काठमाडौं- नेपाल पौडी संघले तेस्रो नेपाल एक्वाटिक च्याम्पियनशिपको क्रममा एशियाली खेलकूद छनोट प्रक्रियाप्रति खेलाडीहरूले असन्तुष्टि व्यक्त गरेका छन् । खेलाडीहरूले होलिडे इन एक्सप्रेस होटलमा मंगलबार पत्रकार सम्मेलनमार्फत जानकारी गरेका हुन् ।
खेलाडीहरूका अनुसार नेपाल पौडी संघले वैशाख १० गते जारी गरेको सूचनामा २०८३ साल जेठ २३ र २४ गते आयोजना हुने तेस्रो नेपाल एक्वाटिक च्याम्पियनशिपलाई जापानमा हुने एशियाली खेलकूदको प्रि(क्वालिफिकेशन प्रतियोगिताका रूपमा उल्लेख गरेको थियो ।
उक्त सूचनामा महिला र पुरुषतर्फ ८-८ जना खेलाडीलाई अन्तिम छनोट चरणका लागि चयन गरिने तथा असारको तेस्रो साता अन्तिम छनोट प्रतियोगिता सञ्चालन गरी एशियाली खेलकूदका लागि प्रतिनिधित्व गर्ने खेलाडी छनोट गरिने स्पष्ट व्यवस्था गरिएको थियो।
पछि जेठ ७ गते अर्को सूचना जारी गर्दै केही स्पर्धाहरूमा परिवर्तन गरिए पनि छनोटको मूल मापदण्ड भने यथावत् राखिएको खेलाडीहरूको भनाइ छ । सोही आधारमा आफूहरूले तयारी गरेको उनीहरूको दाबी छ । तर प्रतियोगिताको दोस्रो दिन जेठ २४ गते बिहान संघले हस्ताक्षर र छापबिनाको सूचना सार्वजनिक गर्दै प्रतियोगितालाई नै एशियाली खेलकूदको अन्तिम छनोटका रूपमा परिणत गरिएको तथा ८-८ जना खेलाडीको सट्टा महिला र पुरुषतर्फ २-२ जना मात्र छनोट गरिने व्यवस्था गरेको आरोप खेलाडीहरूले लगाएका छन् ।
खेलाडीहरूको भनाइमा, आधाभन्दा बढी खेल सम्पन्न भइसकेपछि छनोटको मापदण्ड परिवर्तन गरिएको निर्णयले प्रतियोगिताको निष्पक्षतामाथि प्रश्न उठाएको छ । उनीहरूले राष्ट्रिय खेलकूद परिषद्ले जेठ २२ गते पत्राचार गर्दै पाँच दिनभित्र एशियाली खेलकूदका लागि खेलाडी छनोट गर्न निर्देशन दिएको विषयलाई आधार बनाएर नियम परिवर्तन गरिएको दाबी गरेका छन् ।
खेलाडीहरूले नेपाल पौडी संघले आफ्नै पूर्वनिर्धारित नियम तथा मापदण्ड उल्लंघन गरेको आरोप लगाउँदै यस घटनाको निष्पक्ष छानबिनको माग गरेका छन्। उनीहरूका अनुसार एशियाली खेलकूद आयोजक पक्षले प्रतियोगितामा सहभागी खेलाडीहरूको नाम असारको अन्तिम सातासम्म पठाउन सकिने व्यवस्था गरेको छ ।
घटनापछि आफूहरू मानसिक रूपमा प्रभावित भएको उल्लेख गर्दै खेलाडीहरूले खेलाडीमाथि अन्यायपूर्ण निर्णय हुन नदिन र भविष्यमा कुनै पनि खेल संस्था वा संघले प्रतियोगिताकै बीचमा नियम परिवर्तन गर्न नसकोस् भन्ने उद्देश्यले सर्वोच्च अदालतमा निवेदन दायर गरिएको बताएका छन् ।
सर्वोच्च अदालतले यस विषयमा छलफलका लागि बुधबार बोलाइसकेको र आफूहरू न्याय प्राप्त हुनेमा आशावादी रहेको खेलाडीहरूको भनाइ छ। उनीहरूले खेलकूदसँग सम्बन्धित सबै संस्थाले नियम, प्रक्रिया र अनुशासनको समान रूपमा पालना गर्नुपर्नेमा जोड दिएका छन्। पौडीका राष्ट्रिय खेलाडीहरूको तर्फबाट जारी वक्तव्यमा अन्यायविरुद्धको आवाजलाई साथ र समर्थन गर्न सरोकारवाला पक्षसँग आग्रह समेत गरिएको छ।
खेलाडीहरूले नेपालको प्रतिनिधित्व गर्ने खेलाडी छनोट प्रक्रिया निष्पक्ष, पारदर्शी, मापदण्डमा आधारित तथा सबैलाई समान अवसर प्रदान गर्ने हुनुपर्ने उल्लेख गरिएको छ । तर हाल सम्पन्न प्रारम्भिक छनोट प्रक्रियामा अपनाइएका केही निर्णय, मूल्याङ्कनका आधार तथा समग्र प्रक्रियाले खेलाडी, अभिभावक र सरोकारवालाहरूमा प्रश्न उठाएको दाबी गरिएको छ ।
