेले पनि प्रमुख प्रतिपक्षको धर्म ननिभाएर संसद अवरुद्ध गरिरहेको छ । यसले के देखाउँछ भने सत्ता गठबन्धन र एमालेको विकल्प जनताले खोजेको अवस्था छ । भर्खर सम्पन्न एमालेको महाधिवेशनबाट प्रजातान्त्रिक विधी प्रकृयालाई मिचेर एकदलीय तानाशाही उन्मुख एमाले देखिन्छ । सरसर्ती हेर्दा जनताले यतिबेला विकल्प खोज्नु स्वभाविक हो ।
२०४६ सालदेखि अहिलेसम्म बनेका सरकारले पूर्ण कार्यकाल सरकार सञ्चालन गर्न पाएका छैनन् । देशी–विदेशी शक्ति केन्द्रहरूको चलखेलका कारणले पूर्ण कार्यकाल सरकार सञ्चालन गर्न नदिएको स्थिति देखिन्छ । त्यसैले जनताबाट प्रत्यक्ष निर्वाचित कार्यकारी प्रधानमन्त्री मुलुकको लागि आवश्यक छ ।
अमेरिकी सहयोग मिलेनियम च्यालेन्ज कर्पोरेसन (एमसिसी)बारे मेरो अध्ययन, चिन्तन मनन्अनुसार नेपाल र नेपाली जनताको हितमा छैन । जहाँसम्म त्यस सम्बन्धी विज्ञहरू, सरोकारवाला निकायहरू पक्षविपक्षमा रहेकाहरूको टिका टिप्पणीबाट पनि के स्पष्ट छ भने, एमसिसी नेपालीको हितमा छैन । साथै एमसिसी सम्झौतामा उल्लेखित विभिन्न बुँदाहरूले पनि नेपाल र नेपाली जनताको अहितमा छ भन्ने थप स्पष्ट पारेको छ ।
राप्रपाको पहिलो बैठकबाट नवनिर्वाचित महामन्त्री भुवन पाठकको संयोजकत्वमा स्थानीय निर्वाचन परिचालन समिति बनाई सकेको छ । त्यस समितिले ७५३ गाउँपालिका, नगरपालिकाहरू र ६ हजार ७४३ वडाहरूमा कार्यालय उद्घाटन गर्ने, प्रशिक्षण कार्यक्रम संचालन गर्ने, विस्तारित बैठकहरू गर्ने, घरदैलो कार्यक्रमहरू गर्नेलगायतका कार्यक्रमहरू सो समितिको सक्रियतामा सञ्चालन भइरहेका छन् । यो क्रम तीव्र गतिमा, अघि बढ्ने छ ।
सुशासन, विधि प्रव्रिmया स्थापना गर्नका लागि राष्ट्र राष्ट्रियतालाई बलियो बनाउनका लागि, स्वधीन अखण्ड नेपाल राखिराख्नका लागि, धर्म, संस्कृति परम्परा बचाई राख्नका लागि र हिन्दू राष्ट्रभित्र हिन्दू, बौद्ध, किराँत, मुस्लिम र व्रिmस्चियनलगायत अन्य धर्मावलम्बीहरूको संरक्षण र सम्बद्र्धन गर्नका लागि पूर्णधार्मिक स्वतन्त्रतासहितको र राजासहितको प्रजातन्त्र पुनस्र्थापनाको लागि सबै नेपाली जनतामा राप्रपाको झण्डामा एकताबद्ध हुन आह्वान गर्दछु ।
लेखक प्रविणकुमार थोकर तामाङ राप्रपाको केन्द्रीय सदस्य हुनुहुन्छ । - प्रविणकुमार थोकर तामाङ
